Yehesikieli 38

Pau-Do i Ue mongkona i Goge i wita Magoge

38:1–39:29

1Haweomo pau-Do i Ue ndi ongkue, 2#Meng. 20:8”Hei anano mia, po'aroomo rupamu ndi Goge i wita Magoge, onaemo petewawa anu lalu i wawono i wita Meseki ka Tubali, ka pauomo anu ta gagi umewaio. 3Potae: Kanandiomo pau-Do Ue Ala: Kitao, Aku gagi ewaimu, hei Goge, petewawa anu lalu i wawono i wita Meseki ka Tubali. 4Aku dumiiko mompokonaakomu kai a asemu ka wawako meluarako saru luwuno sorodadumu, luwuno sorodadu mpengara. Luwudo mpesangka soompo, asa tepumpua langkai saru kanta langkai ka kodei, ka luwuno hinao ponai. 5To Peresia, Etiopia, ka Puti tumonda ira ka luwuno saru kanta ka songko mpetea, 6to Gomeri saru luwuno sorodaduno, i Beti-Togarima inso i tompano utara saru luwuno sorodaduno, hadio tongku tumondako. 7Omue pepatindamo saru luwuno tepumpuno mia anu moroko saru omue ka gagimo pepekaduduiado. 8Tehine ntu'u umarino atuu komohawe parenta. Mapata'u-ta'u lembuino omue kolumako i asa wita anu wali winangu umarino peteaa. Palilino mepinumpu inso i olodo hadio tongku a wawo luwuno torukuno Isaraeli anu tehineomo tekale-kale. Ondae mewinawa mpeluarako inso i tongado luwuno tongku ka luwuno roodo dompo'ia. 9Omue me'umbaako kana angi mokora ka aiwa kana seru anu tumutuwio asa wawontolino, omue saru luwuno bawaano sorodadumu; hadio tongku tumondako.

10Kanandiomo pau-Do Ue Ala: A oleo atuu meluarako tinoo i laro aroamu ka omue weweuo pinewowolo mosa'o. 11Omue motae: Aku sumapoio wita anu luwuno kotano nahi merere watu ka sumapoi ira mia anu mentuwu roodo ka manangai, luwuno anu mpo'ia a mpo'ianga nahi merere watu, nahina lansono ke pewowa langkai. 12Tinoomu komorontu ka mompomuru, saru tumandeo kaemu a ntekale-kaleano anu waliomo pino'iangario ka a bawaa-Ku anu pinumpu inso i tongado luwuno tongku. Ondae hinaomo pinotuwudo ka arataa, saru mpo'ia i tonga-tongano wita. 13Wita Seba ka Dedani, saru luwuno puu mpebalu-baludo to Tarasisi ka luwuno anu mempabawa ira mpotae ndi omue: Nde ko'aiwa morontuke, pumpu ira tepo'asamu komiu mpomuru, wawa ira salaka ka wulaa, umala ira pinotuwu ka arataa, ka mporontua anu hadio ntu'u? 14Onaemo pu'uno, pauomo anu ta gagi, hei anano mia ka potaemo ndi Goge: Kanandiomo pau-Do Ue Ala: I tempo atuu, tempono bawaa-Ku Isaraeli tekonai memanangai, omue komoposoo ira. 15Omue ko'aiwa inso a mpo'iangamu, inso i tompano utara, saru hadio tongku anu tumondako. Luwudo mpesawi a ngara, asa tepumpua anu langkai ka sorodadu anu moroso. 16Omue mentade umewai ira bawaa-Ku Isaraeli kana seru anu tumutuwio tolino. A tempo anu ta hawe mongkona atuu ta gagi, ka Aku wawako umewaio wita-Ku, ka domento'ori Aku luwuno tongku, i tempono Kupopokitao mempori-Ku ndi omue i arodo, hei Goge.

17Kanandiomo pau-Do Ue Ala: Omuemo atuu, mongkona isema Kupepau i tempo i ndi'ipua molalo luwuno tetenaa-Ku, luwuno nabi Isaraeli, anu mapata'u-ta'u mempauo anu ta gagi i tempo atuu nine Aku wawako umewai ira bawaa-Ku. 18I tempo atuu, tempono i Goge aiwa umewaio wita Isaraeli, kanandiomo pau-Do Ue Ala, tesingkaomo tekuda-Ku. A laro ntekuda-Ku, 19a laro mahakino aroa-Ku, ka a laro api tekuda-Ku, Aku mepau: A oleo atuu ta gagi lelu anu mongkokongiri i Wita Isaraeli. 20Luwuno bou a ntahi, manu-manu i laro meene, luwuno kondehora mo'ila, luwuno kondehora melera ka melele i tolino ka luwuno mia i wawontolino ira medoito mengkitao rupa-Ku. Luwuno torukuno ta tehoa, luwuno pu'u ntorukuno ta tewingke, ka sompo rere watu ta tebangku a wita. 21Aku mompoboi ponai a luwuno torukuno-Ku umewaio i Goge, kanandiomo pau-Do Ue Ala, ranta ponaino sompo mia ta sumapoio pepaekompono. 22Aku humukuakono haki lele ka rea. Aku mompotii usa marombo, usa seru baku, api, ka walira i wawono, a wawo nsorodaduno, ka a wawo hadio tongku anu tumondao. 23Aku mopokitao langkaino pabawa-Ku ka mempori-Ku, saru mokomengkaao koroi-Ku i arodo hadio tongku. Ka ira mento'orio nine Ongkuemo Ue.

Currently Selected:

Yehesikieli 38: XMZ

Highlight

Compare

Copy