Yehesikieli 31

I Pirau kana keu arasi anu tinuehi

31:1-18

1A nta'u kohopulu ka asa, wula ko'otulu, tanggala asa wula atuu, haweomo pau-Do i Ue ndi ongkue, 2”Hei anano mia, pauakonomo i Pirao, mokole i Masiri, ka a mia hadio anu mentondao:

Isema mokomengkenaakomu

a laro langkaimu?

3Kitaomo Asuri,

i ndi'ipua keu arasi i Libano,

mesampa tekosi

ka melewe marombo;

keuno tedoa ondau,

punsuno i olono laro nseru.

4Uwoi hadio ntu'u weweuo ka ilangkai

tahi malua moko'ondauo,

weweuo korono waa

lumimbuo kalawatano;

ka umuwoio telalo a pangkorono

a luwuno keu i pada.

5Onaemo pu'uno tuwuno lalu ondau

inso a luwuno keu a mpada;

luwuno sampa motutuno gagi hadio,

luwuno sampano gagi ondau

hangano waaano uwoi anu hadio ntu'u.

6A sampa motutuno mpeseno

luwuno manu-manu i laro meene,

i totono sampano luwuno kondehora mo'ila

mpe'ana;

ka luwuno tongku langkai

mpe'engo i totono.

7Onae tekosi hangano langkaino,

hangano ondauno luwuno sampano;

hangano hakano lumele

a uwoi anu hadio ntu'u.

8 # Teg. 2:9 Luwuno keu arasi a bonde-Do Ue Ala

nahi ta mokonangio,

keu sinobari nahi ta

mokomengkenaakono luwuno sampa motutuno,

ka keu beranga nahi ta pinokomengkena

saru luwuno sampano.

Luwuno keu a bonde-Do Ue Ala

nahi pinokomengkena saru onae

a ntekosino.

9Aku weweuo tekosi ntu'u

saru luwuno sampano anu hadio ntu'u.

A bonde Paradesi, a bonde-Do Ue Ala

luwuno keu mosiri ndi onae.

10Onaemo pu'uno, kanandiomo pau-Do Ue Ala: Hangano onae tuwu ondau, untuno kontasi-tasi i olono laro nseru, ka onae gagi mompelangka-langkai hangano ondauno, 11ka Kupeweengakonomo a ngkaeno asa mia anu pabawa i olodo luwuno tongku, ka iwineweu menunu saru wineweuno anu mosa'o; Ongkue sumaario. 12Mia mehawe, anu lalu melambaha i olodo luwuno tongku, ira mentuehio ka mebintao. I wawono luwuno torukuno ka a luwuno lembono luwuno sampano ntedodonta ka luwuno bangano korono i wita atuu luwuno sampa motutuno ntepupudu. Luwuno tongku i tolino melako inso a mpeneoano ka mebintao. 13A ngkeu anu tebangku atuu mpeseno luwuno manu-manu i laro meene ka i olono sampa-sampano mpo'ia kondehora mo'ila. 14Luwuno atuu gagi ka i'amba luwuno keu a wiwi uwoi nahi dompompelangka-langkai ka nahi weweuo untuno kontasi-tasi i olono laro nseru, ka luwuno anu mo'oso hadio uwoi nahi pompelangka-langkai mpiha. Hangano, luwudo mempineweengako iramo a laro matea, a laro tolino anu lalu i totono, i tongado anano mia anu mpetii iramo a laro ngkaburu.

15Kanandiomo pau-Do Ue Ala: A oleo ipetii a ntolinodo mia mate, Kuweweuo tahi malua mpo'inombo hangano onae. Kubuntoo luwuno korono, ranta uwoino anu hadio ntu'u tebunto. Hangano onae Kuweweuo torukuno Libano mo'inombo ka luwuno keu a mpada moleu. 16Rumongeo unino tedontano, Kuweweuo luwuno tongku mpondidi-ndidi i tempono Kupotiio a ntolinodo mia mate meronga ondae anu mpetii iramo a laro ngkaburu. Luwuno keu a bonde Paradesi, keu anu tebiniki anu lalu moiko i Libano, luwuno anu mo'oso hadio uwoi, ta tetarero i tolino anu lalu i totono. 17Ondae mbo'u mpetii meronga onae a ntolinodo mia mate, po'iangado mia anu memate pinepateako ponai; kanatuu koa mbo'u anu mpe'engo-engo i totono, tepo'asano i olodo luwuno tongku. 18Saru isemake omue pinokomengkenaako i olodo luwuno keu a bonde Paradesi a laro mongkona marambaa ka langkaia? Omue kopinotii i tolino anu lalu i totono meronga luwuno keu a bonde Paradesi ka omue tepombole i tongado mia anu nahi petindi meronga luwuno mia anu memate pinepateako ponai. Onaemo atuu i Pirao saru luwuno mia hadio anu tumondao, kanandiomo pau-Do Ue Ala.”

Currently Selected:

Yehesikieli 31: XMZ

Highlight

Compare

Copy