Habaku 1
1
Puu mpau
1:1
1Pau-Do Ue Ala a laro pongkitano nabi Habaku.
Kabaratano nabi mongkona nahina moleoa
1:2-4
2Opiapo mbo'u tempono, oo Ue, kupebooli, sine nahi Irongeo; mebooli aku ndi Omiu, ”Pobobarasaia!” sine nahi Itulungi aku? 3Tembio ka Ipopokitaakune mosa'oa, ranta ka kukitao pobobarasaia? Oo, pobobarasaia ndio i aroku; pengengea ka teposisalaa kogagi-gagino. 4Onaemo pu'uno songka nami tinudu ka moleoa nahi tineahako, hangano mia anu nahi perio Ira i Ue kumadu ira mia mentee. Onaemo pu'uno moleoa pinoposule-sule.
Sangki-Do i Ue: pohuku molalo to Kasidimi
1:5-11
5 #
Tin. 13:41
Kitaomo i olono luwuno tongku ka pekokoongakono, kohali-halimo ka kokodohomo, hangano hadio Aku weweuo i tempomu anu tewala tinutulu nahi komiu mpe'ala-alao. 6#2Mok. 24:2Hangano menteeano, Aku montade ira to Kasidimi, tongku anu lambaha ka ineheno matea atuu, anu sumompoo luwuno siuno tolino ta mompentoroki po'ianga, anu komba ondae ueno. 7Tongku atuu mongkokongiri ka mongkokodoito. Ondaemo anu mpoputusi moleoa ka pelangkaino needo. 8Ngarado magasiopo sekono santiwali, ka memasii irapo sekono serigala i tempono wongi. Sorodadudo anu mpengara mpokopa-kopa; sorodadudo anu mpengara me'aiwa inso i olaiano, mpenee kana singko anu montiu kaanga. 9Luwudo me'aiwa mpobobarasai. Ponsapoido sorodadu i arono kana angi i sabaano oleo, ka domepumpu ira tinawa kana hadiono one. 10Luwuno mokole domempasinggiri ira ka luwuno anu mempabawa gagi pengingisiado. Ipengingisiio sompo kota pekorahakoa, moweweu howuno wita ka ipongko'alao. 11Ka do'amba mpopalari kana angi ka mpotilalo mpiha. Ondae mensala hangano mpelahumoaako rosodo.
Isuake moleo-Do i Ue?
1:12-17
12Kombake mompu'u i ndi'ipua Omiu Ue, Ue Alaku anu tedoa mempori? Nahi kami memate. Oo Ue, ondae Ipakosi iramo ka dompohuku. Oo Torukuno Watu Ipakosi iramo ka domposepi. 13Mata-Miu tedoa mempori mongkita mosa'oa ka nahi behe mongkita pobobarasaia. Tembio ka Ibutu kumita ira mia anu mompokoko'ii atuu ka menoro-noro tempono mia melambaha tumeleo mia anu mentee sekono onae? 14Tembio ka Iweweuo mia kana bou a ntahi, kana luwuno kondehora anu melele anu nahina poparentano? 15Luwuno atuu padiiako ira luwu pomeka i wawono, irakoako ira buani ka ipumpuo. Onaemo ka ipo'unde ka mebooli mawongko. 16Onaemo pu'uno ka ipesombaakono pesomba tiano buanino ka itunuo pesomba tiano salano. Hangano luwuno parewa atuu hinaweno hadio ntu'u ka urano tedoa hadio. 17Hangano onaeke ka iwela butao ponaino ka mepate ira luwuno tongku nahi ponto'ori mompehohawa?
Currently Selected:
Habaku 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
