Hosea 7
7
1Tewala Kupokotompao Isaraeli,
te'ungkahiomo salano i Eparai
ka luwuno mosa'ono Samaria,
hangano mpoweweu ira pompopo'oo;
mia monako merumpa mewinso,
gerombola mporontu i bungkuno.
2Nahi dompokompewowoloo i laro aroado,
nine Kupewowoloo luwuno wineweudo anu mosa'o.
Maupo kanandio-andio luwuno wineweudo kumadu ira,
luwuno kongko i aro-Ku.
Marisuno a poparentaa i Isaraeli nahi Dokongkomi Ira i Ue
7:3-16
3Aroano mokole dompokosanaakono wineweudo mosa'o,
ka pegaupido a luwuno mia pinemota'u.
4Luwudo puu mponsosabo,
kana awu pompotuwua api anu kolanga-langa,
tempono puu mpoweweu roti menaa-naa mokolangkaio apino,
kontongaano ipisio sinalono ranta ka ite'iliako ragi.
5A mpogaweado mokole, ontae mia pinemota'u pinokomokolili ulu,
molanguako anggoro;
onae tepo'asaako ira puu mpopasinggiri.
6Laro aroado kana pompotuwua api,
aroado tensila,
larono asa wongi tekudado roodo,
tempono mo'oru tensila mbo'u kana api anu mesila'e.
7Luwudo kana mokulano awu pompotuwua api,
ka kumaa ira puu mpobitarado.
Luwuno mokoledo memate iramo;
nahina maupo te'asa mia inso ndi ondae mebooli ndi Ongkue.
8I Eparai tepo'iaomo i olodo luwuno tongku,
i Eparai gagiomo roti anu motaha asambali.
9Mia hawe kumaano ka ipingko rosono,
sine onaeno nahi to'orio;
uwano mbo'u hadioomo,
sine onaeno nahi pokonto'orio.
10Pompelangka-langkaino i Isaraeli gagi sakosii a ngkoroino,
sine nahi dompepokule ndi Ondae i Ue, Ue Alado,
ka nahi dome'ungke Ira maupo luwuno atuu.
11I Eparai gagiomo kana marapatii anu momperorongeako, nahi pompewowolo; a nto Masiri dompebooli,
a nto Asuri domelako.
12Tewala melako ira, Aku padindio buani-Ku i wawodo;
Aku motii ira kana manu-manu i laro meene,
Aku sumepi ira tempono Kurongeo dompepumpu.
13Masola iramo, hangano mpolai ira inso ndi Ongkue!
Masola iramo, hangano dome'ewai Aku!
Behe Aku tumolosi ira,
sine mpegaupi ira ndi Ongkue.
14Nahi dompebooli ndi Ongkue inso i aroado,
tendeano mperaaliki a mpepomboleado.
Domensosorekio koroido hangano gandu ka anggoro,
ka dome'ewai Aku.
15Maupo Kupaguru iramo ka mokorosoako ira tokiado,
mpotoo ira mpoweweu mosa'o ndi Ongkue.
16Mpepokule ira sine komba ndi Ondae Anu i Wawono,
ondae kana pana anu teposule pe'aroano;
luwuno mia pinemota'udo ira memateako ponai,
hangano elodo bukeako pontotonaa.
Onaemo pasinggiri ndi ondae
i wita Masiri te'ipua.
Currently Selected:
Hosea 7: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
