Yesaya 50
50
Sioni tumembio salano onaeno
50:1-3
1Kanandiomo pau-Do i Ue,
”Nde isuaomoke wunta teposuano inemu
tondonino Kusaariomo?
Ke ndi semake i olodo puu ponsinga-Ku
Kuhori umasako?
Menteeano, hangano salamu omuemu ka imempinoko'asa
ka hangano salamu omuemu inemu sinaari.
2Tembio tempono Ku'aiwa nahina mia,
ka tempono Kupepoboi nahina anu sumangki?
Nde owowalahike kae-Ku mongkadudui
ke nahinake roso-Ku mompotola?
Menteeano, butu pau tekuda-Ku Kupokotu'io tahi,
luwuno korono Kuweweuo gagi pada one;
luwuno bou manaboo hangano nahina uwoi
ka memate mokoranga.
3Langi Kupokonaakono sangka wongi-wongia
ka kukolimbuakono sawu po'inombo.”
Petenunu ka modato aroano tetenaa-Do i Ue
50:4-11
4Ondae Ue Ala Dopoweeakunemo
elono asa mia ana guru,
kai butu pau kupolio moweeakono roso
mia anu telusa molema.
Mo'oru me'eu mo'oru Dopokomontasoo porongeku
ka kuporonge kana asa ana guru.
5Biriku Do'ungkahiomo Ue Ala,
ka nahi ku'umewa,
nahi kupewolili mbo'u i bungkuno.
6 #
Mat. 26:67; Mrk. 14:65 Kupeweengakono bungkuku a mia anu mentunduhi aku,
ka kombisiku a mia anu mebutao danggoku.
Nahi kuwunio rupaku
tempono kutinata ka inonui.
7Sine Ondae Ue Ala tumulungi aku;
onaemo pu'uno nahi kupohawe mokoko'iia.
Onaemo ka kupokorosoo aroaku
kana rosono torukuno watu
hangano kuto'orio nine nahi aku mohawe mokoko'ii.
8 #
Rom. 8:33-34
Ondae anu mokomengkaao mentee aku umpeda Iramo.
Isemake anu mosia megaga saru ongkue?
Aiwamo ka tolako meronga-ronga!
Isemake taroku mekara-kara?
Po'ineeomo ka i'umpeda ndi ongkue!
9Menteeano, Ondae Ue Ala tumulungi aku;
isemake anu mosia mokomengkaao nine ongkue sala?
Menteeano, luwudo tamo kana tahu sangka;
ule-ule ta kumaa ira.
10Isema i olomiu anu dumoitoako Ira i Ue
ka merorongeakono pauno tetenaa-Do?
Tewala onae tuwu a laro wongi-wongi
ka nahina wanta pansario,
moikoomo ka ipompe'ala-ala a nee-Do i Ue
ka momperorohi ndi Ondae Ue Alano!
11Menteeano, omiu luwu anu mpopokomelanga api
ka mpeparewaako pana-pana api,
impewinsomo a laro langano apimiu,
ka a ntongano pana-pana api anu imempasaomo!
Kae-Kumo anu ta mokogagio mongkona atuu ndi omiu;
komiu mpepombole a mpo'ianga tebobarasaia.
Currently Selected:
Yesaya 50: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
