Yehesikieli 32

Penani ponsabangi mongkona i Pirao

32:1-32

1A nta'u kohopulu ka orua, wula kohopulu ka orua, tanggala asa wula atuu, haweomo pau-Do i Ue ndi ongkue, 2”Hei anano mia, penaniakomo ponsabangi mongkona i Pirao, mokole i Masiri ka potaemo ndi onae:

Omue mongkenao koroimu

saru singa mongura i olodo luwuno tongku.

Sine, omue kana naga a ntahi malua;

luwuno korono uweweuo tehento,

uwoi uwewuiakono karumu

ka weweu ira korono merege.

3Kanandiomo pau-Do Ue Ala:

Aku tuma'oo buani-Ku rumakoakomu

tepumpuno hadio tongku,

ka tumandeko a laro buani-Ku.

4Kupepasiakomu a wita,

Kupetadiakomu a mpada.

I wawomu Kutena ira mpedongko

luwuno manu-manu i laro meene,

saru baumu Kupokomowohi

ira kondehora asa wawontolino.

5Baumu Kunaao a wawo mentorukuano,

luwuno lembono Aku mokobukeakono wata ngkoroimu.

6Tolino Kupopo'inuakono

reamu anu waa,

humbee, luwuno mbo'u torukuno;

luwuno bangano korono ta bukeako onae.

7 # Yes. 13:10; Mat. 24:29; Mrk. 13:24-25; Luk. 21:25; Meng. 6:12-13; 8:12 Tempono Kupepateko,

langi Aku tumutuwio

ka anano wula Kuweweuo megawu.

Mata'oleo Kututuwiakono seru

ka wula nahi pepansariako wanta.

8Luwuno anu mepansari i langi

Aku mokowongi-wongio i wawomu.

Wongi-wongia Kupotiio a wawo witamu,

kanandiomo pau-Do Ue Ala.

9Kupokodanggarao aroado hadio tongku, tempono Kuwawa komiu gagi mia tinawa i tongado luwuno tongku, a luwuno wita anu nahi imento'orio. 10Aku weweuo hadio tongku ntededengke hangano omue ka luwuno mokoledo ira mpondidi-ndidi hangano omue, tempono Kupebatu-batuako ponai-Ku i arodo. Ondae singge mia ta doitoakono mpiha tuwuno a oleo pokotompaamu. 11Hangano, kanandiomo pau-Do Ue Ala: Ponaino mokole i Babeli ta hawe ndi omue.

12Aku weweu ira mia hadio anu mentondako

ntebobangkuako ponaido sorodadu,

luwuno anu tedoa melambaha i olodo luwuno tongku.

Pompelangka-langkaino i Masiri ta pinudu

ka mia hadio anu tumondao luwuno rinopu.

13Luwuno kondehorano Aku mepate ira

inso a wiwino luwuno korono langkai;

karuno mia nahi ta wewuio mbo'u

ka i larono nahina pinotuwu wewuio.

14Ka i'amba uwoino Aku mokomolinoo,

luwuno korono Aku weweuo

waa kana lana,

kanandiomo pau-Do Ue Ala.

15I tempono Masiri Kupokogagio boni-boni,

saru mbo'u pingko pinokotampula luwuno ihino wita

ka luwuno palilino Kutunduhi ira luwu;

ka ira mento'orio nine Ongkuemo Ue.

16Ndio ponsabangi anu asalakono pinenaniako. Bawaano beinedo luwuno tongku ira mpenaniakono, ira mpenaniakono Masiri ka a luwuno mia hadio anu tumondao, kanandiomo pau-Do Ue Ala.”

