Yesaya 54
54
Pedandia manangai saru Sioni
54:1-17
1 #
Gal. 4:27
Mengkokora-koramo mawongko, hei beine bita anu nahi hori me'ana!
Po'undemo saru mengkokora-kora mawongko ka pebolikimo, hei omue anu nahi hori mompembasai mahaki me'ana!
Hangano luwuno anano beine anu bininta asa-asano ta laluaopo hadio anano
sekonopo nana'ote inso a beine anu hinao tamano, pau-Do i Ue.
2Pokomaluaomo po'iangano kemamu,
ka wileomo tenda po'iangamu,
sii tidahio;
poko'ondau iramo kolorono kemamu
ka tandapako iramo pandoramu temoroso!
3Hangano omue kotetiangi i koana ka i manggali,
inulemu ira mpetorokio witado luwuno tongku,
ka mpo'iangario luwuno kota anu boni-boni.
4Siimo doito, hangano nahi komohawe mokoko'ii,
ka siimo mokoko'ii, hangano nahi kotinata.
Hangano, omue kokumolupeo pontata tempono kontelaamu,
ka nahi komewowoloo mbo'u mokoko'iia tuwu beinemu.
5Hangano anu ta gagi tamamu onaemo Ondae Anu Mokogagiko,
Ueno Luwuakoano, nee-Do;
anu gagi Puu Pontolosimu onaemo Anu Tedoa Mempori Ue Alado to Isaraeli;
Ondae pinau Ue Alano asa wawontolino.
6Omue kana beine mekombia anu bininta ka anu masusa aroa
tempono Dowali moboiko i Ue;
kana'umpe beineno inso tempo da mongura
nahi ta hori tumarimao? Pau-Do Ue Alamu.
7Komba ta tehine Kubintako,
sine hangano pompehohawa anu langkai Kuwali umalako.
8A laro ntekuda anu tedoa langkai
Kuwuniomo rupa-Ku
sarai koa ndi omue,
sine a laro mompehohawa anu nahina balino
Kupehohawakomo,
pau-Do i Ue, Puu Pontolosimu.
9 #
Teg. 9:8-17
Mongkona andio ndi Ongkue kana lolowi tempono i Noho.
Kana Kupesumpa ndi onae
nine lolowi nahi ta tumutuwio mbo'u tolino,
kanatuu koa mbo'u Kupesumpa
nine nahi Aku tekuda ndi omue
ka nahi Aku wurasaiko mbo'u.
10Hangano maupo dompelimba torukuno
ka luwuno pongku mpelelu,
sine pompehohawa-Ku nahi ta melimba inso ndi omue
ka pedandia sintuwu-Ku nahi ta melelu,
pau-Do i Ue, anu mehohawako.
11 #
Meng. 21:18-21
Hei anu tepokonsii, anu rinumpaino angi mokora, anu nahi tinarero!
Menteeano, Aku monaa empehimu inso a watu mo'ito
ka pundasimu inso a watu lasuaradi.
12Aku weweuo luwuno punsuno rere watumu inso a watu delima,
luwuno pewowa langkaimu inso a watu manika motaha
ka luwuno rere watu petidamu inso a watu paramata.
13 #
Yoh. 6:45
Luwuno anamu ira megagi ana guru-Do i Ue,
ka langkaiomo manangaido anamu.
14Omue kotineahako a menteea.
Omue ko'olai inso a porontua,
hangano omue siimo doito mbo'u,
ka omue ko'olai inso a doitoa,
hangano onae nahi ta umpedaakomu.
15Tewala mia monsapoi,
atuu komba tepu'u inso ndi Ongkue;
isemamo koa anu sumapoiko,
ta tebangku umaropiko.
16Menteeano, Ongkuemo anu mokogagio puu mpolabu
anu mompuuri api
ka moweweu parewa mpetea montonda ponto'orino,
sine Ongkue koa mbo'u anu mokogagio
poropu anu sumolangio.
17Sompo parewa mpetea anu linabu
umewaiko nahi ta mehasili,
ka sompo mia anu tumuluriko
a laro mpobitaraa, komokomengkaao onae sala.
Onaemo tiado tetenaa-Do i Ue
ka menteea anu tinarimado inso ndi Ongkue, kanandiomo pau-Do i Ue.
Currently Selected:
Yesaya 54: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
