Yeremia 17

I Yeremia ka hala tongkuno anu motea aroa

17:1-18

1”Halano Yehuda teburiako pena labu memata inta,

tenggori a laro aroano

ka a ntandu-tanduno meda pontunuado pesomba

2gagi pepopoto'ori ndi ondae!

Luwuno meda pontunua pesomba ka luwuno karuno pelahumoaado

lano kongko i horino keu anu marombo leweno

i wawono luwuno pongku anu mantande,

3a luwuno torukuno-Ku a mpada.

Arataa kaeamu ka luwuno ponaapamu arataa

Aku meweengakono gagi rontua,

gagi hukuno halamu

a luwuno witamu.

4Tia pusakamu anu Kuweeakomumo

ta tepotola inso ndi omue,

ka Aku mokogagiko atado iwalimu

i wita anu nahi uto'orio,

hangano upolangaomo api a laro ntekuda-Ku

anu ta melanga nahina tampulaano.”

5Kanandiomo pau-Do i Ue,

”Tetotonaaomo mia anu momperorohi mia,

anu mehonda a rosono koroino,

ka anu aroano olai inso ndi Ondae i Ue!

6Onae ta kana tonga ewo londa a mpada malua,

onae nahi ta kumitao haweno teweweu moiko;

onae ta mo'ia a wita londa i pada one,

a mpada ohia anu nahina miano.

7Rinonsoomo mia anu momperorohi ndi Ondae i Ue,

anu me'ala-alaakono koroino ndi Ondae i Ue!

8 # Pow. 1:3 Onae ta kana keu anu pinaho a wiwi uwoi,

anu lumele hakano a wiwi ngkorono,

ka nahi ta membasaio haweno mokula oleo,

anu leweno kongko molowulu,

anu nahi danggara i larono ta'u motu'i-tu'i,

ka anu nahi penaa-naa moluarako wuano.

9Aroa atuu hadio akalano lumaloio luwuakoano,

ka nahi tepomule; isema anu mokonto'orio?

10 # Pud. 62:13; Meng. 2:23 Ongkuemo, Ue, anu mepenteeo aroa,

ka umarahakono laro aroa,

ka mombalo a sompo mia menunu saru peleluno,

menunu saru hasilino wineweuno.”

11Kana torato anu mo'opoti nahi pesu'uluiakono,

kanatuumo mia anu mopumpu kaea anu komba tiano.

A entongano tinuwuno onae ta tetadi luwu,

ka a tompaano tinuwuno onae butumo koa asa mia nahi montaso pinewowolono.

12Kadera marambaa, maramba inso a pompu'uano,

po'iangano raha memporito!

13Oo Ue, pomperorohiado to Isaraeli,

luwuno mia anu mpebungkui Komiu ira mpohawe mokoko'ii;

mia anu mepansia inso ndi Omiu ira mebinuri a awu wita,

hangano dompebungkui Komiumo Ue, insoano uwoi anu tuwu.

14Ipokotompa akumo, oo Ue, asalakono aku tompa;

Ikadudui akumo, asalakono aku tekadudui,

hangano Omiumo inunde-undeku!

15Menteeano, dompotae ndi ongkue,

”Isuake pau-Do i Ue atuu?

Po'ineeomo ka ihawe!”

16Ongkue isa'a nahi kuhori medada gagi puu mpompakambi tumonda Komiu

komba ineheku oleo masolaa!

Omiumo anu tumo'orio hapa anu meluarako inso a wiwiku,

luwuno mengkaa i aro-Miu.

17Siimo Igagi anu mongkokongiri ndi ongkue,

Omiumo pepekaduduiaku a oleo masolaa.

18Po'ineeomo mia anu melampui aku mpohawe mokoko'ii, sine siimo kupinokoko'ii;

po'ineeomo ka domedoito, sine siimo kupinokodoito!

Ipotiiomo oleo masolaa ndi ondae,

ka Irawo-rawoako iramo porawo-rawo meluka.

Parenta ka ipinokomempori Oleo Saba

17:19-27

19Kanandiomo pau-Do i Ue, ”Lakomo ka pentademo a Mpewowa Langkai Anano Palili, telaloado luwuno mokoledo to Yehuda tempono dompeluarako ka mpewinso, saru mbo'u a luwuno pewowa langkaino Yerusale. 20Pauako iramo: Rongeomo pau-Do i Ue, hei luwuno mokoledo to Yehuda, hei luwuno to Yehuda ka luwuno palilino Yerusale anu mentelaloio luwuno pewowa langkai andio! 21#Neh. 13:15-22Kanandiomo pau-Do i Ue: Tangkoroomo penaamu! Si mponteo parewa a oleo Saba ke mewawao telalo a luwuno pewowa langkaino Yerusale! 22#Pel. 20:8-10; Win. 5:12-14Si mpowawa parewa mpeluarako inso a rahamiu a oleo Saba ka si mpo'angga maupo hapa. Sine pokomemporiomo oleo Saba kana anu Kuparentaako iramo uempu'umiu. 23Sine nahi domebehe mperorongeakono ka nahi domebehe menta'oo birido, memotea ulu ira, nahi domebehe merongeo ka nahi domebehe mpontarima pongkuahako. 24Tewala mentee ntu'u imperorongea-Kune, kanandiomo pau-Do i Ue, ka nahi mpowawa parewa telalo a luwuno pewowa langkaino kota andio a oleo Saba, sine mpokomemporio oleo Saba ka nahi mpo'angga maupo hapa a oleo atuu, 25asalakono telalo a luwuno pewowa langkaino kota andio ira mpewinso mokole ka mia mempinemota'u, anu ira mpentoro a ngkadera poparentaano i Daudi, saru mpe'ula a ngkareta ka ngara: ondae ka luwumo mia pinemota'udo, to Yehuda ka palilino Yerusale. Kota andio ira mpo'iangario mia ranta nahina tampulaano. 26Mia ira me'aiwa inso a luwuno kotano Yehuda ka inso a luwuno po'ianga i horino Yerusale, inso i wita Benami ka Daera Pongku, inso i mentorukuno ka wita Nege, saru mpowawa pesomba tinunu, pesomba sinumbele, pesomba kaanga ka dupa, saru mpowawa pesomba po'unde-unde a laro Raha-Do i Ue. 27Sine tewala nahi mperorongea-Kune ka impokomemporio oleo Saba ka nahi mpowawa parewa telalo a luwuno pewowa langkaino Yerusale a oleo Saba, asalakono a luwuno mpewowa langkaino Aku molangao api, anu ta kumaano ka ipingko luwuno benteno Yerusale, ka anu nahi pinokompepate.”

Currently Selected:

Yeremia 17: XMZ

Highlight

Copy

Compare