Hosea 5
5
Pompokodoito a nto Isaraeli ka luwuno petewawano
5:1-7
1Rongeomo andio, hei luwuno sando mpesomba, pekokoongakonomo hei to Isaraeli,
ka ta'oomo biri, hei somborino mokole!
Hangano tiamiumo pohuku atuu,
hangano megagi komiumo dampa ndi Misipa,
ka buani anu tinende i wawo ntorukuno Tabori,
2ka bolo anu kineke i lembono Sitimi,
Aku sumepi ira luwu.
3Kuto'orio i Eparai,
ka Isaraeli nahi tewuni ndi Ongkue,
hangano monsosabokomo, hei Eparai;
ka Isaraeli iweweuomo koroino mokoburu.
4Luwuno wineweudo nahi pototono
dompepokule ndi Ondae Ue Alado,
hangano aroa ponsosaboa kongko a laro ngkoroido,
ka nahi domento'ori Ira i Ue.
5Pompelangka-langkaido tongku Isaraeli gagi sakosii a ngkoroino onaeno;
i Eparai ta tebangku tetiduako salano onaeno,
i Yehuda mbo'u meronga ondae.
6Saru asa bawaa bembe bimba ka sapi pesomba,
domelako umungke Ira i Ue,
sine nahi dohawe Ira;
Dobinta iramo.
7Nahi dompetenunu ndi Ondae i Ue,
hangano dompe'anaako iramo ana anu komba anado ntu'u;
kanandio-andio ondae ka leredo ta rinawo-rawo a mporame-ramea wula wo'ohu.
Nahina tuduno i Isaraeli mo'ungke pepetulungia
5:8-14
8Puuriomo tawuwua i Gibeoni,
ka napiri i Rama.
Peboolimo i Beti-Aweni,
”Petangkoromo, i bungkumu hei Benami!”
9Eparai ta gagi wita londa
a oleo pohukua.
Mongkona luwuno suku Isaraeli,
Kupauo hapa anu manasa.
10Luwuno mia pinemota'u i Yehuda
kana mia anu mompahe tida;
ndi ondae Aku umuwuo
tekuda-Ku kana uwoi.
11I Eparai tepokonsii, pinuro-puroako pohuku,
hangano onae mekorahako melempa tumondao lahumoa nahina pengkonaano.
12Aku gagi kana ule-ule ndi Eparai
ka wingo a nsuku Yehuda.
13Mansano kumitao i Eparai hakino,
ka i Yehuda kumitao moboono,
lumakoomo i Eparai a nto Asuri
ka montena mia lumako ndi Mokole Mosia.
Sine maupo onae nahi polio mokotompa komiu
ka umoninio moboo atuu inso ndi omue.
14Hangano Ongkue andio kana singa ndi Eparai
ka singa mongura a nsuku Yehuda.
Ongkue, Ongkue-Ku anu momperangkami, umarino atuu lumako,
Aku molaisakono ka nahina anu motolao.
Tepidino i Isaraeli anu asa mpiniro koa
5:15–6:6
15Aku lumako, mekule a mpo'ianga-Ku,
ranta ka domemangaku saala ka umungkeo rupa-Ku.
A laro masukaraado ira mengkekewoi Aku:
Currently Selected:
Hosea 5: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
