Yehesikieli 29

Pinau anu ta gagi umewaio Masiri ka i Pirao

29:1-16

1A nta'u kohopulu, wula kohopulu, tanggala hopulu ka orua, haweomo pau-Do i Ue ndi ongkue, 2#Yes. 19:1; Yer. 46:2”Hei anano mia, po'aroomo rupamu ndi Pirao, mokole i Masiri ka pauomo anu ta gagi umewaio ka luwuno Masiri. 3Pepaumo ka potae: Kanandiomo pau-Do Ue Ala:

Menteeano, Ongkue gagi ewaimu,

hei Pirao, mokole i Masiri,

buaea langkai anu mepombole

i tongano luwuno anano koronomu,

ka anu motae: Koro Nili atuu ongkue me'ueo.

Ongkuemo anu weweuo.

4Aku mompasa kai a asemu

ka weweuo bou inso a luwuno ana ngkoronomu mpetako a karansamu.

Aku tumandeko inso a ntongano luwuno ana ngkoronomu

saru luwuno bou mpetako a karansamu.

5Aku metadiakomu i pada one,

humbee, omue saru luwuno bou a luwuno ana ngkoronomu.

Omue kotedonta a mpada

ka nahi ta binini ke pinumpu.

Aku meweengakomu gagi kaangado

kondehora mo'ila ka manu-manu i laro meene.

6 # Yes. 36:6 Luwuno palilino Masiri ira mento'orio

nine Ongkuemo Ue.

Omue kana tuko balo

a suku Isaraeli.

7Tempono dome'iniakomu kae, omue tepudu telupe

ka belaio luwu oweado;

tempono dompetumbo ndi omue, omue tepudu

ka uweweu ira luwu kobangku-bangku.

8Onaemo pu'uno kanandiomo pau-Do Ue Ala: Mentee ntu'u, Aku mompotii ponai ndi omue ka mokotampulao mia ka kondehora inso ndi omue 9ranta wita Masiri ta gagi boni-boni ka terawo. Ka ira mento'orio nine Ongkuemo Ue.

Upotae: Koro Nili atuu ongkue me'ueo, ongkuemo anu weweuo, 10ka mentee ntu'u, Ongkue gagi ewaimu ka ewaino luwuno ana ngkoronomu. Aku weweuo wita Masiri gagi tekale-kale, mokari ka nahi mewalo, ka boni-boni mompu'u inso i Migido hawe i Siene, tendeano hawe a mpetidaa Etiopia. 11Nahina maupo te'asa mia ta telaloio, tendeano nahina maupo te'asa kondehora. Wita atuu nahi ta pino'iangi i larono pato pulu nta'u. 12Aku weweuo wita Masiri boni-boni i tongano luwuno wita anu rinopuomo ka luwuno kotano ta gagi boni-boni i tongano luwuno kota anu kinale-kale i larono pato pulu nta'u. Aku sumiarawo ira to Masiri i olodo luwuno tongku ka weweu ira ntepoponsua a luwuno wita.

13Hangano kanandiomo pau-Do Ue Ala: A pokotampulaano pato pulu nta'u atuu Aku pumpu ira to Masiri inso i tongano luwuno tongku a ntesiarawoado. 14Aku momuleo teweweuno Masiri ka mokule ira i wita Patirosi, wita insoado, ka i ra'ai ondae megagi poparentaa anu molema. 15I olodo luwuno poparentaa onae gagi anu lalu molema ka nahi polio mompelangka-langkai mbo'u a luwuno tongku susua. Aku weweu ira tedoa molema ranta nahi ira mempabawa mbo'u a luwuno tongku. 16Ondae nahi gagi mbo'u pine'ala-alado suku Isaraeli, sine tendeano mopoto'oriakono Isaraeli salado tempono dompepokule ndi ondae mpepetulungi. Ka Masiri ta tumo'orio nine Ongkuemo Ue Ala.”

Masiri gagi tambono i Nebukanesa

29:17-21

17Ka i'amba, a nta'u korua pulu ka opitu, wula ko'aasa, tanggala asa wula atuu, haweomo pau-Do i Ue ndi ongkue, 18”Hei anano mia, i Nebukanesa, mokole i Babeli, tumena ira sorodaduno mpeteahako ntu'u umewaio Tirusi. Luwuno ulu londaomo ka luwuno owea telohuiomo, sine moiko onae maupo sorodaduno nahi dompohawe me'uraa inso ndi Tirusi a mpeteahakodo umewaio. 19#Yer. 46:24-26Onaemo pu'uno, kanandiomo pau-Do Ue Ala: Wita Masiri Kuweeakono i Nebukanesa, mokole i Babeli. Onae ta wawao kaeano saru moweweu porontua ka pomurua. Onaemo atuu tambodo sorodaduno. 20Aku weeakono wita Masiri gagi sulono a inanggano, hangano domeweweua-Kunemo, kanandiomo pau-Do Ue Ala.

21A oleo atuu Aku motuwuo tanduno suku Isaraeli ka weweuko mokompepau mbo'u i tonga-tongado. Ka ira mento'orio nine Ongkuemo Ue.”

Currently Selected:

Yehesikieli 29: XMZ

Highlight

Compare

Copy