Hosea 4
4
Pongkuahako a nsando mpesomba ka tongku anu umewa
4:1-19
1Rongeomo pau-Do i Ue, hei Isaraeli,
hangano Ondae i Ue hinao kara-kara saru palilino wita andio,
hangano nahina petenunu, nahina pompehohawa,
ka nahina ponto'ori mongkona Ondae Ue Ala i wita andio;
2butu montotonaa, megaupi, mompepate, monako,
monsosabo, mobobarasai ka po'uwua rea tinondaako mbo'u po'uwua rea.
3Onaemo pu'uno wita andio ira pompemasusa,
luwuno palilino ta me'i'isei;
luwuno kondehora i tongampada ka manu-manu i laro meene,
maupo luwuno bou a ntahi mbo'u ta tepumpu mate.
4Sine, si hina mia motuntu,
kasihina mia mekara-kara,
hangano tongkumu gagi tumuntuko, hei sando mpesomba!
5Omue kotebangku tetidu tempono meene
ka nabi ta tetidu mbo'u merongaakomu i tempono wongi;
inemu mbo'u Aku mepateo.
6Bawaa-Ku memasola hangano nahi doto'ori Ira Ue Ala;
hangano nahi utarimao ponto'oria atuu,
Ongkue mbo'u nahi Aku tumarimako gagi sando mpesomba-Ku.
Hangano ukolupeo pompaguru-Do Ue Alamu,
Ongkue mbo'u Aku kumolupe ira anamu.
7Kohadi-hadiodo, koteha-tehalado ndi Ongkue,
marambado Aku umeuakono pontataa.
8Ondae mpongkaa inso a halado bawaa-Ku,
po'eheno aroado te'aro a mpe'ewado bawaa-Ku.
9Kana anu gagi a mpalili, kanandio koa mbo'u a nsando mpesomba:
Aku humukuo hangano luwuno pomputusino
ka luwuno wineweuno Aku sumuloakono.
10Ira mpongkaa, sine nahi ira memowohi,
ira mpebelesu, sine nahi ira ntetiangi,
hangano dobinta Iramo i Ue ka domentuwu a laro mpebelesua.
11Anggoro ka uwoi anggoro
mokontetadio pinewowolo mentee.
12Bawaa-Ku mpesikeno a ngkeuno,
ka tukono moweeakono sangkino,
hangano penaa ponsosaboa mokopansia ira,
ka ondae mponsosabo binta Ira Ue Alado.
13Ondae mpopesombaako pesomba i punsuno luwuno torukuno
ka mpontunu pesomba i wawono pongku-pongku wita,
a ntoto ngkeu tarabanti ka keu hawari ka keu langkai susuano,
hangano inengoino mompokonsanaa.
Onaemo pu'uno luwuno anamu beine mponsosabo
ka luwuno kombiado ana ntamamu mpebelesu.
14Nahi Aku humuku ira anamu beine
maupo domponsosabo,
ke luwuno kombiado ana ntamamu,
maupo dompebelesu.
Sine, tamado isa'a melako mpe'asaako ira beine mebelesu
ka mompesombaako pesomba meronga luwuno mia mebelesu a raha pesombaa susua.
Bawaa anu nahina ponto'orino ta tedonta.
15Tewala mansako monsosabo, hei Isaraeli,
siimo Yehuda tetonda saala!
Siimo lako i Giliga;
siimo pewuatako i Beti-Aweni,
ka siimo pesumpa, ”A nee-Do i Ue anu tuwu!”
16Hangano Isaraeli umewa kana sapi anu umewa,
kana'umpe ta gagi Dopakambi Ira i Ue kanandio-andio,
kana bimba a ntanalapa?
17I Eparai tepo'asaako ira lahumoa,
po'ineeomo koa onae!
18Mansado memolangu, mpepotende ira mpebelesu;
domengkekewoio pontataa sekonopo mohawe pompelangkai.
19Angi tumutuwi ira a laro mpanido,
ka ira mempinokoko'ii hangano luwuno pesombado.
Currently Selected:
Hosea 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
