Yesaya 2
2
Pongku Sioni, pu'uno manangaiado tongku
2:1-5
1Pau anu tinarimano i Yesaya anano i Amosi a laro pongkita mongkona Yehuda ka Yerusale.
2 #
Mik. 4:1-3
Ta gagi a oleo pokotampulaano:
torukuno po'iangano raha-Do i Ue
ta mentade lumaloio punsuno luwuno torukuno
ka kontasi-tasi i wawono luwuno pongku;
luwuno tongku ta hadio ntu'u melako i ra'ai,
3ka hadio sukuno tongku ira melako saru mpotae,
”Aiwa, tompewuatako a ntorukuno-Do i Ue,
a raha-Do Ue Alano i Yako,
ka Dopaguruakita luwuno pesalaa-Do,
ka tompesala a mpesalaa-Do;
hangano inso i Sioni ta saba pompaguru
ka pau-Do i Ue inso i Yerusale.”
4 #
Yoe. 3:10
Ira bitarao luwuno tongku
ka putusio kara-karano hadio sukuno tongku.
Ira melabuo luwuno ponaido gagi mata mpadeko
ka kansaido gagi piso ponsewo;
tongku nahi ira mpontande mbo'u ponai mo'ewai tongku susua,
nahi ira mpepaguru mbo'u mpetea.
5Hei, suku inuleno i Yako,
aiwa tompelempa
a laro mewine-Do i Ue!
Ondae i Ue umewaio tongku anu mompelangka-langkai
2:6-22
6Mentee ntu'u, itadi iramo ntu'u bawaa-Miu,
inuleno i Yako,
hangano witado bukeako anu mpompau nahi manasa ta gagi inso i sabaano oleo
ka sihiri kana a nto Pelisiti, ondae mpesangkalima saru mia mehawe.
7Witano buke wulaa ka salaka,
nahi tetidahi arataano;
witano buke ngara,
nahi tetidahi hadiono karetano.
8Witano buke lahumoa;
ondae mpenggolontu mpesomba a wineweuno kaedo ondaedo
a wineweuno wunga ngkaedo.
9Mia pinokompetuundu,
mia pine'uru-uru
siimo tandeo hala tembiado!
10 #
2Tes. 1:9; Meng. 6:15 Polaimo a ntorukuno watu,
pewunimo a laro aano wita
inso a mongkokongiri-Do i Ue
ka mewantano maramba-Do!
11Mia anu mengkita saru mompelangka-langkai ta pine'uru-uru,
mia anu mompelangka-langkai ta pinokompetuundu;
butu koa Ondae i Ue anu tedoa mantande
a oleo atuu.
12Hangano Ondae Ueno luwuakoano pakosio asa oleo
umewaio luwuno anu mompelangka-langkai
umewaio anu tumandeo koroino; – luwuno ta pine'uru-uru –
13umewaio luwuno keu arasi i Libano
anu kontasi-tasi ondau ka moleo,
umewaio luwuno keu tarabanti i Basani;
14umewaio luwuno torukuno anu ondau,
ka luwuno pongku anu kontasi-tasi;
15umewaio luwuno menara anu ondau
ka luwuno rere watu anu moroso;
16umewaio luwuno kapala Tarasisi
ka luwuno kapala anu tedoa tekosi.
17Mia anu mompelangka-langkai ta pinokompetuundu,
mia anu mompelangka-langkai ta pine'uru-uru;
butu koa Ondae i Ue anu tedoa mantande
a oleo atuu.
18Luwuno lahumoa ta tampula luwu.
19Ka mia ira mpewinso a laro ngkunepo a ntorukuno watu
ka a laro aano wita
hangano mongkokongiri-Do i Ue
ka mewantano maramba-Do,
i tempono Dopentade mokodoitoo tolino.
20A oleo atuu lahomoa salaka ka lahumoa wulaa
anu wineweu ta pinesombai
ira mpetadiakono mia a ntehu ka poneki,
21ka ipokompewinso a laro olo-olono torukuno watu
ka a laro pelengkuano pongku watu
hangano mongkokongiri-Do i Ue
ka mewantano maramba-Do,
i tempo Dopentade mokodoitoo tolino.
22Penaa-naamo pomperorohi a mia,
anu butu hinao penaa a engeno;
hapa tuduno momperorohi ndi onae?
Currently Selected:
Yesaya 2: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
