Yesaya 55
55
Pepoboi mpetonda a laro ntekaduduia anu inso ndi Ondae i Ue
55:1-13
1 #
Meng. 21:6; 22:17 Hei luwuno mia anu mokoranga, aiwamo ka impo'inumo uwoi,
ka hei mia anu nahina doino, aiwamo!
Tarimaomo gandu siimo inowahi ka pongkaamo,
anggoro mbo'u ka susu nahi inowahi!
2Tembio ka impo'oliako doi anu komba kaanga,
ka tambono pe'iseimu anu nahi mompokomowohi?
Ronge Akumo asalakono komiu mpongkaa anu moiko
ka pongkaa kaanga anu mo'ahi ntu'u.
3 #
Tin. 13:34
Ta'oomo birimu ka aiwamo ndi Ongkue;
perorongeakonomo asalakono komiu mentuwu!
Aku mowutu pedandia anu nahi bali saru omiu,
montonda pompehohawa-Ku anu moroso ndi Daudi.
4Menteeano, Kupakosiomo onae gagi sakosiido luwuno tongku,
gagi asa petewawa anu meparenta a luwuno suku tongku;
5Menteeano, omue komompoboi tongku anu nahi uto'orio,
ka tongku anu nahi uto'orio ta aiwa ndi omue,
hangano Ondae Ue Alamu,
Anu Mempori ntu'u, Ue Alado to Isaraeli, melangkaiko.
6Ungke Iramo i Ue tempono da inehe-Do totepohaweako Ira;
peboolimo ndi Ondae tempono da umpeda Ira!
7Moikoomo mia mosa'o gauno bintao salano,
ka mia lambaha bintao tinoono.
Moikoomo ipepokule ndi Ondae i Ue, asalakono Ira mehohawao,
ka ndi Ondae Ue Alato, hangano Ondae mo'onini hala hadio ntu'u.
8Hangano, tinoo-Ku komba tinoomiu,
ka salamiu komba sala-Ku,
kanandiomo pau-Do i Ue.
9Kana mantandeno langi inso i tolino,
kanatuumo mantandeno sala-Ku inso a nsalamiu
ka tinoo-Ku inso a ntinoomiu.
10 #
2Kor. 9:10
Hangano kana usa ka seru baku metii inso i langi
ka nahi pekule i tu'ai, tendeano umuwoio tolino,
mokomewaloo ka mompokotuwu pinopaho,
moweeako ira inii a puu mporawo ka kaanga a mia anu ta mongkaa,
11kanandiomo pau-Ku anu meluarako inso a nganga-Ku:
onae nahi ta mekule mpena ndi Ongkue,
sine onae ta weweuo hapa anu inehe-Ku,
ka ta mehasili a hapa anu Kutenaakono.
12Mentee ntu'u, komiu mpelungka memawongko
ka ta tineoako sintuwu;
luwuno torukuno ka pongku ira mpo'unde ka mengkokora-kora maroa i aromiu,
ka luwuno keu a mpada ira mpotopa-topa.
13Gagi euno ewo rui ta tuwu keu sanobari,
ka gagi euno kecubu ta tuwu keu muradi.
Mongkona atuu ta gagi telele-Do i Ue,
gagi petondoni nahi bali anu nahi ta tampula.
Currently Selected:
Yesaya 55: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
