Habaku 2
2
Mia anu mentee ta tuwu hangano pompe'ala-ala
2:1-5
1Aku mentade a mpodagaia ka mekorahako a menara; Aku sumikorio ka kukitao hapa anu Ira pauo ndi ongkue, ka hapa sangki-Do a mpo'emaku. 2Ka Do'amba i Ue sumangki aku, pau-Do, ”Buriomo pongkita andio ka nggoriomo atuu a lempe-lempeno watu, ka dompokobasao mia ntelalo. 3#Ibr. 10:37 Hangano pongkita atuu da monsikori tempono, sine ta ronga te'aro a mpoko'ariano, ka komba pompopo'oo. Maupo nahi ronga hawe, sikoriomo, hangano mongkona atuu manasa ta hawe ka nahi ta tepotulu. 4#Rom. 1:17; Gal. 3:11; Ibr. 10:38 Menteeano, mia anu mompelang-langkai nahi moleo aroano, sine mia anu mentee ta tuwu hangano pompe'ala-ala. 5Mentee ntu'u pompoli atuu mompopo'oo; mia anu mopelangka-langkai nahi ta momperodo. Onae wileo ngangano kana po'iangado mia mate nahi hori mowohi kana matea. Luwuno tongku ipumpuo ka luwuno tongku ipo'asao.”
Pohuku a mia mompokonsii
2:6-20
6Kombake ondae luwu ira mpopau potundaano pau ndi onae saru penani pasinggiri andio: Masolaomo ntu'u mia anu mohowu tiano koroino hapa anu komba pine'ueno! Hawe te'ipia mbo'uke upopumpu arataa? Kanatuu koa mbo'u mia anu humowuiakono koroino sangka ginade. 7Kombake nahi kinookoo ira mehawe puu mposinga pasuamu, ka ira ntelike anu mpodengkeko, ka omue domerontuko? 8Hadioomo tongku pinomurumu, ranta luwuno tongku anu toreano ira mempomuruko hangano reano mia anu te'uwu atuu ka pobobarasaia a wita, kota saru luwuno palilino. 9Masola ntu'u mia mo'ala ura anu nahi moleo pesalaano ta pakeano i rahano, ta numaao senono a mpo'ianga anu mantande, ka itola inso a masolaa! 10Omue mosongkaakonomo tataano rahamu tempono upingko ira tongku ka hangano kanandio sumolangio koroimu omuemu. 11Hangano watu mebooli inso a rere, ka sobo sumangkio inso a rangkano raha. 12Masola ntu'u mia anu mowangu kota a wawo rea ka mokorosoakono wineweu nahi moleo. 13Menteeano, kombake inso ndi Ondae Ueno luwuakoano nine luwuno tongku mpe'o'osu ntu'u tiano api ka luwuno tongku mpe'iseiako anu nahina pengkonaano? 14#Yes. 11:9Hangano tolino ta bukeako ponto'ori mongkona maramba-Do i Ue, kana uwoi tumutuwio tahi molue. 15Masola ntu'u mia anu moweeakono pe'asa miano mo'inu sinaloako tekuda, tendeano mokomolangu ira ka ipokokitao pomaliano. 16Omue komowohiako pongkoko'iia, komba marambaa. Omue po'inumo mbo'u ranta ka upobangku-bangku. Ndi omuemo ta melimba piala inso a ngkae koana-Do i Ue, ka pongkoko'ii ta tumutuwio marambamu. 17Pobobarasaia i Libano ta umaluko ka mateno luwuno kondehora ta mokompondendeko, hangano reano mia anu te'uwu atuu ka hangano pobobarasaia a wita, kota ka luwuno palilino atuu. 18Hapa tuduno tinaha pesomba pina'o, pina'ono anu weweuo? Hapa tuduno tinaha pesomba tinawa, anu mompaguru pegaupi atuu? Hangano anu weweuo me'ala-alao wineweuno, ka hinaano luwuno lahumoa wineweuno atuu beebe nahi dompepau.
19Masola ntu'u mia anu mepau a ngkeu asa mpole, ”Pelikemo!” ka a asa watu beebe nahi pepau, ”Pewangumo!” Kana'umpe ka ipokompopaguru? Lano onae mewaluako wulaa ka salaka, sine nahina ntu'u penaa i larono.
20Sine Ondae i Ue kongko Ira i laro raha-Do anu mempori. Imerodomo mpo'ia i aro-Do, oo luwuno tolino!
Currently Selected:
Habaku 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
