Yeremia 19
19
Pido-pido anu rinawo-rawo
19:1-15
1Kanandiomo pau-Do i Ue ndi ongkue, ”Lakomo po'oli pido-pido anu wineweu inso a wita pulu, ka i'amba saru ba'opia mia pinemota'udo tongku ka mia pinemota'udo sando mpesomba, 2#2Mok. 23:10; Yer. 7:30-32; 32:34-35pelungkamo lumako i Lembono Beni-Hinomi, a Mpewowa Langkai Parewa inso a wita pulu! Pebooliakonomo i ra'ai luwuno pau anu Aku mohaweo ndi omue! 3Pauomo: Rongeomo pau-Do i Ue, hei luwuno mokoledo to Yehuda ka palilino Yerusale! Kanandiomo pau-Do i Ue asa wawontolino, Uedo to Isaraeli: Menteeano, Aku mompotii masolaa a mpo'ianga andio, ranta birino mia anu rumongeo, ngingii! 4Hangano, dompebungkui Akumo, mensosa'aio po'ianga andio, ka mpotunu pesomba i tu'ai a luwuno pinesombai susua anu nahi tino'ori moiko ondaedo maupo uempu'udo ka luwuno mokoledo to Yehuda. Domeweweuomo po'ianga andio bukeako reado mia anu nahina salano. 5#Ima. 18:21Dompontade iramo pompesombaiado Baala pontunuado anado gagi pesomba tinunu a Baala, asa anu nahi Kuhori meparentaako ke pauo ka anu nahi hori hina i laro aroa-Ku. 6Onaemo pu'uno, menteeano, tempono ta hawe, kanandiomo pau-Do i Ue, po'ianga andio nahi ta pinau mbo'u Topeti ke Lembono Beni-Hinomi, tendeano Lembono Ponsumbelea. 7Nahi Aku mokogagio tinoono Yehuda ka Yerusale a mpo'ianga andio. Aku weweu ira ntebangkuako ponai i arono luwuno iwalido ka a ngkaedo mia anu mpomporaakono penaado. Aku meweengakono wata ngkoroido gagi kaangado manu-manu i laro meene ka a luwuno ngkondehora i tolino. 8Aku weweuo kota andio gagi asa anu mongkokongiri ka pasinggiria. Sompo mia anu telaloio ta tekokodoho ka momansu hangano luwuno petunduhi anu pinemarasaino. 9Aku weweu ira mpongkaa bauno anado tama ka bauno anado beine. Sompo mia mongkaa bauno walino, a laro ntekaduado ka tepakada hangano luwuno iwalido ka hangano mia anu momporaakono penaado.
10Ka i'amba puro iramo pido-pido atuu i arono matado mia anu perongamu lumako. 11Pauako iramo: Kanandiomo pau-Do Ueno luwuakoano: Kanandiomo Aku merawo-rawoo tongku andio ka kota andio, kana mia morawo parewa inso a wita pulu puu mpoweweu kuro, ranta nahi pinokomoiko mbo'u. I Topeti mia ira mpongkaburu wata ngkoroi, hangano nahina mbo'u po'ianga pongkaburua. 12Kanatuumo Aku weweuo a mpo'ianga andio, kanandiomo pau-Do i Ue, ka a mpalilino. Aku weweuo kota andio kana Topeti. 13Luwuno raha i Yerusale ka luwuno rahado mokoledo to Yehuda ta gagi po'ianga mokoburu kana Topeti, onaemo luwuno raha anu i wawo atono mia mpotunu pesomba tiano luwuno sorodadu langi ka mpompesombaako pesomba tinawa a luwuno pinesombai susua.”
14I Yeremia mekule inso i Topeti, po'ianga Dotenao i Ue ka ipompau anu ta gagi. Onae mentade a kintalano raha-Do i Ue ka ipepau a luwuno palili, 15”Kanandiomo pau-Do Ueno luwuakoano, Ue Alado to Isaraeli: Menteeano, Aku motiio a ngkota andio ka luwuno kota kodeino, luwuno masolaa anu Kupauomo ta umalu ira. Hangano, ondae memotea ulu ka nahi domperorongeakono luwuno pau-Ku.”
Currently Selected:
Yeremia 19: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
