Hosea 9
9
Isaraeli ta tinadi inso a wita-Do i Ue
9:1-9
1Siimo impo'unde, hei Isaraeli!
Siimo impeboo-booli kana luwuno tongku!
Hangano monsosabokomo binta Ira Ue Alamu,
ukekewoio tambo mpebelesu a sompo ponsesaa gandu.
2Ponsesaa gandu ka pomporo'ia anggoro nahi ta moweeako ira kaanga;
anggoro nahi ta mokonte'osa ira.
3Nahi ira mpo'ia mpiha i wita-Do i Ue.
I Eparai asalakono mekule i Masiri,
ka i Asuri ira mpongkaa kaanga mokoburu.
4Nahi ira mpotawa anggoro gagi pesomba ndi Ondae i Ue
ka pesomba sinumbeledo nahi ta mokonsanaao aroado.
Rotido kana roti pompemasusa,
sompo mia anu kumaano ta gagi mokoburu,
hangano rotido butu tiado ondaedo,
nahi moiko iwinawa a laro raha-Do i Ue.
5Hapake anu komiu mingki mpoweweu i tempono tepotowoa langkai,
ka ia oleo langkai-Do i Ue?
6Hangano moiko koa dompeliahako inso a mporopua,
sine Masiri ta pumpu ira, Mepisi ta kumaburu ira.
Rui ta tumutuwio luwuno sangka salakado anu masuli olino;
ewo rui ta tuwu a laro luwuno kemado.
7 #
Luk. 21:22
Haweomo luwuno oleo pohukua,
haweomo luwuno oleo pombaloa,
asalakono ka ito'oriomo Isaraeli,
”Nabi onaemo mia benge-benge,
mia anu bukeako penaa onaemo mia mekombe!”
Tendeano hangano langkaino salamu
ka lansarano pe'iwalimu.
8I Eparai, bawaa-Do Ue Alaku, kontongaano mompadaso nabi,
oho porako manu-manu hinao a asa ngkeu salano,
pe'iwalia hinao a raha-Do Ue Alano.
9 #
Mpo. 19:1-30
Tedoa ondalo domepansia
kana a luwuno oleo Gibea;
Ira mototoio salado
ka ta hinuku halado.
Pohukua anu mompokomate a nto Isaraeli
9:10-17
10 #
Pod. 25:1-5
Kana wua anggoro i pada one
i Isaraeli Kuhaweo i ndi'ipua;
kana wua amba-ambano, hasilino amba-ambano wua ara,
Kukitao uempu'umu.
Sine melako ira ndi Baala-Peori
ka mpesombaakono koroido a lahumoa anu mompokoko'ii.
Megagi ira mokoburu kana hapa anu kinekewoido.
11Marambano i Eparai menee kana manu-manu:
nahina anu me'ana, anu mentia, ke maupo anu mo'ia koroino!
12Maupo dompokolangkai ira anado,
Aku weweu ira ka dontetadi luwu anado.
Mentee ntu'u, memasola iramo
i tempono Ku'olai inso ndi ondae!
13I Eparai, kana anu kinita-Ku, iweweu iramo anano gagi kondehora wembaa;
i Eparai ta meweengako ira anano a puu pompepatedo.
14Weeako iramo, oo Ue!
Hapa anu Komiu weeako ira?
Wee'ako iramo pe'anakaa anu te'onini
ka uo anu motu'i.
15Luwuno wineweudo mosa'o gagi i Giliga,
mentee ntu'u, maupo i ra'ai Ku'o'aliaako ira.
Hangano mosa'ono luwuno wineweudo,
Aku sumaari ira inso i raha-Ku.
Nahi Aku mehohawa ira mbo'u;
luwuno mia pinemota'udo onaemo puu mpe'ewa.
16I Eparai sinepiomo,
hakano motu'iomo,
nahi ira mpehasiliako wua.
Maupo dompe'ana,
Aku mepateo pe'anakaano anu mentudu.
17Ondae Ue Alaku ta tumadi ira,
hangano nahi domperorongeako Ira,
ira mpelakopi i olodo luwuno tongku.
Currently Selected:
Hosea 9: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
