Hosea 10
10
Pohukua a Mpesombaa Ana Nsapi Beti-Aweni
10:1-8
1Isaraeli onaemo keu anggoro anu tuwu mewalo,
anu mehasiliako wua.
Kohadi-hadiono wuano,
kohadi-hadiono meda pontunua pesomba wineweuno.
Komoi-moikono witano,
komoi-moikono wineweuno luwuno tugu lahumoa.
2Aroado pande mpe'akala,
kanandio-andio asalakono domentembio poko'ariano.
Luwuno meda pontunua pesombado Ira rumawoo,
luwuno tugu lahumoado Ira humoao.
3Mentee ntu'u, kanandio-andio mpotae ira,
”Nahina mbo'u mokoleto,
hangano nahi tomedoitoako Ira i Ue.
Hapa anu ta mokoweweuakita mokole?”
4Kopau-pau ira, mpesumpa nahi mentee
mpoweweu pedandia;
songka montonda po'ehedo kana pinopaho merasu
a banga-bangano lere.
5Palilino Samaria mpondidi-ndidi,
medanggaraakono ana nsapi Beti-Aweni.
Mentee ntu'u, palilino ira mpompemasusaakono,
ka luwuno sando mpesombano ira mensabangio,
hangano marambano meliahakoomo inso ndi onae.
6Ana nsapi atuu ta winawa i Asuri
gagi pesomba ndi Mokole Mosia.
Eparai ta pinokoko'ii,
Isaraeli ta montembi mokoko'iia hangano tinoono.
7Samaria ta rinawo-rawo;
mokoleno kana asa mpole sampa anu lonto a uwoi.
8 #
Luk. 23:30; Meng. 6:16 Luwuno po'ianga pesombaa ndi Aweni, anu gagi halano Isaraeli,
ta pinokotampula.
Ewo rui ka rui ta tuwu
a wawo luwuno meda pontunua pesombano.
Ira mpotae a luwuno torukuno, ”Howui kamimo!”
Ka a luwuno pongku wita, ”Tehoamo dumunsi kami!”
Wineweuno mosa'o i Eparai mohawe terawo-rawo
10:9-15
9 #
Mpo. 19:1-30
Mompu'u luwuno oleo Gibea tehalakomo, hei Isaraeli;
i ra'ai kongkodo mpe'ewa.
Kombake metea mo'ewai mia molengku
ta humawe ira mbo'u i Gibea?
10Montonda po'ehe-Ku Aku sumepi ira.
Luwuno tongku ira mpepumpu umewai ira,
tempono domensinepi hangano hadiono salado.
11I Eparai i ndi'ipua asa ana nsapi anu tepaguru,
anu ineheno monsesa,
palasano anu tekosi
Kupo'ineeo, sine kanandio-andio, i Eparai Kutenao mo'angga;
i Yehuda asalakono mompadeko,
i Yako asalakono mongkambu wita tiano onaeno.
12 #
Yer. 4:3
Porawomo menunu saru moleoa,
sowiomo tiamu montonda petenunu mompehohawa!
Anggaomo tiamu wita wo'ohu;
temponomo umungke Ira i Ue,
ranta ka Dohawe ka umusaiakomiu moleoa.
13Mpopadeko komiumo mosa'oa,
mponsowi molengkua,
mpongkaa wua mpegaupia.
Hangano omue merorohio salamu omuemu,
ka hadiono po'osaiamu,
14ka marisuako peteaa ta me'umbaako i olono tongkumu,
ka luwuno bentemu ta rinawo-rawo
kana i Salamani rumawo-rawoo Beti-Arabeli
a oleo peteaa,
tempono luwuno ine saru nana'ote pinerego.
15Kanandiomo ta wineweu ndi omue,
hei Beteli,
hangano mongkokongirino lambahamu.
I tempono umpeda meene mokole Isaraeli ta pinokotampula.
Currently Selected:
Hosea 10: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
