Yesaya 46
46
Anu pesombai Babeli nahina rosono i aro-Do i Ue
46:1-13
1Anu pinesombai Bela pinokompetuunduomo, anu pinesombai Nebo pinobangku,
luwuno tinahano winawa inula a wawo kondehora, a wawo mpinotuwu,
anu hori komiu mewawao, gagiomo inula,
gagi tinembi a ngkodehora anu mokendo.
2Ondae mempinobangku ka pinokompetuundu mpohona,
nahi dompokokaduduio tinembino atuu
ka ondaedo asalakono melako gagi mia tinawa.
3”Ronge Akumo, hei suku inuleno i Yako,
hei luwuno mia anu da mentuwu inso a inuleno i Isaraeli,
hei mia anu Kutembi komiu mompu'u inso a mpe'anakaa,
hei mia anu Kusu'u komiu mompu'u inso a laro kompono inemiu.
4Hawe tempo mota'umiu mengkena Aku mpiha
ka hawe mopute wuumiu Kubaba komiu.
Kupokogagi komiumo ka mekaria komiu mpiha;
Aku tumembi komiu ka kumadudui komiu.
5Saru isemake komiu mongkenao ka mompongkenaa-Kune
saru mongkena Aku, ranta ka kipengkena?
6Mia morawo wulaa inso a ngkotikano
ka mongkati salaka mompake neraca.
Ondae mpotambo puu mpo'angga wulaa ka ipoweweu pinesombai susua inso a mparewa atuu,
ka do'amba mpesombaio, ka mpenggolontu ndi onae.
7Domentandeo a wawo owea ka domentembio,
ka do'amba menaao a mpo'iangano; onae mentade mpiha
ka nahi pokompelimba inso a mpo'iangano.
Maupo dompebooli mia ndi onae, onae nahi sangki
ka nahi kadudui ira inso a ma'isoado.
8Impewowoloomo mongkona atuu ka gagimo mokoko'ii,
penootiomo a laro aroa, hei anu mpe'ewa!
9pewowoloomo mongkona anu i ndi'ipua inso mompu'u se'eluno ntu'u,
menteeano Ongkuemo Ue Ala ka nahina anu susua,
Ongkuemo Ue Ala ka nahina anu kana Ongkue.
10Ongkuemo anu pauo inso a pompu'uano mongkona luwuakoano anu pokotompa
ka inso a tempo se'eluno ntu'u hapa anu napi pinokoweweu,
anu motae: Tinoo-Ku ta gagi,
ka luwuno po'ehe-Ku Aku weweuo.
11Ongkuemo anu mompoboi manu-manu mpongkaa bau inso i sabaano oleo,
ka mia anu weweuo sinongka-Ku inso a wita anu olai.
Kupauomo, onaemo ka Aku mokogagio,
Kusongkaomo, onaemo ka Aku weweuo.
12Ronge Akumo hei mia anu mpompelangka-langkai,
mia anu me'olai inso a moleoa:
13Moleo-Ku nami olai mbo'u, hangano Kupoko'umpedaomo
ka tolaa anu Kupeweengakono nahi tepotulu mbo'u;
Aku mompowee pongkadudui i Sioni
ka maramba-Ku ndi Isaraeli.”
Currently Selected:
Yesaya 46: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
