Yehesikieli 18

Sompo mia to'oriano tuwuno

18:1-32

1Ka haweomo pau-Do i Ue ndi ongkue, 2#Yer. 31:29”Hinao hapa saru omue, ranta ka imempauo popotundaa pau andio i wita Isaraeli: Luwuno ama mpongkaa wua momata ka ngisido anado gagi mongilu? 3A nee-Ku anu tuwu, kanandiomo pau-Do Ue Ala, nahi komiu mempauo mbo'u popotundaa pau andio i Isaraeli. 4Mentee ntu'u, luwuno penaa atuu Ongkue ueno! Moiko penaano ama maupo penaano ana atuu Ongkue ueno! Isema anu moweweu hala, onaemo anu asalakono mate.

5Tewala asa mia onaemo asa mia mentee ka onae moweweu moleoa ka menteea, 6onae nahi pongkaa bau pesomba a wawo ntorukuno ke mo'aroo matano a luwuno lahumoado suku Isaraeli, nahi sosa'aio beineno pe'asa miano, nahi pewowaliakono beine anu tekonai ihaweo wulano, 7nahi pompokonsii mia susua, mokuleo ginadeno mia, nahi porontu maupo hapa, mompaka mia mokoninggo, moweeakono sangka mia kolambe-lambe, 8nahi pompowee saru mo'ema bungano doi ke mo'ala tiangino, moko'olaio koroino inso a molengkua, weweuo songka anu mentee i olono mia saru mia, 9#Ima. 18:5tuwu montonda pompakosi-Ku ka kongko tumondao atora-Ku ka metenunu, onaemo mia mentee, ka onae manasa tuwu, kanandiomo pau-Do Ue Ala.

10Sine, tewala onae hinao asa mia anano gagi puu mporontu, ka anu ineheno mo'uwu rea ke moweweu asa inso a orua rupa atuu, 11maupo amano nahi poweweu maupo te'asa inso a orua rupa atuu; ana atuu mbo'u mongkaa bau pesomba a wawo ntorukuno ka monsosa'ai beineno pe'asa miano, 12mompokonsii mia marasai ka mongkokolaro, morontu, nahi pokuleo ginadeno mia, mo'aroo matano a luwuno lahumoa ka moweweu anu mokoburu, 13mompowee saru mo'ala bungano doi ka mo'ala tiangino, ka mia anu kanandio nahi ta tuwu. Luwuno mokoburua andio iweweuo, onaemo pu'uno onae asalakono mate; reano umaluo koroino onaeno.

14Menteeano, tewala onae hinao asa mia anano ka ana andio kumitao luwuno hala anu wineweuno amano, sine maupo ikitao, onae nahi poweweu kanatuu: 15onae nahi pongkaa bau pesomba a wawo ntorukuno, nahi po'aroo matano a luwuno lahumoado suku Isaraeli, nahi ponsosa'ai beineno pe'asa miano, 16nahi pompokonsii mia susua, nahi po'ema pogade, nahi porontu hapa-hapa, mompaka mia mokoninggo, moweeakono sangka mia kolambe-lambe, 17moko'olaio koroino inso a molengkua, nahi po'ala bungano doi ke tiangino, weweuo atora-Ku ka tuwu montonda pompakosi-Ku, ka mia anu kanandio nahi ta mate hangano salano amano, onae manasa tuwu. 18Amano, anu mo'ala komba tiano, hinao rinontuno, ka weweu ira anu nahi moiko i tonga-tongano tongkuno, mentee ntu'u, onae ta mate hangano salano.

19Sine omiu mpotae: Tembio ana nahi petonda tumembio salano amano? Hangano ana atuu moweweu moleoa ka menteea, metenunu weweuo luwuno pompakosi-Ku, ka ana atuu manasa tuwu. 20#Win. 24:16Mia anu moweweu hala, onaemo anu asalakono mate. Ana nahi ta metonda tumembio salano amano ka ama nahi ta metonda tumembio salano anano. Mia mentee ta tumarimao wua menteeno, ka mia mosa'o gauno ta tumembio poko'ariano pinogauno anu mosa'o.

21 # Yeh. 33:10-20 Sine, tewala mia mosa'o gauno tepidi inso a luwuno hala anu wineweuno ka me'ini a luwuno pompakosi-Ku saru weweuo moleoa ka menteea, ka onae manasa tuwu, nahi ta mate. 22Luwuno polalono songka anu wineweuno nahi ta pinewowolo mbo'u; onae ta tuwu hangano menteea anu wineweuno. 23Nde Aku memoikooke mateano mia mosa'o gauno? Kanandiomo pau-Do Ue Ala. Kombake a ntepidiano ka ituwu? 24Tewala mia mentee mepokule inso a menteeno ka moweweu molengkua kana luwuno mokoburua anu wineweuno mia mosa'o gauno, nde ta tuwuke onae? Luwuno menteea anu wineweuno nahi ta pinewowolo mbo'u. Onae asalakono mate hangano nahi petenunu ka hangano hala anu wineweuno.

25Sine, mpotae komiu: Wineweu-Do i Ue nahi kona ntu'u! Rongeomo ari, hei suku Isaraeli, hapake wineweu-Ku anu nahi kona ntu'u ke wineweumiu koa anu nahi kona ntu'u? 26Tewala mia mentee mepokule inso a menteeno ka moweweu molengkua, onae ta mate hangano wineweuno; onae asalakono mate hangano molengkua anu wineweuno. 27Sine, tewala mia mosa'o gauno tepidi inso a wineweuno ka onae moweweu moleoa ka menteea, onae ta kumaduduio penaano. 28Ipokonto'orio ka tepidi inso a luwuno polalono songka anu wineweuno, ka onae manasa tuwu, onae nahi ta mate. 29Sine, dompotae suku Isaraeli: Wineweu-Do i Ue nahi kona ntu'u! Hapake wineweu-Ku anu nahi kona ntu'u, hei suku Isaraeli, ke wineweumiu koa anu nahi kona ntu'u?

30Onaemo pu'uno, hei suku Isaraeli, Aku humuku komiu singge mia montonda wineweuno, kanandiomo pau-Do Ue Ala. Tepidimo ka pepokulemo inso a luwuno polaloamiu songka, ka si mongkona atuu gagi watu tetiduamiu a laro sala mpoweweu. 31Tadiomo inso ndi omiu luwuno polalo songka anu wineweumiu ndi Ongkue ka pokowo'ohuomo aroa ka penaamiu! Tembioke asalakono komiu memate, hei suku Isaraeli? 32Hangano, nahi Kupemoikoo a mateano te'asa mia, kanandiomo pau-Do Ue Ala. Tepidimo, ka imentuwu!”

Currently Selected:

Yehesikieli 18: XMZ

Highlight

Compare

Copy