Yehesikieli 27
27
Penani ponsabangi mongkona Tirusi
27:1-36
1 #
Yes. 23:1-14
Haweomo pau-Do i Ue ndi ongkue, 2”Hei anano mia, penaniakonomo ponsabangi mongkona Tirusi, 3ka pauakonomo Tirusi anu po'iangano a mpewowa mewinso a ntahi malua ka anu mebalu-balu saru luwuno tongku a hadio wita i wiwi ntahi: Kanandiomo pau-Do Ue Ala:
Hei Tirusi, omue motae,
’Ongkuemo tekosia anu soompo’
4Wita pinabawaimu i tongano tahi malua;
anu pande ntu'u mowanguakomu weweuo tekosimu soompo.
5Asangkoroimu domeweweuo
inso a ngkeu sanobari Seniri,
dome'alao keu arasi Libano
meweweuakomu karuno somba.
6Keu tarabanti inso i Basani
pinake pebosemu;
horomu domeweweuo inso a wuku tindu
pinotako a ngkeu cemara inso i wiwi ntahi Kitimi.
7Sombamu wineweu
inso a lena alusu
anu mpesora-sora
inso i wita Masiri;
onaemo atuu tondonimu.
Tendamu wineweu
inso a nsawu wungo motu'a
ka sawu wungo mongura
inso i wiwi ntahi Elisa.
8To Sidoni ka Ariwadi
gagi puu mpebosemu;
luwuno anu mempande ntu'u, hei Tirusi kongko ndi omue,
ondae gagi puu mpesumombamu.
9Mia memota'uno Gebali saru luwuno anu mempande ntu'u kongko ndi omue,
ira mpokomoikoo masolamu.
Luwuno kapala a ntahi saru anu mpo'angga a ngkapala mpetiima ndi omue
ira mentobosio pebalu-baludo.
10To Peresia, Ludi, ka Puti,
anu gagi sorodadumu
kongko a laro nsorodadumu.
Kanta ka songko ndinoe ndi omue;
luwuno tumiangio marambamu.
11To Ariwadi ka sorodaduno mekongko i wawono luwuno rere watu lumimbuko ka to Gamadi i wawono luwuno menaramu. Domendoe ira kantado a luwuno rere watu lumimbuko; ondae meweweuo tekosimu ka isoompo.
12Tarasisi mebalu-balu saru omue hangano luwuno kaeamu hadio ntu'u. Ondae mpotobosiako salaka, labu, tima mopute, ka tima mo'ito euno balu-balumu. 13Yawani, Tubali, ka Meseki mpebalu-balu saru omue. Ondae mpotobosiako ata, luwuno parewa mala euno balu-balumu. 14Inso i Beti-Togarima ondae mpotobosiako ngarano kareta, ngara pesawia, ka bagali euno balu-balumu. 15To Rodosi mpebalu-balu saru omue, ka hadio wita i wiwi ntahi gagi wita po'asaamu. Ondae mpowawa wuku tindu ka keu sora ndi omue gagi po'owahi. 16Edomi mebalu-balu saru omue hangano hadiono hasilimu. Ondae mpotobosiako paramata watu rea, sawu wungo mongura, sangka mpesora-sora, sawu lena alusu, watu manaha, ka watu delima euno balu-balumu. 17Yehuda ka wita Isaraeli mpebalu-balu saru omue. Ondae mpotobosiako gandu inso i Miniti, mire, siu hoani, lana, ka balasee euno balu-balumu. 18Damasi mebalu-balu saru omue hangano hadiono hasilimu, hangano luwuno kaeamu hadio ntu'u, saru anggoro inso i Heleboni ka wulu bimba inso i Sakahari. 19To Dani ka to Yunani inso i Usali mpotobosiako labu pinalu, keu mo'ahi ka towu euno balu-balu anu hina i olono balu-balumu. 20Dedani mo'asa kuli pelampi pesawia a ngara ndi omue. 21To Ara ka luwuno petewawano Kedari mpo'asa ana bimba, bimba lakino, ka bembe lakino ndi omue. A laro luwuno mongkona atuu ondae mpebalu-balu saru omue. 22Puu mpebalu-baludo to Seba ka Raema mpebalu-balu saru omue. Ondae mpotobosiako luwuno rampa-rampa moiko ntu'u ka luwuno watu paramata anu masuli olino saru wulaa euno balu-balumu. 23Harani, Kane, Edeni, Asuri ka Kilimadi mpebalu-balu saru omue. 24A luwuno olumu ondae me'asa ira lemba meloe tekosi ntu'u, sawu wungo motu'a, sangka mpesora-sora, umpeo tekosi mperupa-rupa sorano saru koloro linisu anu moroso. 25#Meng. 18:11-19 Luwuno kapala Tarasisi mewawaakomu balu-balu atuu.
Bukeako inula mobea
omue i tonga ntahi malua.
26A ntahi malua puu mpebosemu wawako.
Sine, angi mokora i sabaano oleo umaluko a ntonga ntahi malua.
27Arataamu, parewamu, balu-balumu,
anu mpo'angga a ngkapalamu ka luwuno puu mpesumombamu,
luwuno puu mpo'anggamu ka puu mpebalu-balumu
saru luwuno sorodadumu anu mekongko ndi omue,
humbee, meronga luwuno anu mpe'ula a ngkapalamu,
toondu a laro ntahi malua a oleo tedontaamu.
28Rumongeo peboolido puu mpesumombamu
mondidi-ndidiomo wita motu'i pehori-horimu.
29Ondae mpetii inso a ngkapala,
luwuno anu mpebose.
Anu mpo'angga a ngkapala ka luwuno puu mpesumomba,
a wita motu'i dompentade.
30Ponsabangi meroku, pebooli pompemasusa
pinoporonge ndi omue;
mponaa awu a wawo uludo,
mpelundi-lundi a laro pampawu.
31Ondae mpekeru londa, hangano omue,
ka mpebooako sawu po'inombo;
ondae mpengese, sumanga mompemarasai hangano omue;
asa ponsabangi anu mompokomasusa.
32A laro masusa hangano omue ondae mpenaniako ponsabangi,
mensabangiko:
Isema kana Tirusi, anu rinopuomo
a ntonga ntahi malua?
33Umarino luwuno parewamu hawe inso a ntahi
omue mompokomowohi hadio tongku,
saru hadiono arataa ka balu-balumu
omue mompokokaea luwuno mokole ntolino.
34Kanandio-andio omue tampula luwu hangano tahi
tondu i totono tahi malua;
balu-balu ka luwuno anu mpe'ula a ngkapalamu
toondu saru omue.
35Luwuno palilino wiwi ntahi ntededengke mengkitako;
luwuno mokoleno mebiibi, rupado ntengkuru.
36Puu mpebalu-baludo luwuno tongku mpomansu i aromu,
poko'ariano tuwumu mongkokongiri,
ka tampulakomo mpiha.”
Currently Selected:
Yehesikieli 27: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
