Yehesikieli 19
19
Ponsabangi mongkona mokoledo to Isaraeli
19:1-14
1Ka omue, penaniakonomo ponsabangi mongkona luwuno petewawado to Isaraeli. 2Potaemo kanandio,
”Inemu gagiomo ntu'u singa waino
i olodo luwuno singa!
Onae mepombole i olodo singa mongura,
ka mo'uo ira anano.
3Onae mokolangkaio asa inso a luwuno anano,
gagi singa mongura;
singa mongura mepaguru momperangkami,
maupo mia iteleo.
4Luwuno tongku merongeo mongkona onae,
onae tekadu a laro aa kinekedo;
ka rinendeako kai
winawa i wita Masiri.
5Tempono ipokonto'orio nahi gagi usahano
ka pomperorohiano tampulaomo,
i'alao anano anu susua
ka ipokolangkaio gagi singa mongura.
6Anano andio melempa-lempa i olodo bawaano singa,
onae gagi singa mongura,
onae mepaguru momperangkami,
maupo mia iteleo.
7Onae sumolangi ira bentedo
ka kumale-kaleo luwuno kotado.
Tolino saru luwuno ihino mpo'ia medoito
rumongeo unino pengaolino.
8Luwuno tongku mpentade me'ewaio
inso a luwuno wita anu lumimbuo,
ondae menta'oo buani ira merakoo
ka mengkaduo a laro aa kineke.
9Onae wininsoako kai a laro mpo'ukoa,
winawa i arono mokole i Babeli ka wininso a laro torungku,
ka si teronge mbo'u pengaolino
a wawo luwuno torukuno Isaraeli.
10Inemu anu me'asa rea saru omue kana keu anggoro,
anu tepaho umpeda uwoi,
mewua ka mesampa
hangano uwoi anu hadio ntu'u.
11Ndi onae hinao sampa anu moroso
anu gagi tuko poparentaa.
Onae ondau ntu'u
i olodo sampano anu poore,
ka gagi tengkita hangano mantandeno
ka hangano sampa motutuno anu hadio.
12Sine, a laro ntekuda onae tebuta
ka pinetadiako i tolino;
angi sabaano oleo mokomoleuo mokari,
wuano sinintaki
sampano anu moroso gagi moleu mokari
ka ikaano api.
13Kanandio-andio onae tepaho i pada one,
a wita anu motu'i ka mokorangaako uwoi.
14Ka i'amba meluarakoomo api inso a sampano
anu kumaano sampa motutuno ka wuano,
ranta nahina mbo'u ndi onae sampa anu moroso
ka nahina tuko poparentaa.”
Ndiomo ponsabangi ka ta pinake gagi ponsabangi.
Currently Selected:
Yehesikieli 19: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
