Yehesikieli 28

Pinau anu ta gagi umewaio mokole i Tirusi

28:1-10

1Ka haweomo pau-Do i Ue ndi ongkue, 2”Hei anano mia, pauakonomo mokole i Tirusi: Kanandiomo pau-Do Ue Ala:

Hangano omue mompelangka-langkai

ka motae: Ongkue andio Ue Ala!

Ongkue mentoro a ngkadera poparentaa-Do Ue Ala

i tonga-tongano tahi malua.

Kahinaano omue mia,

komba Ondae Ue Ala,

maupo aroamu numaao koroimu mengkena

saru Ondae Ue Ala.

3Menteeano ponto'orimu anu mentee lumaloio ponto'ori menteeno i Danieli;

nahina rahasia anu tetutuwi ndi omue.

4Saru ponto'ori mentee ka pokonto'oriamu

omue mohawe kaeaa.

Wulaa ka salaka upumpu ira

a laro ponaapa arataamu.

5Saru pandemu ntu'u mebalu-balu

omue mokohadioo kaeamu,

ka hangano atuu omue gagi mompelangka-langkai.

6Onaemo pu'uno kanandiomo pau-Do Ue Ala,

Hangano aroamu numaao koroimu mengkena saru Ondae Ue Ala,

7ka, mentee ntu'u, Aku wawa ira

mia hawe umewaiko,

tongku anu lalu lambaha,

anu ira mebutao ponaido

umewaio ponto'ori menteemu anu inunde-unde,

ka marambamu kinokoburuti.

8Omue dompotiiko a laro ngkaburu,

omue mate kana mia mate pinepate a ntonga ntahi malua.

9Nde da komotaeke, ’Ongkue andio Ue Ala!’

i arodo anu mpepateko?

Kahinaano a ngkaeno anu tumoboko

omue onaemo mia, komba Ondae Ue Ala.

10Omue komate kana mia nahi petindi

hangano kaedo mia mehawe.

Hangano Ongkue anu pauo, kanandiomo pau-Do Ue Ala.”

Penani ponsabangi mongkona mokole i Tirusi

28:11-19

11Ka i'amba haweomo pau-Do i Ue ndi ongkue, 12”Hei anano mia, penaniakonomo ponsabangi mongkona mokole i Tirusi ka potaemo ndi onae: Kanandiomo pau-Do Ue Ala:

Omuemo pandirino luwuno anu moiko,

buke ponto'ori anu mentee ka tedoa tekosi.

13Omue i Paradesi, bonde-Do Ue Ala

meramba-rambaako luwuno watu paramata anu masuli olino:

yasapisi motaha, kerisoli, ka yasapisi molowulu,

paramata pirusu, kerisopara, ka nepiri,

lasuaradi, watu rea, ka malakiti.

Petakoano wineweu inso a wulaa

ka pinatinda a oleo upinokogagi.

14Omuemo kerubi, puu mpodagai anu inurapi,

kanandiomo Kupakosiko;

omue kongko a ntorukuno mempori-Do Ue Ala

ka melempa-lempa a laro watu me'api.

15Omue nahina tataamu a laro mpelelumu

mompu'u a oleo upinokogagi

ranta ka ihinawe molengkua ndi omue.

16Saru pebalu-balumu anu langkai

omue bukeako pompokonsii

ka omue moweweu hala.

Ka Kutadiko

inso a ntorukuno-Do Ue Ala,

Kupepateko,

hei kerubi puu mpodagai,

inso a laro watu me'api.

17Omue mompelangka-langkai hangano tekosimu,

ponto'orimu anu mentee uropuo hangano marambamu.

I tolino Kupetadiakomu,

a luwuno mokole Kupeweengakomu

gagi kikitaano matado.

18Saru hadiono salamu

ka molengkua a laro mpebalu-balumu

omue lumimpaio memporino po'ianga memporimu.

Ka Kupolangao api inso i tongamu

anu ta kumaako ka upingko.

Kupo'ineeko gagi awu i wawontolino

i arodo luwuno anu mengkitako.

19I olodo luwuno tongku luwuno anu tumo'oriko

ntededengke mengkitao teweweumu.

Poko'ariano tuwumu mongkokongiri

ka tampulakomo mpiha.”

Pinau anu ta gagi umewaio Sidoni

28:20-26

20 # Yoe. 3:4-8; Sak. 9:1-2; Mat. 11:21-22; Luk. 10:13-14 Haweomo pau-Do i Ue ndi ongkue, 21”Hei anano mia, po'aroomo rupamu i Sioni ka pauomo anu ta gagi umewaio 22ka potaemo: Kanandiomo pau-Do Ue Ala: Kitao, Ongkue gagi ewaimu, hei Sidoni, ka Aku mopokitao maramba-Ku i tonga-tongamu. Ira mento'orio nine Ongkuemo Ue, i tempono Kudontaiakono pohuku ka tumisoo mempori-Ku ndi onae. 23Aku mompotii haki lele ndi onae ka rea ta waa a luwuno salano. Mia ira memate ntebangku i tonga-tongano hangano ponai anu hawe inso a mpehori-horino umewaio. Ira mento'orio nine Ongkuemo Ue. 24Nahi ta hina mbo'u a nsuku Isaraeli mia inso i olodo luwuno pehori rahano anu mokongkodei ira, gagi rui anu meduhu ke tolungo anu mompokomopoe. Ira mento'orio nine Ongkuemo Ue Ala.

25Kanandiomo pau-Do Ue Ala: I tempono Kupumpu ira suku Isaraeli inso i olodo luwuno suku tongku tesiarawoado ka tumisoako ira mempori-Ku i arodo luwuno tongku, ka ira mpo'ia i witado anu Kuweeakonomo tetenaa-Ku i Yako. 26Ira merodo mpo'ia i ra'ai, mpowangu raha, ka mpoweweu lere anggoro. Humbee, ira merodo mpo'ia i ra'ai i tempono Kudontaio pohuku a luwuno pehori rahano anu mpokongkodei ira. Ira mento'orio nine Ongkuemo Ue, Ue Alado.”

Currently Selected:

Yehesikieli 28: XMZ

Highlight

Compare

Copy