Yehesikieli 39

1Ka omue, anano mia, pauomo anu ta gagi umewaio i Goge ka potaemo: Kanandiomo pau-Do Ue Ala: Kitao, Aku gagi ewaimu, hei Goge petewawa anu lalu i wawono i wita Meseki ka Tubali. 2Aku dumiiko ka tumaateko, saru moboiko inso i tompano utara ka wawako a luwuno torukuno Isaraeli. 3Aku tumunduhio wo'emu inso a ngkae manggalimu ka dumontaio ana mpanamu inso a ngkae koanamu. 4A wawo luwuno torukuno i Isaraeli omue komate saru luwuno sorodadumu saru luwuno tongku anu tumondako. Aku meweengakomu a luwuno rupano manu-manu lambaha ka a ngkondehora mo'ila gagi kaangado. 5Omue kotebangku a mpada, hangano Ongkue anu pauo, kanandiomo pau-Do Ue Ala. 6Aku mompotii api i wawono Magoge ka a luwuno mia anu manangai dompo'ia i wita wiwi ntahi. Ka ira mento'orio nine Ongkuemo Ue. 7Aku mokomengkaao nee-Ku anu mempori i tongano bawaa-Ku Isaraeli ka nahi Kupo'ineeo mbo'u nee-Ku anu mempori kinokoburuti, ranta luwuno tongku ira mento'orio nine Ongkuemo Ue, Anu Tedoa Mempori i Isaraeli. 8Mentee ntu'u, ta hawe ka ta gagi oleo anu Kupauomo, kanandiomo pau-Do Ue Ala.

9Palilino luwuno kota i Isaraeli ira mpeluarako, mpolangao api, ka mentunuo pepatinda parewa mpeteano i Goge, kana kanta kodei ka langkai, wo'e ka ana mpana, tuko pontunduhi ka kansai. Domentunuo i larono opitu nta'u. 10Ondae nahi ira mpo'ala keu inso a mpada ke mpobansi keu a ntobu, hangano api ira mpolangaakono pepatinda parewa mpetea atuu. Ira merontuo luwuno mia anu rumontu ira ka momuru ira mia anu momuru ira, kanandiomo pau-Do Ue Ala.

11A oleo atuu Aku moweeakono i Goge asa po'ianga, isua onae ba ikinaburu i Isaraeli, i Lembono Pesakiakoa i sabaano oleo inso i tahi ka kaburu atuu ta umonsoi ira mia anu mpesakiako. I ra'ai i Goge ta kinaburu saru luwuno mia hadio anu tumondao, ka po'ianga atuu ta nineeako Lembono Hamoni Goge. 12Suku Isaraeli ta kumaburu ira i larono opitu wula mokomorinao wita atuu. 13Luwuno palilino wita mpetonda kumaburu ira. Mongkona atuu mokogagi ira teto'ori a oleo Kupokomengkaao maramba-Ku, kanandiomo pau-Do Ue Ala. 14Ba opia mia pinesusua ka domelakopio mpiha wita atuu ka mengkaburu ira wata ngkoroi anu da matumbole a wawo wita saru tinoo mokomorinao. Umarino opitu wula atuu da mpepo'ungke ira. 15Tewala domelakopio wita atuu ka asa mia mohawe wukuno mia, onae asalakono monaa petondoni i horino hawe ka domengkaburuo puu mpokaburu i Lembono Hamoni Goge. 16Hamona mbo'u neeno kota. Kanandiomo dompokomorinao wita atuu.

17 # Meng. 19:17-18 Omue, anano mia, kanandiomo pau-Do Ue Ala: Potaemo a luwuno rupano manu-manu ka luwuno kondehora mo'ila: Impepumpumo ka ime'aiwamo, impepumpumo inso a luwuno siuno a mpelimbua pesomba anu Kuweweuakomiu, asa pelimbua pesomba anu langkai a wawo luwuno torukuno Isaraeli. Komiu mpongkaa bau ka mpo'inu rea. 18Baudo sorodadu komiu mengkaano ka reado petewawano wawontolino komiu me'inuo. Luwudo kana bimba lakino, ana bimba, bembe lakino, ka sapi lakino, luwuno pinotuwu mewalo inso i Basani. 19Komiu mpongkaa taba ranta ka imemowohi ka mpo'inu rea ranta ka imemolangu a mpelimbua pesomba anu Kuweweuakomiu. 20Komiu memowohiako kaanga a mpelimbua-Ku onaemo ngara ka anu mesawikio, ka luwuno sorodadu, kanandiomo pau-Do Ue Ala.

21Aku mopokitao maramba-Ku a luwuno tongku ka ira mengkitao pohuku dinontai-Ku ka kae-Ku anu tumunduhi ira. 22Suku Isaraeli ira mento'orio nine Ongkuemo Ue, Ue Alado, mompu'u oleo atuu ka nahina tampulaano. 23Luwuno tongku mbo'u ira mento'orio nine hangano salado suku Isaraeli asalakono melako a laro mpontadia, ka hangano mpelelu nahi dompetenunu ndi Ongkue, Kuwunio rupa-Ku ndi ondae. Kupeweengako ira a ngkaedo iwalido ka luwudo memateako ponai. 24Menunu saru mokoburua ka polimpaido Kuweweu ira ka Kuwunio rupa-Ku ndi ondae.

25Onaemo pu'uno, kanandiomo pau-Do Ue Ala: Kanandio-andio, Aku momuleo teweweuno i Yako ka mehohawao luwuno suku Isaraeli. A nee-Ku anu mempori Ongkue gagi mahaki aroa. 26Ira mengkolupeo mokoburuado ka luwuno pe'ewa anu pinopokitado ndi Ongkue tempono dowali mpo'iangario witado merodo ira nahina mompodengke maupo hapa koa. 27Tempono Kuwawa ira mpekule inso i tongado luwuno tongku ka pumpu ira inso i witado iwalido ka tempono Kupopokitao mempori-Ku ndi ondae i arodo hadio tongku, 28ira mento'orio nine Ongkuemo Ue, Ue Alado, anu wawa ira a laro pontadia i tongado luwuno tongku ka wali pumpu ira i witado ka nahi Kupo'ineeo maupo te'asa mia inso ndi ondae mo'ia i ra'ai. 29Nahi Aku wunio mbo'u rupa-Ku ndi ondae, hangano Aku motiio Penaa-Ku i wawodo suku Isaraeli, kanandiomo pau-Do Ue Ala.”

Currently Selected:

Yehesikieli 39: XMZ

Highlight

Compare

Copy