Yeremia 11
11
Pepopoto'ori a mpolaloa pedandia-Do Ue Ala
11:1-17
1Pau-Do Ue Ala anu hawe ndi Yeremia, kanandio, 2”Rongeomo pauno pedandia andio ka pohaweomo atuu a nto Yehuda, palilino Yerusale! 3Pauako iramo: Kanandiomo pau-Do i Ue, Ue Alado to isaraeli: Tetotonaaomo mia anu nahi perorongeakono luwuno pau pedandia andio 4anu Kuparentaako iramo uempu'umiu i tempono Kuwawa ira mpeluarako inso i wita Masiri, inso a awu pompokolonoa labu. Pau-Ku: Rongeomo pinau-Ku ka weweuomo luwuno anu Kuparentaakomu, asalakono kogagi bawaa-Ku ka Ongkue gagi Ue Alamu. 5Ba kanandio Aku umihiio sumpa anu Kupedandiakonomo a uempu'umiu Aku weeako ira wita anu hadio ntu'u susu ka siu hoanino, kana teweweuno a tempo andio.” Ka ku'amba sumangki, ”Ami, oo Ue!”
6Mepau Iramo i Ue ndi ongkue, ”Pebooliakonomo luwuno pau andio a luwuno kotano Yehuda ka a luwuno sala i Yerusale: Rongeomo ka weweuomo luwuno pau pedandia andio! 7Mentee ntu'u Kupopoto'oriako iramo uempu'umiu, i tempono Kutaate ira mpeluarako inso i wita Masiri. Maupo hawe tempo andio Kupopoto'oriako ira mpiha: Rongeomo pau-Ku! 8Sine, nahi dobehe mperorongeakono ke mpo'aroo birido. Ondae singge mentondao moteano aroado anu mosa'o ranta ka Kupotiiako ira luwuno pau pedandia, anu umariomo Kupeparentaako ka i wineweu, sine nahi domeweweuo.”
9Mepau Iramo i Ue ndi ongkue, ”Hinaweomo tepo'asaa i olodo to Yehuda ka i olodo palilino Yerusale. 10Ondae wali meweweuo sala mpeleludo uempu'udo anu i ndi'ipua nahi dobehe mperorongeakono pau-Ku. Ondae mpetonda a mpinesombai susua ka mpesomba ndi onae. Suku Isaraeli ka suku Yehuda domehapuomo pedandia-Ku anu Kuwutuo saru uempu'udo. 11Onaemo pu'uno kanandiomo pau-Do i Ue: Menteeano, Aku mompotiiako ira masolaa anu nahi dompokompeliahako. Tewala mpeboo-booli ira ndi Ongkue, nahi Aku merorongeako ira. 12Ka i'amba luwuno kotano Yehuda ka palilino Yerusale melako mpeboo-booli a luwuno pinesombai anu inunde-undedo saru mpotunu pesomba. Sine, luwuno pinesombai atuu nahi pokontulungi ira ntu'u i tempono i'alu ira masolaa. 13Hangano kana hadiono kotamu kanandiomo hadiono pinesombaimu, hei Yehuda. Kana hadiono sala i Yerusale kanandiomo hadiono meda pontunua pesomba anu pinontademiu pontunua pesomba tiano Baala. 14Ka omue, siimo pekakaiako ira tongku andio. Siimo powuatako po'ema ka pekakai tiado, hangano nahi Aku merorongeakono i tempono dompebooli ndi Ongkue hangano masolaado.
15Hapa mbo'u orusuano pinehohawa-Ku a laro raha-Ku,
kombake onae iweweuomo luwuno tinoono anu mosa'o?
Polioke luwuno pontanga ka bau mempori
lumiahakomu inso a masolaa,
ranta lembuino omue mokompo'unde?
16Keu saitu anu marombo, tekosi ikitao mata,
kanatuumo hori Ira i Ue moponeeko.
Sine saru unino pohohoi anu meroku ntu'u
Ondae molangao api a luwuno leweno,
ranta luwuno sampa motutuno mo'ai.
17Ondae Ueno luwuakoano, anu weweuko ka utuwu, tumantuiomo masolaa ndi omue hangano poweweu mosa'o anu wineweudo suku Isaraeli ka suku Yehuda. Ondae mpokotesingkao tekuda-Ku hangano mpontunu pesomba a Baala.”
Penaano i Yeremia pinontooako i Anatoti
11:18-23
18Ondae i Ue pauo mongkona atuu ndi ongkue, onaemo ka kuto'orio. I tempo atuu, Ondae i Ue, mopokitaakune hapa anu wineweudo. 19Se'eluno ongkue kana ana bimba monea anu winawa ta sinumbele, nahi kuto'orio nine ondae mpoweweu tinoo mosa'o ndi ongkue, ”Aiwamo tomeropuo keu andio saru luwuno wuano! Aiwamo to mpokotampulao inso a witado mia tuwu, ranta nami rinambe mbo'u neeno!”
20Sine, oo Ueno luwuakoano, anu mobitara moleo,
mo'arahako laro aroa ka aroa,
po'ineeomo kukitao pombalo-Miu ndi ondae,
hangano ndi Omiumo kuwawao kara-karaku.
21Onaemo pu'uno kanandiomo pau-Do i Ue mongkona luwuno to Anatoti anu inehedo mpepate aku saru mpotae, ”Si pompau anu ta gagi a nee-Do i Ue, ka si umate a ngkaemami!” 22Onaemo pu'uno kanandiomo pau-Do Ueno luwuakoano, ”Menteeano, Aku humuku ira. Luwuno mia mongurado ira memateako ponai, luwuno anado tama ka beine ira memate mokoninggo. 23Nahina anu torea inso i olodo, hangano Aku mompotii masolaa a nto Anatoti a nta'u hukuado.”
Currently Selected:
Yeremia 11: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
