Yesaya 48
48
Ondae i Ue mokogagio tuwua lembuiano anu wo'ohu
48:1-11
1Rongeomo pau andio, hei suku inuleno i Yako,
anu pinewuaako nee Isaraeli
anu mepu'u inso a inuleno i Yehuda,
anu mesumpa a nee-Do i Ue
ka umakuio Ue Alado to Isaraeli,
sine nahi a menteeano ntu'u ka moleo aroa.
2Mia anu tendeano mempauo koroido te'inso a Ngkota Mempori,
ka mpehonda ndi Ondae Ue Ala Isaraeli,
anu nee-Do Ueno luwuakoano,
3”Mongkona luwuno anu gagi a tempo anu telalo Kupauomo mompu'u i ndi'ipua,
Kupauomo ka Kupaleleo.
Mepobingko Aku weweuo ka luwuno atuu gagi mengkaa.
4Hangano Kuto'orio, nine omue motea aroa,
motea ulu ka me'ulu watu,
5onaemo ka Kupauakomu mompu'u i ndi'ipua,
se'eluno mongkona atuu gagi mengkaa, Kupaleleo ndi omue
ka si'upotae: Lahumoaku anu weweuo,
tinaha pina'oku ka tinaha tinawaku anu parentao.
6Luwuno atuu urongeomo, ka kitaomo.
Omiu isa'a, nahi mebeheke me'akuio?
Kupaleleakomu luwuakoano anu wo'ohu mompu'u kanandio-andio
ka luwuakoano anu tewuni anu napi uto'orio.
7Dandiopo luwuakoano atuu ipinokogagi ka komba inso mompu'u i ndi'ipua,
ka se'eluno nahi urongeo,
ka si upotae: Lano kuto'oriomo!
8Omue nahi urongeo ke ba uto'orio,
ka birimu mbo'u nahi te'ungkahi mompu'u i ndi'ipua.
Sine, Kuto'oriomo nine poweweumu tedoa mosa'o,
ka domempauo mia nine omue Puu Mpe'ewa mompu'u inso a mpe'anakaa.
9Hangano nee-Ku Ku'ontoo tekuda-Ku
ka hangano telele-Ku Kupehohawako,
onaemo ka nahi Kupokotampulako.
10Menteeano, Kupokomorinakomo, sine komba kana salaka.
Ku'arahakomumo a laro pompotuwua api marasaia.
11Aku weweuo hangano Ongkue, oo hangano Ongkue-Ku,
hangano kana'umpe ka ta kinokoburuti nee-Ku?
Nahi Aku meweengakono maramba-Ku a nsusuaano!”
Ondae i Ue tumolosio Isaraeli molalo i Koresi
48:12-22
12 #
Yes. 44:6; Meng. 1:17; 22:13 ”Ronge Akumo, hei Yako,
ka omue Isaraeli anu pinoboi-Ku!
Ongkuemo anu mengkena mpiha, Ongkuemo anu tese'elu,
Ongkue koa mbo'u anu telembui!
13Kae-Kumo anu monaakono empehino tolino,
ka kae ngkoana-Ku wileo langi.
Tempono Kupoboi ira,
luwudo pada mpe'umbaako.
14Impepumpumo luwu ka imerongeo!
Isemake i olodo pauo luwuno andio?
Ondae i Ue mehohawao;
onaemo anu weweuo po'ehe-Do i Ue a nto Babeli
ka mopokitao rosono kae-Do a nto Kasidimi.
15Ongkue, Ongkuemo anu pauo ka anu moboio mbo'u,
Ongkuemo anu moboio, ka luwuno pe'i'iseino ta mehasili.
16Perangkuhakomo ndi Ongkue, rongeomo andio:
Inso i ndi'ipua nahi Kuhori mepau rahasia
ka tempono igagi luwuno atuu kongko Aku i tu'ai.”
Kanandio-andio, Ondae Ue Ala
tumena aku a Mpenaa-Do.
17Kanandiomo pau-Do i Ue, Pontolosimu,
Anu Tedoa Mempori, Ue Alado to Isaraeli,
”Ongkuemo Ue, Ue Alamu,
anu paguruakomu hapa anu mentudu,
anu tumaateko a nsala anu asalakono kotumondao.
18Tewala upekokoongakono luwuno parenta-Ku,
rodoamu ta kana korono,
ka manangaimu ta hadio ntu'u kana bomba-bombano tahi.
19Inulemu ta kana one
ka ana'uemu ta kana one molaba hadiono;
needo nahi ta pinokotampula
ke inonini inso i aro-Ku.”
20 #
Meng. 18:4
Peluarakomo inso i Babeli, polaimo inso i Kasidimi!
Pauomo saru kokora-kora mawongko ka paleleomo mongkona andio!
Paleleomo hawe i tompano tolino!
Pauomo, ”Ondae i Ue Dotolosiomo i Yako, tetenaa-Do!”
21Ondae nahi domemarasai mokoranga,
tempono Dowawa ira lumaloo luwuno po'ianga anu londa.
Ondae moluarakoako ira uwoi inso a ntorukuno watu;
Dobansio torukuno watu, ka mombusi-mbusiomo uwoi.
22 #
Yes. 57:21
Pau-Do i Ue, ”Nahina rodoa
tiado mia mosa'o gau!”
Currently Selected:
Yesaya 48: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
