Yesaya 47
47
Tedontano Babeli
47:1-15
1 #
Yes. 13:1–14:23; Yer. 50:1–51:64 Petiimo ka pentoromo a wawo pampawu,
hei ana beine, ana beine Babeli!
Pentoromo a wita nahi saru kadera poparentaa,
hei ana beine Kasidimi!
Hangano omue nahi kopinau mbo'u
i ana beine tekosi hadio gelu.
2Alaomo watu pogili ka giliomo tarigu,
oninio soumbumu;
sungkeomo hawumu, posabaomo pa'amu,
saki iramo korono!
3Po'ineeomo ka isaba anumu
ka mokoko'iiamu tengkita!
Aku moweweu pombaloa
ka nahina pinehohawa maupo te'asa mia.
4Pontolosimami, Ondae Ueno luwuakoano nee-Do,
Anu Tedoa Mempori, Ue Alado to Isaraeli.
5Pentoromo perodo-rodo ka pewinsomo a laro wongi-wongi,
hei ana beine Kasidimi!
Hangano, omue nami kopinau mbo'u
Mokole beine a luwuno poparentaa.
6Ongkue hieno tekudaako ira bawaa-Ku,
ka mengkokoburutio tia pusaka-Ku,
ka meweengako ira a ngkaemu;
Omue nahina pompehohawamu ndi ondae,
tendeano tedoa upokomobeo tinembi
a mia anu mota'u.
7Horiko mepau, ”Ranta nahina tampulaano
aku gagi mpiha mokole beine!”
sine nahi upekokoongakono
ka nahi upewowoloo pokotampulaano luwuno atuu.
8 #
Meng. 18:7-8
Onaemo pu'uno, rongeomo andio, hei mia anu tuwu mesana-sanaa,
anu rodo mentoro,
ka motae a laro aroano,
”Butu ongkue; nahina anu susua i horiku!
Nahi aku gagi tuwu beine
ka anaku ira mekongko mpiha ndi ongkue!”
9Orua rupa andio ta umaluko
i larono asa mpiniro, a oleo anu mengkena.
Meropu ira nana'ote ka tuwu beine
ta kumonaiko tedoa marasai,
maupo hadio sihirimu
ka moroso ntu'u pobasa-basamu.
10Omue roodo a laro wineweumu anu mosa'o,
potaemu, ”Nahina anu kumita aku!”
Pandemu mompewowolo ka ponto'orimu
mokontesaako,
onaemo ka upotae a laro aroamu,
”Butu ongkue; nahina anu susua i horiku!”
11Sine, urasa'o ta umaluko,
nahi uponto'ori tumempuakono pobasa-basamu;
masolaa ta umaluko,
nahi upolio umo'ontoakono po'onto bala;
matea ta mepobingko umaluko,
nahi ukoo-kooo.
12Po'iamo mpiha saru luwuno pobasa-basamu
ka sihirimu anu hadio atuu,
anu upolempaomo mompu'u umongura;
bara'ura kome'ura,
bara'ura kopolio mompokodoito mia.
13Omue molemakomo hangano hadiono patudu!
Po'ineeomo dome'aiwa ka mengkaduduiko
mia anu memparesao luwuno siuno langi,
anu mpekokoongakono anano wula
ka a sompo sabaano wula
mempauo hapa anu ta gagi ndi omue!
14Menteeano, ondae kana seami
anu tinununo api;
ondae nahi dompokompetolahako
inso a mpabawano langano api,
komba waro api pelahoi,
komba api pominua!
15Kanatuumo ndi omue mia anu tinenamu atuudo,
anu mpebalu-balu iramo saru omue mompu'u tempo monguramu.
Ondae singge mia kobangku-bangku a luwuno pe'aroa,
nahina anu mokokaduduiko.
Currently Selected:
Yesaya 47: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
