Yehesikieli 30

Pohuku-Do i Ue i Masiri

30:1-19

1Haweomo pau-Do i Ue ndi ongkue, 2”Hei anano mia, pauomo anu ta gagi ka potaemo: Kanandiomo pau-Do Ue Ala: Ponsabangimo: Adoo, oleo atuu! 3Oleo atuu umpedaomo, oleo-Do i Ue umpedaomo, oleo menseru wongi-wongi; onaemo atuu tempodo luwuno tongku. 4#Yer. 46:24-26Ponai hawe a nto Masiri ka doitoa a nto Etiopia, i tempono mia memate matumbole i Masiri, kaeano pinolaiako, ka luwuno pandasino rinongka. 5To Etiopia, Puti, Ludi, luwuno witado to Ara, Libia, ka luwuno mia inso i wita anu ntepo'asa saru ondae ira memate ntebangkuako ponai meronga ondae.

6Kanandiomo pau-Do i Ue: Luwuno mia anu mpokowalio Masiri ira memate ntebangku, ka pompelangka-langkaino Masiri hangano rosono ta tetadi. Inso i Migidoli hawe i Siene ira memate ntebangkuako ponai, kanandiomo pau-Do Ue Ala. 7Onae ta tesosaelo i tongano luwuno wita anu boni-boniomo ka luwuno kotano tewinso a laro kota anu tehoaomo. 8Ira mento'orio nine Ongkuemo Ue, i tempono Kupolangao api i Masiri ranta luwuno mia anu mempokowalio rinopu. 9A oleo atuu luwuno tinena-Ku ira ronga mpelungka mempodengkeo Etiopia anu roodo. Doitoa umalu ira a oleo hukuano Masiri. Hangano, mentee ntu'u, oleo atuu ta hawe!

10Kanandiomo pau-Do Ue Ala: Aku mokotampulao kaeano Masiri telalo ndi Nebukanesa, mokole i Babeli. 11Onae meronga sorodaduno anu lalu melambaha i olodo luwuno tongku, ira mehawe mpekansa-kansao wita atuu. Ira mebutao ponai umewaio Masiri ka mebuketiakono wita atuu mia anu mempinepate. 12Aku mokomo'are ira ana ngkoro Nili ka meweengakono wita atuu a ngkaedo mia melambaha. Aku rumopuo wita atuu saru luwuno ihino telalo a mia mehawe. Ongkue, Ue, anu pauo.

13Kanandiomo pau-Do Ue Ala: Aku mokotampulao luwuno lahumoa ka luwuno pinesombai inso i Memipisi. Nahi ta hina mbo'u petewawa i wita Masiri ka Aku moweweu doitoa i ra'ai. 14Aku rumopuo Patirosi ka molangao api i Soani, ka Tebe dinontaiako pohuku. 15Aku lumuarakono tekuda-Ku ndi Sini, benteno Masiri, ka mokotampulao kaeano Tebe. 16Aku molangao api i Masiri, Sini ta mondidi-ndidi, Tebe ta pinongko'ala ka luwuno rere watuno ta rinongka. 17Luwuno ana ntama kontuwuado Oni ka Pi-Beseti ira memate ntebangkuako ponai ka luwuno beine ira mewinawa gagi mia tinawa. 18I Tahapanesi oleo ta gagi wongi-wongi i tempono Kupuduo pasangano Masiri i ra'ai, ka pompelangka-langkaino hangano rosono tampula. Kota atuu ta tumutuwio seru ka luwuno anano beine ira mewinawa gagi mia tinawa. 19Aku modontaiakono pohuku Masiri. Ka ira mento'orio nine Ongkuemo Ue.”

Pabawano Masiri tampula

30:20-26

20A nta'u kohopulu ka asa, wula ko'aasa, tanggala opitu wula atuu, haweomo pau-Do i Ue ndi ongkue, 21”Hei anano mia, Kupuduomo kae morosono i Pirao, mokole i Masiri. Kitao, kaeno nahi winalu ka itompa ke maupo winutuako powalu ka iwali moroso montande ponai. 22Onaemo pu'uno, kanandiomo pau-Do Ue Ala: Kitao, Ongkue gagi ewaino i Pirao, mokole i Masiri. Aku puduo kaeno, moiko anu da moroso maupo anu tepuduomo, ka Aku dumontaio ponai inso a ngkaeno. 23Aku sumiarawo ira to Masiri i olodo luwuno tongku ka sumiarawo ira a luwuno wita. 24Aku mokorosoo kaeno mokole i Babeli ka weeakono ponai-Ku a ngkaeno. Sine Aku puduo kaeno i Pirao ka ta meraali i arono kana mia anu mapari mobelano. 25Mentee, Aku mokorosoo kaeno mokole i Babeli, sine kaeno i Pirao ta tedonta telupe. Ira mento'orio nine Ongkuemo Ue, i tempono Kupeweengakono ponai-Ku a ngkaeno mokole i Babeli ka ipe'impahiakono umewaio wita Masiri. 26Aku meweengako ira i olodo luwuno tongku ka sumiarawo ira a luwuno wita. Ka Ira mento'orio nine Ongkuemo Ue.”

Currently Selected:

Yehesikieli 30: XMZ

Highlight

Compare

Copy