Hosea 8
8
Isaraeli morawo angi, sumowi lompiu
8:1-14
1Puuriomo tawuwua!
Tepatinda kana rajawali a wawo raha-Do i Ue!
Hangano domelinggeiomo pedandia-Ku
ka me'ewaio pompaguru-Ku.
2Ndi Ongkue dompeboo-booli,
”Oo Ue Alaku, omami, to Isaraeli tumo'ori Komiu!”
3To Isaraeli nahi tarimao anu moiko;
po'ineeomo ka iluluo iwali!
4Mpopotoro iramo mokole, sine nahi dompesikeno ndi Ongkue;
mpopotoro ira mia pinemota'u, sine nahi Kuto'orio.
Inso a wulaa ka salaka domeweweuo
luwuno lahumoa tiado ondaedo,
ranta ka domempinokotampula.
5Nahi Kutarimao ana sapimu, hei Samaria;
tekuda-Ku tensila ndi ondae!
Hawe te'opia tehineno ondae nahi pinokomempori?
6Menteeano lahumoa atuu inso a nto Isaraeli, wineweuno puu mpo'angga,
ka onae komba Ondae Ue Ala!
Mentee ntu'u, ta gagi sibano
ana nsapi Samaria atuu!
7Hangano ondae mporawo angi,
ira mponsowi lompiu.
Gandu anu mentonggi nahina ndi ondae;
luwuno punopaho nahi pehasiliako tarigu;
ka tewala mompowee hasili,
mia hawe tumeleo.
8Isaraeli tineleomo;
kanandio-andio mekongko ira i olodo luwuno tongku
kana bolusa anu nahi mentudu.
9Hangano ondae melako iramo i Asuri,
kana kalide ntobu anu teponsia asa-asano;
i Eparai montia-tiaomo pompowee pompehohawa.
10Maupo dompontia-tia pompowee atuu i olodo luwuno tongku,
kanandio-andio Aku pumpu ira,
ranta nami tehine mbo'u ira mpopu'u
mentembio tembia inso a mokole ka luwuno anu pabawa.
11Mentee ntu'u, i Eparai mompokohadioomo meda pontunua pesomba poweweuano hala;
luwuno meda pontunua pesomba atuu pompu'uano dompoweweu hala.
12Maupo Kuburiakono hadio pompaguru-Ku,
luwuno atuu domerekeo kana aasa anu susua.
13Mpompowee ira ndi Ongkue luwuno pesomba sinumbele;
mpopesombaako ira bau ka domengkaano;
sine nahi Dopemoiko ira i Ue.
Kanandio-andio Dopototoio salado
ka humukuo halado.
Ondae asalakono mpekule i Masiri!
14I Isaraeli kumolupeo anu mokogagio
ka montadeo luwuno langkanae;
i Yehuda mokohadioo kota mebente;
sine Aku mompotola api i larono luwuno kotado,
ka i'amba luwuno bente ka langkanaedo ta kumaano.
Currently Selected:
Hosea 8: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
