Yeremia 21
21
Tedontaano Yerusale pinauako Mokole Sedekia
21:1-10
1Pau inso ndi Ondae i Ue anu hawe ndi Yeremia, tempono Mokole Sedekia tumenao i Pasihuri anano i Malakia ka sando mpesomba Sepana anano i Ma'asea ndi onae saru pe'oliwi, 2#2Mok. 25:1-11; 2Taw. 36:17-21”Pesikenoakamimo pontiso-Do i Ue, hangano i Nebukanesa, mokole i Babeli, meteaa kami! Bara'ura Ondae i Ue Ira weweua kami mengkena kana luwuno wineweu-Do anu kinohali-haliako, ka ibinta kami i Nebukanesa.” 3Motae i Yeremia ndi ondae, ”Kanandiomo imempauakono i Sedekia: 4Kanandiomo pau-Do i Ue, Ue Alado to Isaraeli: Menteeano, Aku mosuleo parewa mpetea a ngkaemiu, anu pinakemiu mpetea umewaio mokole i Babeli ka luwuno to Kasidimi anu mengkadu komiu i bungkuno rere watu. Aku pumpuo i tonga-tongano kota andio. 5Ongkue isa'a metea umewaiakomiu kae tetande ka tokia anu moroso, saru tekuda, langano tekuda ka bamburu anu langkai. 6Aku tumunduhi ira palilino kota andio, moiko mia maupo kondehora; ira memateako haki lele anu mongkokongiri. 7Umarino atuu, i Sedekia, mokoledo to Yehuda, ka luwuno pegawaino saru palilino kota andio, anu tola inso a haki lele, ponai ka mokoninggoa, Aku meweengako ira a ngkaeno i Nebukanesa, mokole i Babeli, kanandiomo pau-Do i Ue, a ngkaeno iwalido anu momporaakono penaado. Mia ta mepateako ira mata mponai nahina pompehohawa, nahina mokoko'undu ka nahina ampu.
8Sine a tongku andio asalakono ka upauo: Kanandiomo pau-Do i Ue, menteeano, Kupo'aro komiu a nsala ntuwua ka sala matea. 9Isema anu mo'ia a ngkota andio ta mate hangano ponai, mokoninggoa ka haki lele; sine isema anu meluarako inso i ndi'ai ka meweengakono koroino a nto Kasidimi anu kumadu komiu, onae kongko tuwu; penaano onaeno anu gagi rontuano. 10Hangano Ku'aropiakonomo mosa'oa kota andio ka komba moikoa, kanandiomo pau-Do i Ue. Kota andio ta pineweengako a ngkaeno mokole i Babeli ka ta sumongkoo.”
Ondae i Ue motuntu moleoa
21:11–22:9
11Hawe a nsomborino mokoledo to Yehuda. Rongeomo pau-Do i Ue, 12”Kanandiomo pau-Do i Ue, hei inuleno i Daudi:
Putusiomo songka anu moleo sompo mo'oru,
potolaomo anu rinontu inso a ngkaeno anu bobarasaio,
ka si tensilano tekuda-Ku montiu kana api
ka tensila nahi pinokompepate,
hangano luwuno wineweumiu anu mosa'o!
13Menteeano, Aku gagi ewaimu, hei omiu anu i lembono,
torukuno watu a mantandeano, kanandiomo pau-Do i Ue,
hei omiu anu mpotae: Isema anu ta metii umewai kami,
isema anu ta mewinso a mpo'iangamami?
14Aku humuku komiu
menunu saru hasilino wineweumiu, kanandiomo pau-Do i Ue.
Aku molangao api a ntobuno
ka api atuu ta kumaano ka ipingko luwuakoano i horino.”
Currently Selected:
Yeremia 21: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
