Yesaya 51
51
Pau pontarero tiano Sioni
51:1-23
1Ronge Akumo,
hei omiu anu mpolulu hapa anu mente,
hei omiu anu umungke Ira i Ue!
Kitaomo torukuno watu anu inso ndi onae imempina'o,
ka a aa pongkekea watu anu inso ndi onae imengkineke.
2Kitaomo i Burahima, uempu'umiu,
ka i Sara anu me'anaakomiu.
Tempono i Burahima asa-asano, Kupoboio,
ka Ku'amba rumonsoo ka weweuo gagi hadio.
3Hangano Ondae i Ue tumareroo Sioni,
tumareroo luwuno tehoano;
Ondae weweuo pada oneno kana i Paradesi
ka pada maluano kana lere-Do i Ue.
I tu'ai hinawe mawongkoa ka po'undea,
penani po'unde-unde ka unino penani anu meroku.
4Pekokoongakono suara-Ku, hei bawaa-Ku,
ka ta'oomo birimu ndi Ongkue, hei tongku-Ku!
Hangano pompaguru ta meluarako inso ndi Ongkue
ka songka-Ku gagi mewine tiado tongku.
5I larono asa mpiniro tekaduduia inso ndi Ongkue ta umpeda,
tolaa anu Kuweeakomiu ta hawe,
ka kae pabawa-Ku ta parenta ira tongku;
ndi Ongkuemo luwuno togo mpesisikori,
wineweuno kae-Ku domperorohio.
6Po'aroomo matamu i langi
ka pengkitamo i tolino i totono;
hangano langi ta tampula kana ahu,
tolino kanaomo tahu sangka
ka palilino ira memate kana tiporo.
Sine, tekaduduia inso ndi Ongkue ta kongko mpiha ranta nahina tampulaano,
ka moleoa-Ku nahi ta menaa-naa.
7Ronge Akumo,
hei omiu anu mento'orio hapa anu mentee,
hei tongku anu menaao pompaguru-Ku a laro aroamiu!
Siimo doito a pontatano mia
ka siimo makura aroa hangano pepaukido.
8Hangano ondae ta kumaa ira ule-ule kana sangka
ka ule-ule ta kumaa ira kana sangka wulu bimba;
sine moleoa-Ku ta kongko mpiha ranta nahina tampulaano
ka tekaduduia inso ndi Ongkue ta motilalo mpiha ranta a luwuno inule.
9Pekaangakomo, pekaangakomo! Pokonaomo roso,
hei kae-Do i Ue!
Pekaangakomo kana i tempo se'eluno ntu'u,
ia tempo inule anu ndi'ipua ntu'u!
Komba Omiuke anu purokio i Rahabi,
anu montobo naga ranta mate?
10Komba Omiuke anu moko'areo tahi,
uwoi a ntahi malua anu mongkokongiri,
anu weweuo tahi anu ondalo gagi sala,
ka dompokompesakiako mia anu tinolosi?
11Luwuno mia anu pinotola-Do i Ue ira mpekule
ka mpewinso i Sioni mengkokora-kora mawongko,
po'unde nahina tampulaano ta gagi peramba-ramba uludo;
mawongkoa ka po'unde ta buketi ira,
masusaa ka pompemasusa me'olaiako.
12Ongkue, Ongkuemo anu tumarero komiu.
Omue andio isema ranta ka udoito
a mia anu ta mate,
a anano mia anu tinadi kana ewo?
13Omue kumolupe Ira i Ue anu mokogagiko,
anu wileo langi ka numaao empehino tolino.
Omue doito mpiha asa ngkeu oleo
a ntekudano anu mompokonsii atuu,
tempono ipepatinda mompokoropu.
Isuaomoke tekudano anu mompokonsii atuu?
14Onae anu pinanga tepongu ta ronga pinotola;
onae nahi ta mate metii a laro ngkaburu
ka nahi ta makura ngkaanga.
15Hangano Ongkuemo Ue, Ue Alamu,
anu bembuao tahi,
ranta ka ipebunde bombano, –
nee-Do Ue Alano luwuakoano.
16Aku numaao pau-Ku a laro ngangamu
ka dumagaiko a laro mpo'engoino kae-Ku,
Ongkue anu wileo langi ka numaao empehino tolino,
ka mepau ndi Sioni: Omuemo bawaa-Ku!
17 #
Meng. 14:10; 16:19 Pekaangakomo, Pekaangakomo,
pewangumo, hei Yerusale,
hei omue anu mo'inukomo inso a ngkae-Do i Ue
ihino piala mokulano tekuda-Do,
omue anu mo'inukomo, umosoo ka ipingko
ihino sangkiri anu mompokomokolili ulu!
18Inso a luwuno ana anu pine'anaakono
nahina anu tumaateo
inso a luwuno ana anu pinokolangkaino
nahina anu uminio kaeno.
19Orua urasa'o andio i'alukomo, –
isemake anu ta mompemasusa saru omue? –
matea maupo tekale-kalea, mokoninggoa maupo ponai.
Isemake anu ta tumareroko?
20Luwuno anamu ntebangku iramo nami domemoroso,
a luwuno tompano sala
kana sapi mo'ila kona oho;
ondae itutuwi ira mokulano tekuda-Do i Ue
ka pau meroku-Do Ue Alamu.
21Onaemo pu'uno, rongeomo andio, hei omue anu tepokonsii,
hei omue anu molangu, sine komba hangano anggoro!
22Kanandiomo pau Uemu,
Ue Alamu anu tumeahakono kara-karano bawaa-Do,
”Menteeano, Ku'alao inso a ngkaemu
piala saru ihino anu mompokomokolili,
ka ihino sangkiri mokulano tekuda-Ku
nahi ko'uminuo mbo'u.
23Sine, Aku meweengakono a ngkaeno anu mokonsiiko
anu hieno motae ndi omue,
’Petuundumo, ka kintelalo lumolanda komiu!’
Ka bungkumu upetunduakono merete wita,
gagi pesalaano mia anu telalo i wawono.”
Currently Selected:
Yesaya 51: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
