Yesaya 3
3
Potuntu-Do i Ue a luwuno petewawa
3:1-15
1Menteeano, Ondae i Ue, Ueno luwuakoano,
Ira tumadio inso i Yerusale ka inso i Yehuda
tuko ka pontumbo,
luwuno pepatinda kaanga ka inua;
2puu mpetea ka sorodadu,
puu mpobitara ka nabi,
anu mompau nahi manasa ta gagi ka mia memota'u,
3petewawa sorodadu ka mia pinelangkai,
puu pompatudu, puu mpebali-bali mata ka anu pande sihiri.
4Aku mokogagi ira ana ntama kontuwuado gagi petewawa;
ira mpoparenta montonda po'eheno aroado.
5Palili ira mambepokonsii,
asa mia ka anu susuano;
mia mongura mompepaukiako mia mota'u,
mia pinokongkodei mompepaukiako mia maramba.
6Mia ta dumadaio pe'etuno amano ka motae,
”Omue da hinao lemba meloemu, gagimo petewawamami,
anu tekale-kale kamimo andio i totono pabawamu!”
7Sine i tempo atuu pe'etuno ta sumangki,
”Nahi kubehe gagi sando; a rahaku nahina kaanga ke maupo lemba meloe;
si potoro aku gagi petewawa tongku.”
8Mentee ntu'u, Yerusale tetiduomo ntu'u
ka Yehuda tekale-kaleomo;
hangano pau ka wineweudo ndi Ondae i Ue,
umewaio maramba-Do.
9Wineweu mpobibiniki tumuntu ira ondaedo
ka kana Sodomo, domempopauo halado,
nahina mbo'u anu winuni.
Memasola iramo ntu'u mia atuudo!
Hangano mpoweweu iramo masolaano koroido ondaedo.
10Pauako iramo mia mentee, moiko ntu'u teweweudo a lembuiano,
hangano ira mpongkaa hasilino inanggado.
11 #
Pow. 12:14
Masola ntu'u mia mosa'o gauno! Masolaa ta umaluo,
wineweuno kaeno ta sinuloako ndi onae.
12Bawaa-Ku! Nana'ote mpokonsii ira,
beine meparenta ira.
Hei bawaa-Ku, luwuno petewawa mpompokontesaa,
sala anu tinondamiu dompokopansiao!
13Ondae i Ue mo'ala po'ianga Ira motuntu
ka mentade Ira bitarao luwuno tongku.
14Ondae i Ue mentade gagi puu mpobitara
a mia memota'u ka luwuno petewawa bawaa-Do,
”Omiumo anu mengkaano ka ipingko lere anggoro atuu,
parewa merinontu inso a mia tepokonsii tehowu a laro rahamiu.
15Hapa pabawamiu bobarasai ira bawaa-Ku
ka umisao ka imotutu rupado mia tepokonsii?”
Kanandiomo pau-Do Ue Alano luwuakoano.
Pohuku-Do i Ue a beine mpompelangka-langkai
3:16–4:1
16Ondae i Ue mepau:
Beine Sioni gagi iramo mpompelangka-langkai
ka mpelempa saru we'u anu pinokomoleo
saru mpemae mata,
ondae mpelempa mpepe'unde
ka uni kekele a ngkarudo.
17Onaemo pu'uno, Ondae i Ue Ira weweuo
uludo beine Sioni buke kumbi
ka Ira mosabao i Ue
anu wela winunido.
18A oleo atuu Ondae i Ue Ira tumadio luwuno peramba-rambado: mala-mala karu, ramba-ramba ulu anu pinotako a ra'i ka ramba-ramba rada; 19tole-tole, mala-mala kae ka pesoumbu; 20ramba-ramba ulu, mala-mala tokia, peboo ntonga, ponaapa mina-mina ka tino'ori; 21sinsi pontondoni ka sinsi enge; 22sangka a mpogawea, lemba meloe, salenda ka dompe; 23tami, lemba lena, peboo ulu ka sangka i bungkuno.
24Winoo mana moboo gagi euno rampa mana mo'ahi,
asa koloro gagi euno peboo ntonga,
ulu anu londa gagi euno ramba-rambano wuu,
asa lewe sawu po'inombo gagi euno sangka mare'e;
ka tondonino mokoko'iia gagi euno tekosino.
25Mia ntamamiu ira memateako ponai,
ka luwuno puu mpeteamiu memate a mpeteaa.
26Luwuno pewowa langkaino Sioni ira mperaali ka mpo'inombo,
kotano kana beine anu bininta asa-asano tepontoro a wita.
Currently Selected:
Yesaya 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
