Yeremia 18
18
Pepaguru mongkona petenunu inso a puu mpoweweu kuro
18:1-17
1Pau inso ndi Ondae i Ue anu hawe ndi Yeremia, kanandio, 2”Pontuturakomo lako a rahano puu mpoweweu kuro! I ra'ai Aku mohaweo luwuno pau-Ku ndi omue.” 3Ka ku'amba lumako a rahano puu mpoweweu kuro, ka tengkitaomo onae kontongaano mo'anggaako parewa powolili. 4Tewala bolusa, anu kontongaano iweweuo inso a wita pulu a ngkaeno atuu, masola, asalakono puu mpoweweu atuu wali weweu gagi bolusa susua montonda hapa anu ikitao moiko. 5Ka i'amba haweomo pau-Do i Ue ndi ongkue, kanandio, 6”Nde nahi Kupolioke weweuo ndi omiu kana puu mpoweweu kuro andio, hei suku Isaraeli? kanandiomo pau-Do i Ue. Mentee ntu'u, kana wita pulu a ngkaeno puu mpoweweu kuro, kanatuumo omiu a ngkae-Ku, hei suku Isaraeli. 7Hinao tempono Ongkue mepau mongkona asa tongku ka mongkona asa poparentaa nine Aku butao, mobangkuo ka mepateo. 8Sine, tewala tongku anu pinau-Ku atuu tepidi inso a wineweuno mosa'o, asalakono Aku me'o'ole hangano mingki modontaiakono masolaa anu Kupontooakono ndi onae. 9Hinao tempono Ongkue mepau mongkona asa tongku ka mongkona asa poparentaa nine Aku wanguo ka pahoo. 10Sine tewala mpoweweu ira anu mosa'o i arono mata-Ku ka nahi domperorongeakono pau-Ku, asalakono me'o'ole Akumo hangano moikoa anu dinandi-Ku ka ipetii ndi ondae. 11Onaemo pu'uno, pauako iramo to Yehuda ka palilino Yerusale: Kanandiomo pau-Do i Ue: Menteeano, Ongkue tekonai mompatinda masolaamiu ka motudaakomiu tinoo. Asalakono omiu singge mia ka itepidi inso a mpeleluno anu mosa'o, impokomoikoomo pelelumiu ka poweweumiu! 12Sine dompotae: Siimo nahina tuduno! Hangano omami kami mentuwu montonda tinoomami ka singge mia ta moweweu montonda aroano anu motea ka mosa'o.”
13Onaemo pu'uno kanandiomo pau-Do i Ue,
”pesikenoakonomo i olodo tongku:
isemake anu rumongeomo mongkona anu kanandio?
Luwuno mongkona anu tedoa mongkokongiri
domeweweuomo Ana Beinedo to Isaraeli!
14Nde ta loonoke seru baku i Libano
bintao laano anu mewatu?
Nde ta mo'areke uwoino torukuno anu morini-rini?
15Sine bawaa-Ku domengkolupe Akumo.
Ondae mpotunu pesomba a mpinesombai nahina pengkonaano,
ondae ntetidu ntebangku a luwuno pesalaado,
a luwuno pesalaa inso a tempo i ndi'ipua,
ka mpo'ala pesalaa metosi,
pesalaa anu nahi wineweu,
16ranta ka domeweweuo witado gagi asa anu mongkokongiri
gagi pompopodeu-deu ranta nahina tampulaano.
Sompo mia anu lumaloo ta mokokongiriakono,
ka bitu-bituo uluno.
17Kana angi i sabaano oleo Aku sumiarawo ira
i arono iwali.
Aku mopokitao bungku-Ku ndi ondae, komba rupa-Ku,
a oleo masolaado.”
Pekakaino i Yeremia mo'ema pombaloa a iwalino
18:18-23
18Dompotae, ”Aiwamo tompotudao tinooto umewaio i Yeremia, hangano pompaguru nahi ta pingko inso a nsando mpesomba, patudu inso a mia pande monsongka, ka pau inso a nabi. Aiwa tomentunduhiakono pau ka si pinekokoongako sompo pinauno!”
19Iperio akumo, oo Ue,
ka Irongeomo paudo iwaliku!
20Ta gagike moikoa sinuloako mosa'oa?
Sine mpokeke iramo aa patamboku!
Irambeomo nine mentade akumo i aro-Miu,
ka mepau umalaako ira,
ka itemonto tekuda-Miu inso ndi ondae.
21Onaemo pu'uno, Ipeweengako iramo anado a mokoninggoa,
ka Ipetadiako iramo a mata mponai!
Po'ineeomo beinedo
ntetadi anado ka mentuwu beine;
po'ineeomo tamado memate tinunduhi,
ka mangalitaudo mempinepateako ponai a mpeteaa!
22Po'ineeomo peraaliki teronge inso a luwuno rahado,
tempono Omiu nahi kinookoo mompotii gerombola mporontu ndi ondae!
Hangano mpokeke iramo aa pompatambo ira merako aku,
ka mponta'oakono oho karuku.
23Sine Omiu, oo Ue, Omiu tumo'orio
luwuno tinoodo mingki mpepate aku.
Siimo I'oniniako ira salado,
ka siimo Ipahihio halado inso i aro-Miu,
sine po'ineeomo dontetidu i aro-Miu;
a oleo tekuda-Miu Iweweuo ndi ondae!
Currently Selected:
Yeremia 18: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
