Yehesikieli 26

Pinau anu ta gagi umewaio Tirusi

26:1-21

1 # Yes. 23:1-18; Yoe. 3:4-8; Amo. 1:9-10; Sak. 9:1-4; Mat. 11:21-22; Luk. 10:13-14 A nta'u kohopulu ka asa, tanggala asa wula tinantui, haweomo pau-Do i Ue ndi ongkue, 2”Hei anano mia, hangano Tirusi mepau mongkona Yerusale: Losoko! Masolaomo pewowa langkaido luwuno tongku atuu; onae ta melimba ndi ongkue ranta ka kugagi buke, sine onae gagi tekale-kale, 3onaemo pu'uno kanandiomo pau-Do Ue Ala: Kitao, Aku gagi ewaimu, hei Tirusi. Aku weweuo hadio tongku mpentade umewaiko, kana tahi malua mosaba ira bombano. 4Ira meropuo luwuno rere watuno Tirusi ka mehoao luwuno menarano. Awuno Aku tumadio ranta ka imorina inso ndi onae ka onae Aku mokogagio torukuno watu anu londa. 5Onae ta gagi pompuaia buani a tonga ntahi malua, hangano Ongkue anu pauo, kanandiomo pau-Do Ue Ala. Onae ta gagi pomuruado luwuno tongku. 6Luwuno anano beine anu mpo'ia a wita motu'i ira memateako ponai. Ka ira mento'orio nine Ongkuemo Ue.

7Hangano, kanandiomo pau-Do Ue Ala: Mentee ntu'u, Aku wawao i Nebukanesa, mokole i Babeli inso i utara, mokoledo luwuno mokole, ka i'ewaio Tirusi mompake ngara, kareta, sorodadu mpengara, ka tepumpuno sorodadu anu hadio. 8Onae ta mepateako ira ponai anamu beine a mpada, mompotade rere watu pongkadua, motuda ira parewa porumpa ka pasao kanta umewaiko. 9Tiiano parewa porumpano, ta pino'aro a luwuno rere watumu, ka luwuno menaramu ta pinobangkuako uaseno. 10Ngarano hadio ntu'u ranta omue ta tumutuwiko awuno. Hangano pongkopa-kopano pelempado sorodaduno mpengara ka ke'i-ke'ino karetado, luwuno rere watumu mpondidi-ndidi tempono ipewinsoki ira pewowa langkaimu kana mia mompewinsoki kota anu te'ungkahiomo hangano porumpa. 11Saru luwuno karuno ngarano onae ta lumolandao luwuno pesalaamu. Onae ta mepateako ira ponai palilimu, ka luwuno tugu pinerorohimu ta tebangku a wita. 12Ira merontuo kaeamu ka mpomuruo luwuno balu-balumu. Ira mehoao luwuno rere watumu ka mpobangkuo luwuno rahamu anu tekosi, ka i'amba tinadi watu, keu, ka awumu a laro ntahi. 13#Meng. 18:22Aku mokotampulao maroano penanimu ka unino katapimu nahi ta teronge mbo'u. 14Aku mokogagiko torukuno watu anu londa ka hangano kanandio omue kogagi pompuaia buani ranta nahi kowinangu mbo'u, hangano Ongkue, Ue, anu pauo, kanandiomo pau-Do Ue Ala.

15Kanandiomo pau-Do Ue Ala ndi Tirusi: Nde nahi ta mondidi-ndidike wita i wiwi ntahi rumongeo runtuno tedontamu, tempono mia anu mapari mobelado mperaali hangano pompepatea lumele i tonga-tongamu? 16#Meng. 18:9-10Luwuno mia pinemota'udo tongku anu i wiwi ntahi ta metii potorodo ka mentadi ira lemba meloedo ka melohuo sangkado anu mesora-sora. Ondae ipabawai ira doitoa ka mpentoro a wita; sompo tempo ira medoito ka ntededengke hangano omue. 17Ira mpenaniako ponsabangi mongkona omue ka ira mpotae ndi omue:

Nde kana'umpe kau mansa ropu, tampula inso a ntahi malua,

hei kota anu inunde-unde

kota anu pabawa a ntahi,

omue saru palilimu,

anu mompokodoito

a mpalili i wita motu'i?

18Kanandio-andio, wita i wiwi ntahi gagi doito

a oleo tedontaamu,

humbee, wita anu i wiwi ntahi

ntewuka hangano tampulaamu.

19Hangano kanandiomo pau-Do Ue Ala: I tempono Kupokogagiko kota tekale-kale, kana luwuno kota anu nahina mbo'u palilino, tewala kupokonte'iliakomu tahi malua ka i'aluko mowo, 20ka Aku motiiko meronga luwuno mia anu mpetii a laro ngkaburu a tongku i ndi'ipua. Aku weweuko mo'ia i tolino anu lalu tetotoako kana tekale-kaleno i ndi'ipua, meronga luwuno mia anu mpetii a laro ngkaburu, ka siimo dompo'iangariko mbo'u mia, ka nahi pesabaako mbo'u i witado mia mentuwu. 21#Meng. 18:21Ongkue tumantuiakomu poko'ariano tumuwumu anu mongkokongiri ka nahi kohinawe mbo'u. Omue dome'ungkeko mia, sine nami hinawe mbo'u ranta nahina tampulaano, kanandiomo pau-Do Ue Ala.”

Currently Selected:

Yehesikieli 26: XMZ

Highlight

Compare

Copy