Yeremia 20
20
Totonaano Pasihuri hangano ipangao i Yeremia
20:1-6
1Sando mpesomba i Pasihuri anano i Imere, petewawado anu mpodagai Raha-Do i Ue, rumongeo i Yeremia pauo luwuno pau atuu. 2Ka i'amba i Pasihuri tumunduhio i Nabi Yeremia ka ipinanga i wawono Pewowa Langkai Benami a raha-Do i Ue. 3Tisomono, tempono i Pasihuri motolao i Yeremia inso a mpangano atuu i Yeremia motae ndi onae, ”Ondae i Ue, nahi Ira numeeakomu mbo'u i Pasihuri, tendeano Doitoa inso a luwuno siuno. 4Hangano kanandiomo pau-Do i Ue: Menteeano, Aku weweuko gagi doitoamu omuemu ka a luwuno sambe'emu; ondae ira ntebangkuako ponaino iwalido ka kokumitaakono matamu. Luwuno Yehuda Aku meweengako ira a ngkaeno mokole i Babeli anu ta wawa ira a pontadia i Babeli ka mepateako ira ponai. 5Luwuno arataano kota andio, luwuno hasili pe'iseino, luwuno parewano anu masuli olino ka arataado luwuno mokole i Yehuda Aku meweengakono a ngkaeno iwalido, anu ira me'alao gagi pinomuru ka i'amba luwuno atuu winawa i Babeli. 6Ka omue, Pasuri, ka luwuno mia anu mpo'ia i rahamu, komiu mewinawa gagi mia mentinawa hawe i Babeli. Omue komate ka kinaburu i ra'ai, omue ka luwuno sambe'emu anu upompauako iramo anu ta gagi nahi mentee.”
Pompete'osano i Yeremia
20:7-18
7Ipopandei akumo, oo Ue,
ka ongkue tepopandei;
Tedoa kupemoroso Komiu
ka mehasili Komiu.
Ongkue gagi mia tinawa te'asa oleo,
luwudo mempasinggiri aku.
8Hangano, sompo kupepau, asalakono aku kumora
ka mebooli, ”Nahina moleoa! Pobobarasaia!”
Hangano pau-Do i Ue gagiomo pontetewehi
ka pasinggiri ndi ongkue, te'asa oleo.
9Tewala mompewowolo aku, ”Nahi kubehe mewowolo Ira
ka nahi kubehe mbo'u mepau a nee-Do,”
onaemo pu'uno i laro aroaku hinao asa kana api anu tensila,
te'uko a laro wukuku.
Kuperokuhiakono meteao,
sine nahi kupolio.
10Mentee ntu'u, Kurongeomo petanga-tangado hadio mia,
”Doitoa inso a luwuno lakoa! Kalakio! Tomengkalakio!”
Luwuno sambe'e morosoku
mposikori tedontaaku,
”Bara'ura ta koa tepopandei,
ka tompokonangio
saru mpombalo ndi onae!”
11Sine Ondae i Ue kumongkomi aku kana puu mpetea anu moroso,
onaemo pu'uno anu melampui aku ira ntetidu ntebangku
ka nahi domehawe aku.
Ondae gagi tedoa memokoko'ii, hangano nahi domehawe aku,
asa mokoko'iia anu nahi ta kinolupe ranta nahina tampulaano!
12Oo Ueno luwuakoano, anu umarahako ira mia mentee,
anu kumitao laro aroa ka aroa,
po'ineeomo ka kukitao pombaloa-Miu ndi ondae,
hangano kupohaweomo ndi Omiu kara-karaku.
13Penanimo tia-Do i Ue,
unde-unde Iramo i Ue!
Hangano Dopotolaomo penaano mia mongkokolaro
inso a ngkaedo mia anu mpoweweu mosa'o.
14 #
Ayb. 3:1-19
Tetotonaaomo oleo
tempono kupine'anaako!
Po'ineeomo ka si rinonso
oleo tempono dope'anaakune ineku!
15Tetotonaaomo mia anu mowawa lele
ndi ondae amaku, motae,
”Asa nana'ote tama anamiu pine'anaakoomo!”
anu weweu ira tedoa mo'unde.
16Po'ineeomo mia atuu gagi kana luwuno kota
anu winowangunsule-Do i Ue nahina pompehohawa!
Po'ineeomo ka irongeo pebooli tempono mo'oru
ka pohio mpetea tempono ntonga oleo!
17Hangano nahi kupinepate a laro mpe'anakaa,
onaemo ondae ineku gagi kaburuku,
ka pe'anakaado mentia ranta nahina tampulaano!
18Tembioke ka kupeluarako inso a mpe'anakaa,
ka kukitao masusaa ka pompemasusa,
ranta luwuno oleo ntumuwuku metompaako a laro mokoko'ii?
Currently Selected:
Yeremia 20: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