17A nta'u kohopulu ka orua, wula ko'aasa, tanggala hopulu ka olima wula atuu, haweomo pau-Do i Ue ndi ongkue, 18”Hei anano mia, poporongeomo ponsabangi, omue saru bawaano beinedo luwuno tongku anu tedoa moroso, mongkona mia hadio i Masiri ka potii iramo i tolino anu lalu i totono ntepohaweako ira anu mpetii iramo a laro ngkaburu. 19Inso ndi semake omue lalu tekosi? Petiimo ka pepombolemo meronga luwuno mia anu nahi dompetindi! 20Ira ntebangku i tongado mia anu memate pinepateako ponai. Masiri pineweengakoomo a mponai; onae rinende saru luwuno anu tumondao. 21Luwuno anu mempabawa anu moroso ka mosia saru luwuno anu mpokowali ira mpepau mongkona onae inso i tongano tolinodo mia mate: Ondae mpetii iramo ka mpepombole, mia anu nahi dompetindi atuu, anu mate pinepateako ponai.

22I tu'aimo Asuri saru luwuno tepo'asano ka luwuno kaburu lumimbuo. Luwuno mia anu mate pinepate, tebangkuako ponai. 23Kaburuno ninaa a ondaloano ntu'u inso a laro ngkeke ka tepumpuado anu mentondao kongko lumimbuo kaburuno. Luwuno mia anu mate pinepate, tebangkuako ponai; ondae atuu anu mpowawa doitoa i tolinodo mia mentuwu.

24I tu'aimo Elami saru mia hadio anu tumondao lumimbuo kaburuno. Luwuno mia anu mate pinepate, tebangkuako ponai. Ondae atuu mia nahi dompetindi anu mpetii i tolino anu lalu i totono ka anu mpowawa doitoa i tolinodo mia mentuwu. Ondae mentembio mokoburua meronga luwuno mia anu mpetii a laro ngkaburu. 25I tongado luwuno mia memate pinepate pinatinda poturiano saru luwuno mia hadio anu tumondao lumimbuo kaburuno. Luwuno mia anu nahi dompetindi, anu mate pinepateako ponai, hangano doitoa ndi ondae pinosaba iramo a i tolinodo mia mentuwu. Ondae mentembio mokoburuno meronga luwuno mia anu mpetii a laro ngkaburu. Ondae meninaa i olodo mia mempinepate.

26I tu'aimo Meseki ka Tubali saru luwuno mia hadio anu tumondao lumimbuo kaburuno. Luwuno mia anu nahi petindi, anu mate pinepateako ponai, hangano ondae mpompokodoito i tolinodo mia mentuwu. 27Nahi domempinombole meronga luwuno sorodadu anu memate ntebangku i tempono i ndi'ipua, anu mpetii i tolinodo mia mate saru luwuno parewa mpeteado ka anu ponaido meninaa i totono uludo saru kantado a wawo luwuno wukudo. Hangano, doitoako ira sorodadu atuu pabawaio tolinodo mia mentuwu. 28Omue, Pirao, kopinudu ka mepombole i tongado mia anu nahi dompetindi meronga mia anu mempinepateako ponai.

29I tu'aimo Edomi, luwuno mokoleno ka luwuno petewawano, anu meninaa meronga mia memate pinepateako ponai, maupo domemoroso. Ondae mempinombole meronga luwuno mia nahi dompetindi ka mia anu mpetii a laro ngkaburu. 30I tu'aimo luwuno petewawa inso i utara, ondae luwu, ka luwuno to Sidoni, anu memokoko'ii mpetii meronga mia anu memate pinepate, maupo saru rosodo dompokodoitoomo koroido ondaedo. Mia anu nahi dompetindi atuu mpepombole meronga mia anu memate pinepateako ponai ka mentembio mokoburuado meronga mia anu mpetii a laro ngkaburu.

31I Pirao ta kumita ira luwu ka tetarero a nteweweudo mia hadio anu tumondao. I Pirao saru luwuno sorodaduno memate pinepateako ponai, kanandiomo pau-Do Ue Ala. 32Hangano Ongkue mowawa doitoa ndi onae i tolinodo mia mentuwu, ka i Pirao saru luwuno mia hadio anu tumondao mempinombole i olodo mia nahi dompetindi meronga mia anu mate pinepateako ponai, kanandiomo pau-Do Ue Ala.”

Currently Selected:

Yehesikieli 32: XMZ

Highlight

Compare

Copy