Yeremia 12
12
Po'emano i Yeremia ka sangki-Do Ue Ala
12:1-17
1Omiu mentee mpiha, oo Ue,
tewala ongkue mekara-kara saru Omiu!
Sine aku mepau ndi Omiu mongkona moleoa:
Tembio ka ime'ura tuwuno mia mosa'o gauno,
manangai luwu anu mpoweweu molengku?
2Omiu weweu ira tuwu ka dompehaka,
ondae mentuwu mewalo ka mehasiliako wua.
Omiu mpiha a wiwido,
sine olai inso i aroado.
3Oo Ue, Omiu tumo'ori aku ka kumita aku.
Omiu umarahakono ihino aroaku ndi Omiu.
Pae iramo mpeluarako kana bawaano bembe bimba sumbelea,
ka pesusua iramo tiano oleo ponsumbelea.
4Opiapo mbo'u tempono itedoa mokari wita andio,
ka ewo a luwuno pada moleu?
Hangano mosa'o poweweudo palilino kondehora ka manu-manu pingko tampula,
hangano mpotaedo, ”Nahi Ira kumita kita poko'ariano anu umalu kita!”
5”Tewala omue melulu saru mia anu melulu, ka ipokomokendoko,
kana'umpeke kometandiakono ngara?
Tewala a wita anu manangai nahi urodo,
hapake anu koweweuo a ntobu mongurano koro Yarade?
6Hangano luwuno pepaekompomu ka pe'etumu tendeano
mempopo'ooko koa mbo'u;
ondae mbo'u nahi domenanta-nata mpebooli i bungkumu.
Si pe'ala-ala ira, maupo mo'ahi-ahi dompepauakomu!
7Kubintaomo raha-Ku,
ka metadiakono tia pusaka-Ku;
Kupeweengakono ana pinehohawa-Ku
a ngkaedo iwalino.
8Tia pusaka-Ku gagiomo
kana singa a ntobu ndi Ongkue.
Ipengaolia-Kune;
onaemo pu'uno ka Ku'o'aliaakono.
9Tia pusaka-Ku gagiomo
kana manu-manu mpongkaa kosume ndi Ongkue.
Manu-manu mpongkaa bau menggowoo.
Hio, pumpu iramo luwuno kondehora mo'ila,
wawa iramo ka domepingkoo!
10Hadio puu mpopakambi anu mensolangiomo lere anggoro-Ku,
ka melolandao wita-Ku.
Ondae meweweuo wita-Ku anu tekosi
gagi pada one anu boni-boni.
11Oo, domeweweuomo boni-boni,
boni-boni ka po'inombo i aro-Ku!
Boni-boni luwuno wita atuu,
sine nahina maupo te'asa mia anu merioo.
12Anu mponsolangi mehawe iramo
ntelaloio luwuno pongku londa i pada one,
hangano ponai-Do i Ue mompepate
inso i tompano wita anu asa hawe a tompano susuano;
nahina rodoa a luwuno anu mentuwu.
13Ondae mporawo gandu, sine anu sinowi ewo rui;
ondae mperokuhi, sine usahado nahina tuduno;
mokoko'iido a hasili anu hinawedo,
hangano tekuda-Do i Ue anu tensila.”
14Kanandiomo pau-Do i Ue, ”Mongkona luwuno pehori raha-Ku anu mosa'o wineweudo, luwuno tongku anu monsosanggoli wita anu Kuweeako iramo bawaa-Ku Isaraeli gagi tia pusakado, menteeano Aku buta ira inso i witado ka Aku buta ira suku Yehuda inso i tonga-tongado. 15Sine, mansano Kubuta ira, Aku wali mehohawa ira. Aku mokule ira singge mia a ntia pusakano ka witano. 16Tewala mentee ntu'u dompepaguruakono sala ntumuwudo bawaa-Ku ka dompesumpa a nee-Ku, ’A nee-Do i Ue anu tuwu,’ kana'umpe domempaguru ira bawaa-Ku ka dompesumpa a neeno Baala, asalakono ira wali mewinangu i tonga-tongado bawaa-Ku. 17Sine, tewala nahi domebehe mperorongeakono, Aku butao luwu ka mepateo tongku atuu, kanandiomo pau-Do i Ue.”
Currently Selected:
Yeremia 12: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
