Yehesikieli 25

LUWUNO PINAU ANU TA GAGI UMEWAIO LUWUNO TONGKU

LAMORO 25–32

Pinau anu ta gagi umewaio inuleno i Amoni

25:1-7

1 # Yer. 49:1-6; Yeh. 21:28-32; Amo. 1:13-15; Sep. 2:8-11 Haweomo pau-Do i Ue ndi ongkue, 2”Hei anano mia, po'aroomo rupamu a inuleno i Amoni ka pauomo anu ta gagi umewai ira! 3Pauako iramo inuleno i Amoni: Rongeomo pau-Do Ue Ala: Kanandiomo pau-Do Ue Ala: Hangano omue mebooliako ’Losoko!’ mongkona po'ianga mempori-Ku tempono ilinimpai memporino, mongkona wita Isaraeli tempono wita atuu pinokogagi boni-boni, ka mongkona suku Yehuda tempono ondae asalakono melako a pontadia, 4onaemo pu'uno, mentee ntu'u, Aku meweengakomu a mia inso i sabaano oleo gagi miano. Ira mpowangu pekemaado i olomu ka mpowangu po'iangado. Ira mengkaano wua ngkeu kaangamu ka me'inuo susuno pinotuwumu. 5Aku weweuo Raba gagi tongampada tiado unta ka luwuno kotado inuleno i Amoni gagi po'iangado bawaano bembe bimba. Ka komiu mento'orio nine Ongkuemo Ue.

6Hangano kanandiomo pau-Do Ue Ala: Hangano upetopaakono kaemu ka metundoakono karumu, saru mo'undeakono luwuno o'aliano aroamu te'aro wita Isaraeli, 7onaemo pu'uno, mentee ntu'u, Aku tumandeo kae-Ku umewaiko ka meweengakomu gagi pomuruado luwuno tongku. Aku mokotampulako inso i tongano luwuno tongku ka mepateko inso a luwuno wita, saru rumopuko. Ka kotumo'orio nine Ongkuemo Ue.”

Pinau anu ta gagi umewaio Moabi

25:8-11

8 # Yes. 15:1–16:14; 25:10-12; Yer. 48:1-47; Amo. 2:1-3; Sep. 2:8-11 Kanandiomo pau-Do Ue Ala, ”Hangano motae Moabi: Mentee ntu'u, suku Yehuda atuu mengkena kana luwuno tongku susua, 9onaemo pu'uno, mentee ntu'u, Aku weweuo wita mantandeano Moabi te'ungkahi hangano tekaleno luwuno kota hawe a luwuno kota petidaano, tekosino wita atuu: Beti-Yesimoti, Baala-Meoni ka Kirataimi. 10Aku meweengakono Moabi meronga inuleno i Amoni a mia inso i sabaano oleo gagi tiado, ka si rinambe mbo'u inuleno i Amoni i olodo luwuno tongku. 11Aku modontaiakono pohuku ndi Moabi. Ka ira mento'orio nine Ongkuemo Ue.”

Pinau anu ta gagi umewai ira to Edomi

25:12-14

12 # Yes. 34:5-17; 63:1-6; Yer. 49:7-22; Yeh. 35:1-15; Amo. 1:11-12; Oba. 1-14; Mal. 1:2-5 Kanandiomo pau-Do Ue Ala, ”Hangano Edomi mombalo a nsuku Yehuda ka sala mpoweweu anu langkai hangano moweweu pombaloa ndi ondae, 13onaemo pu'uno, kanandiomo pau-Do Ue Ala, Aku tumandeo kae-Ku umewaio Edomi ka mokotampulao inso ndi onae mia ka kondehora saru weweuo gagi tekale-kale. Inso i Temani hawe i Dedani ira memate tebangkuako ponai. 14Saru kaedo bawaa-Ku Isaraeli Aku weweuo pombalo-Ku ndi Edomi. Ira meweweuo Edomi menunu saru tekuda ka mokulano tekuda-Ku. Ka ira mento'orio nine Ongkuemo anu mombalo, kanandiomo pau-Do Ue Ala.”

Pinau anu ta gagi umewai ira to Pelisiti

25:15-17

15 # Yes. 14:29-31; Yer. 47:1-7; Yoe. 3:4-8; Amo. 1:6-8; Sep. 2:4-7; Sak. 9:5-7 Kanandiomo pau-Do Ue Ala, ”Hangano to Pelisiti mpoweweu pombaloa ka saru po'o'alia i laro aroa dompombalo ponaa-naa aroa ira mpompepate saru aroa mpe'iwali hawe a inulemiu, 16onaemo pu'uno, kanandiomo pau-Do Ue Ala: Mentee ntu'u, Aku tumandeo kae-Ku umewai ira to Pelisiti ka mokotampula ira to Kereta saru mepate ira anu da ntebinta i wiwi ntahi. 17Aku weweuo pombaloa anu lansara ndi ondae tinondaako petunduhi tekuda. Ka ira mento'orio nine Ongkuemo Ue, i tempono Kuweweuo pombaloa ndi ondae.”

Currently Selected:

Yehesikieli 25: XMZ

Highlight

Compare

Copy