Yehesikieli 24

Potundaano kawali anu menta'ilasi

24:1-14

1A nta'u ko'osio, wula kohopulu, tanggala hopulu wula atuu, haweomo pau-Do i Ue ndi ongkue, 2#2Mok. 25:1; Yer. 52:4”Hei anano mia, buriomo tanggala oleo andio, humbee, tanggala oleo andio. A oleo koa mbo'u andio mokole i Babeli mompu'u sumapoio Yerusale. 3Pauomo asa potundaano a nsuku anu umewa ka potaeako ira: Kanandiomo pau-Do Ue Ala:

Naaomo kawali a wawo api, naaomo,

ka uwuomo mbo'u uwoi i larono;

4naaomo batuno bau i larono,

luwuno batuno anu moiko, pa'a ka torukuno;

pokobukeakonomo atuu saru luwuno wuku bininiki.

5Alaomo bimba anu tebiniki,

ka potudaomo mbo'u keu ponahu i totono,

po'ineeomo ninahu atuu ka irede

ka luwuno wukuno gagi molusa i larono.

6Onaemo pu'uno kanandiomo pau-Do Ue Ala: Masolaomo kota anu buke pasua rea, kawali menta'ilasi i larono ka ta'ilasino nahi tetadi inso ndi onae! Luarakonomo nte'o'asa mpole siimo ipinontendeako undi. 7Hangano, rea anu inuwuno da hinawe i tonga-tongano. Onae umuwuo a wawo pongku watu anu londa. Nahi uwuo a wawo wita ranta ka ipokotutuwio pampawu.

8Ka itesingka tekuda-Ku ka moweweu pombaloa, Kunaao reano atuu a wawo pongku watu anu londa ka si tetutuwi. 9Onaemo pu'uno, kanandiomo pau-Do Ue Ala: Masolaomo kota anu buke pasua rea! Ongkue mbo'u mokolangkaio howuno keu. 10Potudaomo tehadio keu, polangaomo api, weweuomo bauno ka itetunu, uwoino mo'are, ka luwuno wukuno mo'ai. 11Naaomo kawali mooa atuu a wawo waro api, ka itetunu ka malano gagi motaha, ranta regeno terawo i larono ka ta'ilasino te'onini. 12Nahina tuduno pe'isei, hangano ta'ilasino anu mokapa nahi pokote'onini inso ndi onae, maupo a laro api. 13Hangano omue kumokoburutiakono mokoburua koroimu, onaemo pu'uno inehe-Ku mokomorinako, sine omue nahi gagi morina inso a mokoburumu. Omue nahi kopinokomorina mbo'u hawe ka itemonto tekuda-Ku ndi omue. 14Ongkue, Ue, anu pauo. Mongkona atuu ta gagi, ka Ongkue anu weweuo. Nahi Ku'ontoo ka nahina pompehohawa, nahina mbo'u pe'o'ole. Aku bitarako montonda pelelu ka wineweumu, kanandiomo pau-Do Ue Ala.”

Mateno beineno i Yehesikieli gagi tondonino tedontano Yerusale

24:15-27

15Ka i'amba haweomo pau-Do i Ue ndi ongkue, 16”Hei anano mia, kitao, Aku umalao inso ndi omue onae anu tedoa ukekewoio, kana ikonao tula, sine siimo ponsabangi ke maupo mengese, ka siimo poluarako uwoi mata. 17Pompemasusamo penoro-noro, si poweweu ponsabangi matea. Wutuomo ramba-ramba ulumu ka pakeomo empehi karumu, si tutuwio i totono rupamu, ka si pongkaa roti po'inombo.” 18I tempono mo'oru ongkue mepau a tongku atuu ka mansano ngkiniwia beineku mate. A mo'oruno mbo'u ongkue moweweu kana anu kupinarentaako. 19Tongku atuu mpotae ndi ongkue, ”Nahi komiu pauakamike hapa pengkonaano anu wineweumiu andio ndi omami?” 20Kusangki ira, ”Pau-Do i Ue haweomo ndi ongkue, 21Pauako iramo suku Isaraeli: Kanandiomo pau-Do Ue Ala: Menteeano Aku kumokoburutio po'ianga mempori-Ku, pabawaa anu pino'undeakomiu, pinemoikono matamiu ka po'eheno sumangamiu. Luwuno anamiu tama ka beine anu binintamiu ira memate ntebangkuako ponai. 22Komiu meweweuo kana anu wineweuku: I totono rupamiu nahi komiu mentutuwio ka roti po'inombo nahi komiu mpongkaa; 23mompake ramba-ramba a ulumiu ka empehino karumiu; ka nahi komiu mponsabangi ke mpengese. Sine, komiu memate hangano salamiu ka pada pompemasusa. 24Kanatuumo i Yehesikieli gagi petondonimiu; mengkena kana anu wineweuno komiu meweweuo. Tewala gagiomo atuu, komiu mento'orio, nine Ongkuemo Ue Ala.

25Omue, anano mia, kombake a oleo Ku'alao bentedo, peramba-ramba anu mompokosanaa, pinemoikono mata, ka tekewoino sumangado, saru luwuno anado tama ka beine, 26a oleo atuu asa mia anu tola ta hawe mowawa lele ndi omue? 27A oleo atuu ngangamu ta te'ungkahi ka komepau a mia anu tola atuu ka nahi kobeebe mbo'u. Hangano kanandio omue kogagi petondonido. Ka ira mento'orio nine Ongkuemo Ue.”

Currently Selected:

Yehesikieli 24: XMZ

Highlight

Compare

Copy