Yehesikieli 37

Pewanguno Isaraeli

37:1-14

1Pabawa-Do i Ue pabawai aku ka Dowawa aku meluarako molalo Penaa-Do. Donaa aku i tonga-tongano lembono, ka lembono andio bukeako hadio wuku. 2Dowawa aku melempa-lempa kumita ira wuku atuu, ka mentee ntu'u, porokono tedoa hadio a wawo lembono atuu; kitao, wuku atuudo tedoa mokari. 3Mepau Ira ndi ongkue, ”Hei anano mia, polioke wuku andiodo wali pinotuwu?” Sumangki aku, ”Oo Ue Ala, Omiumo anu tumo'orio.” 4Mepau Ira mbo'u ndi ongkue, ”Pauomo anu ta gagi mongkona wuku andiodo ka potaemo ndi ondae: Hei luwuno wuku anu mokari, rongeomo pau-Do i Ue! 5Kanandiomo pau-Do Ue Ala a luwuno wuku andio: Kupoweekomiu penaa i laromiu, ka iwali mentuwu. 6Aku weeakomiu luwuno ia, ka motuwuo ihimiu, saru tumutuwiakomiu kuli. Aku moweeakomiu penaa, ka iwali mentuwu. Ka komiu mento'orio nine Ongkuemo Ue.”

7Ka ku'amba pauo anu ta gagi kana anu kupinarentaako. Kontongaaku pauo anu ta gagi, terongeomo uni, mentee ntu'u uni kekele, ka luwuno wuku atuu pada ntepo'asa saru anu susua. 8Kontongaaku mepenteeo, kitao, hinao ia ndi ondae ka ihi mbo'u tuwu, ka i'amba kuli tumutuwio, sine napi hina penaado. 9Pau-Do ndi ongkue, ”Pauomo anu ta gagi a mpenaa atuu, pauomo anu ta gagi, hei anano mia, ka potaemo a mpenaa atuu: Kanandiomo pau-Do Ue Ala: Hei penaa, aiwamo inso a opaa siuno angi, ka pepuurimo i larodo mia anu mempinepate atuu, ka dowali mentuwu.” 10#Meng. 11:11 Ka ku'amba pauo anu ta gagi kana anu peparenta-Do ndi ongkue. Penaa mbo'u atuu mewinsoomo i larodo, onaemo ka dowali mentuwu ka mpelandaakono karudo, asa bawaa sorodadu anu tedoa hadio.

11Pau-Do ndi ongkue, ”Hei anano mia, wuku andiodo onaemo luwuno suku Isaraeli. Mentee ntu'u, ondaedo mpotae: Luwuno wukumami mokariomo ka pomperorohiamami tampulaomo; te'otuomo tuwumami. 12Onaemo pu'uno, pauomo anu ta gagi ka potaemo ndi ondae: Kanandiomo pau-Do Ue Ala: Mentee ntu'u, Ku'ungkahio luwuno kaburumiu ka wangu komiu inso i larono, hei bawaa-Ku, ka Aku wawa komiu i wita Isaraeli. 13Komiu mento'orio nine Ongkuemo Ue, tempono Ku'ungkahi ira kaburumiu ka wangu komiu inso i larono, hei bawaa-Ku. 14Aku weeakomiu Penaa-Ku, onaemo ka iwali mentuwu ka Aku numaa komiu i witamiu. Ka komiu mento'orio nine Ongkuemo, Ue, anu pauo ka weweuo, kanandiomo pau-Do i Ue.”

Poparentaa Isaraeli ka Yehuda wali pino'asa

37:15-28

15Ka i'amba haweomo pau-Do i Ue ndi ongkue, 16”Hei anano mia, alaomo asa mpole keu ka burio i wawono: Tiano Yehuda ka to Isaraeli, tepo'asano. Ka i'amba alaomo asa mpole keu anu susua ka burio i wawono: Tiano i Yusupu, keu Eparai, ka luwuno suku Isaraeli anu tepo'asa saru onae. 17Po'asaomo oruano gagi asa keu, ranta oruano gagi asa a ngkaemu. 18Tewala mia pe'asa tongkumu mpesikeno ndi omue: Nahi upepatindake pauakami, hapa pengkonaano andio ndi omue, 19potaemo ndi ondae: Kanandiomo pau-Do Ue Ala: Ku'alao keuno i Yusupu, anu a ngkaeno i Eparai saru luwuno suku Isaraeli, tepo'asano, ka mo'asao saru keuno Yehuda. Aku mokogagi ira asa keu ranta ka domegagi asa a ngkae-Ku.

20Kontongaano keu anu uburi ira atuu kongko a ngkaemu i arodo, 21pauomo ndi ondae: Kanandiomo pau-Do Ue Ala: Mentee ntu'u, Aku umala ira to Isaraeli inso i olodo luwuno tongku ba isua domelako. Aku pumpu ira inso a luwuno siuno ka wawa ira i witado. 22Aku mokogagi ira asa tongku i witado, a wawo luwuno ntorukuno Isaraeli, ka asa mokole parenta ira luwu. Ondae nahi domegagi mbo'u orua tongku ka nahi tetia mbo'u gagi orua poparentaa. 23Ondae nahi domengkokoburutiakono mbo'u koroido luwuno lahumoa ke pinesombaido anu mokoburu ke luwuno polimpaido. Sine, Aku motola ira inso a luwuno wineweudo anu pansia anu hangano onae ka dontehala, ka mokomorina ira, onaemo ka domegagi bawaa-Ku ka Aku gagi Ue Alado.

24 # Yeh. 34:24 Tetenaa-Ku i Daudi ta gagi mokoledo, ka luwudo ta hinao asa puu mpopakambi. Ira mentuwu montonda luwuno atora-Ku ka mpetenunu meweweuo luwuno pompakosi-Ku. 25Ira mpo'ia i wita anu Kuweeakono tetenaa-Ku i Yako, i sua dompo'ia uempu'udo. Ondae saru luwuno anado maupo ana'ue ka ana'ue ntukodo ira mpo'ia i ra'ai ranta nahina tampulaano ka tetenaa-Ku i Daudi gagi mokoledo ranta nahina tampulaano. 26Aku moweweu pedandia manangai saru ondae, ka atuu ta gagi pedandia anu mo'ia mpiha saru ondae. Aku rumonso ira ka weweu ira mehadio ka meweengakono po'ianga mempori-Ku i tonga-tongado ranta nahina tampulaano. 27#2Kor. 6:16; Meng. 21:3Po'ianga-Ku mbo'u ta kongko ndi ondae ka Aku gagi Ue Alado ka ondae gagi bawaa-Ku. 28Ka luwuno tongku ira mento'orio nine Ongkuemo, Ue, mokomemporio Isaraeli, i tempono po'ianga mempori-Ku kongko i tonga-tongado ranta nahina tampulaano.”

Currently Selected:

Yehesikieli 37: XMZ

Highlight

Compare

Copy