Yehesikieli 23

I Ohola ka i Oholiba mepaekompo ira

23:1-49

1Haweomo pau-Do i Ue ndi ongkue, 2”Hei anano mia, hinao orua beine, anano asa ine. 3Ondae mebelesu i Masiri, ondae mebelesu i tempono da domemongura. I ra'ai wua radado pinisi-pisi, radado da moondo inini-ini. 4Neeno anu te'aka i Ohola, ka neeno uaino i Oholiba, ondae mia-Ku. Ondae me'anaako ira ana ntama ka beine. Mongkona needo, i Ohola onaemo Samaria ka i Oholiba onaemo Yerusale. 5I Ohola mebelesu sekono onae mia-Ku. Onae tesingka a luwuno kinekewoino, a nto Asuri, luwuno sorodadu 6anu mpesangka sawu wungo motu'a, luwuno bupati ka anu mempabawa. Luwuno mia mongura anu montama, anu mpesawi a ngara. 7Onae mebelesu saru ondae, luwuno to Asuri bininiki. Onae kumokoburutio koroino saru luwuno mia ndi sema imingki mewowaliakono, ka saru luwuno lahumoano. 8Onae nahi bintao pebelesuno mompu'u inso i Masiri. Hangano tempono imongura dompewowaliakonomo mia, ka ondae me'ini-inio rada moondono saru mpoweeo pebelesudo ndi onae. 9Onaemo pu'uno, onae Kupeweengakono a ngkaedo kinekewoino, a ngkaedo to Asuri ndi sema imingki mewowaliakono. 10Ondae mesungkeo pinekaria winunino, luwuno anano tama ka beine merinako ka onae pinepateako ponai. Hangano kanandio onae gagi wua wiwido beine hangano pohuku dinontaiomo ndi onae.

11I Oholiba, uaino, kumitao mongkona atuu, sine onae laluaopo imingki mewowali sekonopo akano, ka pebelesuno ilaloio pebelesuno akano. 12Onae tesingka a nto Asuri, a luwuno bupati ka anu mempabawaio, a nsorodadu anu mpesangka soompo ka anu mpesawi a ngara, luwuno mangalitau anu montama. 13Kukitao ikokoburutio koroino. Peleludo orua ira mengkena. 14Tendeano onae tetiangi pebelesuno. Ikitao gambarano tama ngginori a rere, gambarado to Kasidimi, ngginori a laro sora motaha melanga, 15tongano binooako peboo ntonga, uluno mompake peboo ulu anu hinao ndoe-ndoeno, luwuno tengkita kana petewawa sorodadu kana rupado to Babeli inso i Kasidimi, wita hinaado. 16Umarino kumitao matano, onae mingki mewowaliako ira ka montena mia lumako ndi ondae i wita Kasidimi. 17Ka i'amba to Babeli me'aiwa ndi onae, a mpoturia pewowalia ka mengkokoburutiakono pebelesuado. Umarino gagi mokoburu hangano ondae, onae meliahako inso ndi ondae. 18Hangano onae weweuo pebelesuno nahi pewuni-wuni ka mopokitao pinekaria winunino, Ongkue mbo'u meliahako inso ndi onae hangano mokoburu, kana Kupeliahako inso ndi uaino. 19Onae moweweu laluaopo hadio pebelesuno rumambeo tempono da imongura ipebelesu i wita Masiri. 20Onae mingki mewowaliako ira luwuno wali-walino mpebelesu, anu pinekaria winunino kana anuno kalide anu tepanano uwoino kana tepanano uwoi anuno ngara. 21Omue mosisiriakono mokoburua tempo da umongura, tempono to Masiri me'ini-inio radamu ka mempisi-pisio wua rada ana beinemu.

22Onaemo pu'uno, hei Oholiba, kanandiomo pau-Do Ue Ala, lano meliahakokomo inso a luwuno kinekewoimu, sine mentee ntu'u, Aku tumena ira ka dompelelu me'ewaiko. Aku wawa ira umewaiko inso a mpehori-horimu: 23to Babeli ka luwuno to Kasidimi, to Pekoda, to Soa ka to Koa, ka luwuno to Asuri mperonga saru ondae, mangalitau anu montama, luwuno bupati ka luwuno anu mempabawa, luwuno petewawa sorodadu ka luwuno sorodadu, luwuno anu mpesawi a ngara. 24Ondae me'aiwa me'ewaiakomu kareta mpetea, kareta meroda, ka asa tepumpuado luwuno tongku. Ira mpopatinda kanta langkai ka kodei saru songko umewaiko limbu-limbu. Aku meweengakono pohuku andio ndi ondae ka ira mebitarako montonda songkado. 25Aku mombaloakono mosiri-Ku ndi omue, ka ira meweweuko a laro ntekuda, enge ka birimu ira menseseio ka ondae anu da tebinta i olomiu ira memate tebangkuako ponai. Ondae merako ira anamu tama ka beine ka toreano i olomiu ta kumaano api. 26Ira melohulambeko ka merontuo luwuno peramba-rambamu. 27Aku weweuo ka upena-naakono mokoburumu ka pebelesumu mompu'u inso i wita Masiri, ranta nami upesili-sili mata mbo'u ndi ondae ka nahi domerinorambe mbo'u to Masiri.

