Yesaya 49
49
LAMORO 49–55
TETENAA-DO I UE
Tetenaa-Do i Ue gagi mewine i olodo tongku
49:1-7
1 #
Yer. 1:5
Ronge akumo, hei luwuno togo,
pekokoongakonomo, hei tongku anu me'olai!
Dopoboi akumo i Ue mompu'u inso a mpe'anakaa;
Dopauomo neeku mompu'u inso a laro kompodo ineku.
2 #
Ibr. 4:12; Meng. 1:16 Doweweuo ngangaku kana ponai montaso
ka mekaria aku a pokongkomino kae-Do.
Dopokogagi aku ana mpana anu montaso
ka wuni aku a laro ngkadu pana-Do.
3Mepau Ira ndi ongkue, ”Omuemo tetenaa-Ku, hei Isaraeli,
ka molalo omue Aku mokomengkaao maramba-Ku.”
4Sine, mepau aku, ”Me'i'isei akumo mpena,
ka mokopingkoo rosoku nahina pengkonaano ka nahina tuduno;
sine, tiaku kongko ndi Ondae i Ue
ka tamboku ndi Ondae Ue Alaku.”
5Kanandio-andio, mepau Iramo i Ue
anu weweu aku mompu'u inso a mpe'anakaa ka kugagi tetenaa-Do,
ka mokuleo i Yako ndi Ondae,
ka domepinumpu to Isaraeli ndi Ondae –
mentee ntu'u, ongkue pinelangkai a pongkita-Do i Ue,
ka ondae Ue Alaku gagi rosoku,
6 #
Yes. 42:6; Luk. 2:32; Tin. 13:47; 26:23 kanandiomo pau-Do, ”Tedeilahi lahi butu kogagi tetenaa-Ku,
tumeahako ira sukuno i Yako
ka mokule ira to Isaraeli anu mentola.
Aku weweuko
gagi mewinedo luwuno tongku
ka pongkadudui-Ku
ka ihawe koa i tompano tolino.”
7Kanandiomo pau-Do i Ue,
Anu Tedoa Mempori, Pontolosido to Isaraeli,
ndi onae anu tedoa domentatao mia,
ndi onae anu gagi mokoburudo tongku,
a atado anu mempabawa,
”Luwuno mokole ira mengkitao wineweu-Ku, ka do'amba mpentade mpelangkaio,
ka luwuno anu langkai potorono ira mpenggolontu mpesomba,
hangano Ondae i Ue anu uminio dandi-Do
hangano Anu Tedoa Mempori, Ue Alado to Isaraeli, anu binikiko.”
Sioni pinomoiko
49:8-26
8 #
2Kor. 6:2
Kanandiomo pau-Do i Ue,
”I tempono pinemoiko, Aku sumangkiko,
a oleo tekaduduia, Aku tumulungiko.
Kudagaikomo ka pakosikomo
gagi pedandia tiado luwuno mia,
wali tumeahakono tolino ka tumia-tiao
wita pusaka anu boni-boniomo,
9ka domempinauako mia anu nte'uko: Peluarakomo!
a mia anu mekongko a laro wongi-wongi: Aiwamo!
A luwuno sala tinondado mpohawe ira tonga mpada,
ka maupo a luwuno pongku londa tepatinda pada pompakambia.
10 #
Meng. 7:16-17
Ondae nahi domemokoninggo ka mokoranga;
mokula lansara ka makarano oleo nahi ta umalu ira,
hangano anu Mehohawa ira ta wawa ira
ka tumaate ira a umpeda insoano uwoi.
11Luwuno torukuno-Ku Aku mokogagio sala
ka luwuno sala langkai-Ku ta pinokomantande.
12Kitao, hinao mia hawe inso a olaiano,
hinao anu inso i utara ka inso i sumooano oleo,
ka hinao anu inso i wita Sinimi.”
13Kokora-koramo mawongko, hei langi,
kokora-koramo, hei tolino,
ka impo'undemo saru kokora-kora memawongko, hei luwuno torukuno!
Hangano Ondae i Ue tumarero ira bawaa-Do
ka mehohawa ira mia-Do anu tepokonsii.
14Sioni mepau, ”Ondae i Ue Dobinta akumo
ka Ondae Ueku Dokolupe akumo.”
15Polioke asa beine kumolupeo ana dalono
ka nahi pehohawao ana inso a mpe'anakaano?
Tewala mansa ikolupeo,
nahi Aku kumolupeko.
16Kitao, Kunggorikomo a mpele ngkae-Ku;
luwuno rere watumu kongko mpiha a laro mata-Ku.
17Mia anu mewanguko ronga me'aiwa,
sine mia anu mporongka ka mensolangiko mebintako.
18Pengkitamo ngkoraane limbu-limbu ka kitaomo,
luwudo me'aiwa mpepumpu ndi omue.
Me'empehiako Ongkue anu tuwu, kanandiomo pau-Do i Ue,
mentee ntu'u, luwudo kopake ira
ka upeweweakono gagi ramba-ramba,
kana anu wineweuno umbungkoroi beine.
19Hangano luwuno po'iangamu anu londa ka boni-boni
ka witamu anu rinongka,
mentee ntu'u, kanandio-andio ma'iso lahi tiado palilimu
ka mia anu ira menteleko ira me'olai.
20Tendeano, anamu anu potaemu tetadi
ta motae ndi omue,
”Po'ianga atuu kupema'isoo lahi,
peliahakomo, ka kupokompo'ia i tu'ai!”
21Ka u'amba motae i laro aroamu,
”Isemake anu me'anaako ira luwu andio tiaku?
Kombake mentetadi ira anaku ka bita aku,
winawa a laro pontadia ka tinadi?
Sine nana'ote andiodo, isemake anu mokolangkai ira?
Menteeano, tebinta aku asa-asaku,
sine ondae andio, inso isuake dome'aiwa?”
22Kanandiomo pau-Do Ue Ala,
”Kitao, Aku tumandeo kae-Ku gagi petondoni a luwuno tongku
ka pasa ira bandera-Ku a luwuno suku tongku.
Ira mebabao luwuno ana tamamu
ka luwuno anamu beine ira mesinampa owea.
23Luwuno mokole ira megagi puu mpete'iamu
ka kombiado megagi puu mpete'ia beine ndi omue.
Ira mpesomba ndi omue ranta rupado hawe a wita
ka ira mensile'io pampawu a ngkarumu,
Ka kotumo'orio, nine Ongkuemo Ue,
ka mia anu mensisikori Aku nahi ira mpohawe mokoko'ii.”
24Polioke pinomuru wali pinongko'ala inso a nsorodadu
ke polioke tola tinawado mia melambaha?
25Mentee ntu'u, kanandiomo pau-Do i Ue,
”Maupo tinawado sorodadu wali pinongko'ala,
ka pinomurudo mia melambaha mokotola,
hangano Ongkue isa'a anu umewaio mia anu umewaiko
ka Ongkue isa'a anu kumadudui ira anamu.
26Aku weweu ira mia anu mpokonsiiko mengkaano baudo ondaedo,
ka ira memolangu mpo'inu reado ondaedo,
kana mia molangu mo'inu anggoro wo'ohu,
ka domento'orio luwu mia hadio,
nine Ongkuemo, Ue, Puu Pongkaduduimu ka Anu Tumolosiko,
Anu Tedoa Moroso, Anu Kumaduduio i Yako.”
Currently Selected:
Yesaya 49: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
