Yehesikieli 36

Pokowo'ohuno Isaraeli

36:1-38

1”Hei omue, anano mia, pauomo anu ta gagi mongkona luwuno torukuno i Isaraeli ka potaemo: Hei luwuno torukuno i Isaraeli, rongeomo pau-Do i Ue! 2Kanandiomo pau-Do Ue Ala: Iwali atuu mepau mongkona omiu: Losoko! Luwuno pongku wita inso i ndi'ipua gagiomo tiato. 3Onaemo pu'uno, pauomo anu ta gagi ka potae: Kanandiomo pau-Do Ue Ala: Mentee ntu'u ondae mpokogagi komiu boni-boni ka mpokonsii komiu inso a mpetengi-tengimiu ka imegagi tiado toreano luwuno tongku, ka imegagi wua wiwi ka popauado mia. 4Onaemo pu'uno, hei luwuno torukuno Isaraeli, rongeomo pau-Do Ue Ala: Kanandiomo pau-Do Ue Ala a luwuno torukuno ka pongku, a luwuno bangano korono ka lembono, a ntekale-kaleano anu boni-boni ka luwuno kota anu binintaomo, anu gagiomo pomurua ka pasinggiriado toreano luwuno tongku a mpehori-horino. 5Onaemo pu'uno, kanandiomo pau-Do Ue Ala: Ongkue manasa mepau a laro api mahakino aroa-Ku umewaio toreano luwuno tongku ka luwuno Edomi, anu tumantuio wita-Ku gagi tiano saru luwuno po'unde ka pontetewehi, ranta wita pompakambia atuu gagi pomurua. 6Onaemo pu'uno, pauomo anu ta gagi mongkona wita Isaraeli ka potaemo a luwuno torukuno ka pongku, a luwuno bangano korono ka lembono: Kanandiomo pau-Do Ue Ala: Mentee ntu'u, Ongkue mepau a laro mahakino aroa-Ku hangano imentembiomo mokoburua anu wineweudo tongku. 7Onaemo pu'uno, kanandiomo pau-Do Ue Ala: Mesumpa Aku nine luwuno tongku pehori-horimu manasa ondaedo mentembio mokoburuado.

8Sine omiu, luwuno torukuno Isaraeli, ta wali mentumba ka mompowee wua tiado bawaa-Ku Isaraeli, hangano ira ronga mpekule. 9Hangano kitaomo, Umpeda Aku ndi omiu ka merio komiu; komiu me'inangga ka pinorawoi inii. 10I wawomiu Aku mokohadioo porokono mia, luwuno suku Isaraeli, nahina tebinta. Luwuno kota ta pino'iangi mbo'u ka luwuno anu tekale-kale ta wali winangu. 11Aku mokohadioo porokono mia ka kondehora i wawomu, ka ira ntetiangi hadio ka mpe'ana ue. Aku weweu komiu wali pino'iangi kana amba-ambano ka moweweu moiko ndi omiu laluaopo sekono se'eluno. Ka komiu mento'orio nine Ongkuemo Ue. 12Aku weweuo mia, bawaa-Ku Isaraeli, mpekule-kule i wawomu. Ira mpentorokiko ka omue gagi tia pusakado, ka omue nahi koweweu ira mbo'u nahina inule. 13Kanandiomo pau-Do Ue Ala: Hangano mia mpotae mongkona omue: Omue mongkaa mia ka weweuo tongkumu nahina inule, 14onaemo pu'uno, nahi komongkaa mbo'u mia ka nahi weweuo mbo'u tongkumu nahina inule, kanandiomo pau-Do Ue Ala. 15Nahi Kupo'inee ira mbo'u mia mempopauo mokoburua anu wineweudo luwuno tongku ndi omue. Nahi komontembi mbo'u pontetewehido luwuno tongku ka nahi weweuo mbo'u tongkumu nahina inule, kanandiomo pau-Do Ue Ala.”

16Haweomo pau-Do i Ue ndi ongkue, 17”Hei anano mia, suku Isaraeli anu mpo'ia i witado mengkokoburutiakonomo pelelu ka poweweudo wita atuu. Peleludo mengkena kana mokoburuno hawe wulano beine i aro-Ku. 18Aku umuwuo tekuda-Ku ndi ondae hangano rea anu inuwudo i wita atuu ka hangano domengkokoburutiakono lahumoado. 19Aku sumiarawo ira i olodo luwuno tongku, ranta ka dontesiarawo i luwuno wita. Aku bitara ira menunu saru pelelu ka poweweudo. 20Maupo isua domelako i olodo luwuno tongku, domengkokoburutio nee-Ku anu mempori, tempono domempasinggiri ira mia: Dompotae ondae bawaa-Do i Ue, sine ondae asalakono mpeluarako inso i wita-Do. 21Ongkue merioo nee-Ku anu mempori, anu kinokoburutido suku Isaraeli i olodo luwuno tongku, ba isua domelako.