28Hangano kanandiomo pau-Do Ue Ala: Kitao, Aku meweengakomu a ngkaeno mia anu ino'aliaakomu, maupo upeliahakomo inso ndi ondae. 29Ira meweweuakomu po'o'aliaako, merontuo luwuno hasilino pine'iseiakomu, ka mebintako kolambe-lambe, ranta pinekaria winuni pebelesumu tengkita. Mokoburumu ka pebelesumu 30mowawaakomu mongkona andio, hangano omue mebelesu saru tumonda ira tongku ka kumokoburutiakono koroimu lahumoado. 31Omue tuwu tumondao peleluno akamu, onaemo pu'uno Aku mopo'inuko inso a mpialano. 32Kanandiomo pau-Do Ue Ala:

Omue asalakono mo'inu inso a mpialano akamu,

piala anu ondalo ka malua,

onaemo piala anu hadio ihino;

omue gagi pengingisia ka pasinggiria.

33Omue kobuke molangua ka masusaa.

Piala mongkokongiria ka boni-bonia,

pialano akamu Samaria.

34Omue uminuo ranta ka ipingko,

ngumaio peha-pehano,

ka urakuo wua radamu.

Hangano Ongkue anu pauo, kanandiomo pau-Do Ue Ala. 35Onaemo pu'uno, kanandiomo pau-Do Ue Ala: Hangano omue kumolupe Aku ka mebungkui Aku, kanandio-andio tembiomo asa-asamu mokoburumu ka pebelesumu.”

36Ka Do'amba i Ue mepau ndi ongkue, ”Hei anano mia, Behekoke bitara ira i Ohola ka i Oholiba ka pauako ira luwuno wineweudo anu mokoburu? 37Hangano ondae monsosabo, kaedo meranoako rea. Ondae monsosaboako mesombai ira lahumoado, maupo ana ntamado anu pine'anaako ana-Ku dopesombaakono gagi pesomba laro api a luwuno lahumoado ka igagi kaanga. 38Umarino atuu, ondae mbo'u meweweuo mongkona andio ndi Ongkue: Ondae mensosa'aio po'ianga mempori-Ku a oleo atuu ka mengkokoburutio luwuno oleo Saba-Ku. 39Tempono domensumbele ira anado tiado lahumoado, ondae me'aiwa a oleo atuu a mpo'ianga mempori-Ku ka melimpaio memporino. Mentee ntu'u, onaemo andio anu wineweudo a laro raha-Ku. 40Tamoako mbo'u ondae mpo'ema ka dome'aiwa mia inso a mpo'ianga anu olai saru mpontena mia melako a mia atuudo, ka mentee ntu'u, mia mbo'u atuudo me'aiwa. Hangano ondae ka upedolo, pokontekosio giremu ka koroimu ramba-rambaakono peramba-ramba. 41Omue pentoro a mpoturia anu tekosi ka i arono tetinda meda. A wawo meda atuu naao dupa-Ku ka lana-Ku. 42Ka i'amba terongeomo suara maroano mia anu mpesana-sanaa, ka i olodo mia hadio atuu tewinso anu wela memolangu anu mentinena inso i pada one. Ondae mpemala-mala a ngkaedo ka ramba-ramba ulu marambaa a uludo. 43Ongkue mepau: Nde da moweweu pebelesuake bunga anu moleu andio? Mia mebelesu saru onae, humbee, saru onae. 44Ondae me'aiwa ndi onae kana mia aiwa a beine belesu. Kanatuumo dome'aiwa ndi Ohola ka ndi Oholiba, beine mokoburu atuu. 45Sine mia mentee ta bitara ira kana mia bitara ira beine anu mponsosabo ka anu mpo'uwu rea. Hangano ondae beine monsosabo ka kaedo meranoako rea.”

46Hangano kanandiomo pau-Do Ue Ala, ”Po'ineeomo ipentade asa tepumpuano mia umewai ira ka po'ineeomo domempineweengako a mongkokongiria ka pomurua. 47Tepumpuno mia andio ta wuno ira, umimpahiako ira ponai, mepate ira ana ntama ka anado beine saru sumongkoo luwu rahado ka ipingko. 48Aku mokompenaa-naao mokoburua i wita atuu ka luwuno beine ira mpekokoongakono pepopoto'ori atuu ka nahi ira mpoweweu mokoburua mbo'u kana anu wineweumiu. 49Mia ta mombaloakono mokoburumiu ndi omiu ka omiu asalakono tumembio luwuno halamiu hangano omiu mesombai ira lahumoa. Ka komiu tumo'orio nine Ongkuemo Ue Ala.”

Currently Selected:

Yehesikieli 23: XMZ

Highlight

Compare

Copy