22Onaemo pu'uno, pauako iramo suku Isaraeli: Kanandiomo pau-Do Ue Ala: Komba hangano omiu Kuweweuo, hei suku Isaraeli, sine hangano nee-Ku anu mempori anu imengkokoburutio i olodo luwuno tongku ba isua imelako. 23Aku mokomemporio nee-Ku anu langkai anu kinokoburutiomo i olodo luwuno tongku, ka anu kinokoburutimiu i tonga-tongado. Ka luwuno tongku ira mento'orio nine Ongkuemo Ue, kanandiomo pau-Do Ue Ala, tempono Kupopokitao mempori-Ku ndi omiu i arodo luwuno tongku. 24Aku umala komiu inso a luwuno tongku ka pumpu komiu inso i luwuno wita saru wawa komiu mpekule i witamiu. 25Aku umuwuo i wawomiu uwoi molino ranta ka imegagi morina. Aku mokomorina komiu inso a luwuno mokoburua ka lahumoamiu. 26#Yeh. 11:19-20 Aku moweeakomiu aroa anu wo'ohu ka penaa anu wo'ohu ilaro aroamiu. Aku tumadio inso a ngkoroimiu aroa anu motea ka moweeakomiu aroa anu molusa. 27Penaa-Ku Aku numaao i laro aroamiu ka Aku weweu komiu mentuwu montonda luwuno pompakosi-Ku ka mpe'ini mpiha a luwuno atora-Ku saru meweweuo. 28Komiu mpo'ia i wita anu Kuweeako iramo uempu'umiu. Komiu megagi bawaa-Ku ka Ongkue gagi Ue Alamiu. 29Aku motola komiu inso a luwuno mokoburumiu. Aku motuwuo gandu saru mokohadioo hasilino, ka nahi powawa mbo'u mokoninggoa ndi omiu. 30Aku mokohadioo mbo'u wuano luwuno keu ka hasilino leremiu, ka nahi impontembi mbo'u pontetewehi i tongado luwuno tongku hangano mokoninggoa. 31Komiu nterorambe a mpelelumiu anu mosa'o ka wineweumiu anu nahi moiko. Komiu memokoburuakono koroimiu hangano sala ka wineweumiu anu mokoburu. 32Komba hangano omiu Kuweweuo, kanandiomo pau-Do Ue Ala, to'oriomo atuu. Imponto'orimo memokoko'ii ka po'ineeomo imempinokoko'ii hangano pelelumiu, hei suku Isaraeli.

33Kanandiomo pau-Do Ue Ala: A oleo Kupokomorina komiu inso a luwuno salamiu, Aku weweuo luwuno kota pino'iangario mbo'u ka luwuno anu tekale-kale wali winangu. 34Wita anu tehineomo nahi inangga ta wali inangga, ka si po'ia mbo'u nahi inangga i arodo luwuno mia anu ntelalo. 35Ira mpotae: Wita anu tehineomo nahi inangga andio gagi kana Bonde Paradesi ka luwuno kota anu tekale-kaleomo, boni-boni, ka terawo, kanandio-andio pino'iangario ka mebente. 36Luwuno tongku pehori-horimiu anu da mpo'ia ira mento'orio nine Ongkuemo Ue, anu wali wanguo hapa anu terawoomo ka wali mompahoakono anu nahi inangga. Ongkue, Ue, anu pauo ka Aku weweuo.

37Kanandiomo pau-Do Ue Ala: Mongkonamo andio anu inehe-Ku mbo'u dome'emao suku Isaraeli ka Kuweweuo ndi ondae: weweu ira mehadio kana bawaano bimba. 38Kana hadiono bimba tiano pesomba mempori, kana hadiono bimba i Yerusale a luwuno porame-rameado, kanatuumo luwuno kota anu tekale-kaleomo bukeako tahino mia. Ka ira mento'orio nine Ongkuemo Ue.”

Currently Selected:

Yehesikieli 36: XMZ

Highlight

Compare

Copy