Yehesikieli 17

Potundaano mongkona mokole Sedekia nahi petenunu

17:1-24

1Ka i'amba haweomo pau-Do i Ue ndi ongkue, 2”Hei anano mia, pauomo asa singguru ka asa potundaano a nsuku Isaraeli. 3Potaemo, Kanandiomo pau-Do Ue Ala:

Asa manu-manu rajawali langkai anu mepani langkai ka ondau,

buke wuluno mpesora-sora

aiwa a ntorukuno Libano.

Ka onae mo'ala sampano keu arasi,

4ipuduo mumuno anu lalu i untuno;

ka iwawao i asa wita po'asa-asaa,

ka i'amba numaao a ngkota pebalu-balua.

5Onae mo'ala wuku mpinopaho inso i wita atuu

ka pahoo a lere anu tetindaomo pinorawoi.

Inaao umpeda uwoi anu hadio ntu'u

kana teweweuno keu gandarusa.

6Wuku mpinopaho atuu tuwu gagi keu anggoro

anu marombo, tuwuno reempe;

ka luwuno sampano melongku te'aro a manu-manu atuu

ka luwuno hakano kongko mpiha i totono.

Kanatuumo onae gagi keu anggoro,

motuwu ira sampano,

ka lumuarako ira sampa motutu marombo.

7Hinao mbo'u manu-manu rajawali langkai anu susua,

mepani langkai ka mewulu mokapa.

Kitao, keu anggoro andio mo'aro ira hakano a manu-manu atuu

ka weroo luwuno sampano a manu-manu atuu,

ka i'inuwoi

inso a bede pahoano.

8Kahinaano, onae pinaho a lere anu moiko,

umpeda uwoi anu hadio ntu'u,

ka ipesampa-sampa, mewua,

ka gagi keu anggoro anu moiko.

9Pauomo: Kanandiomo pau-Do Ue Ala:

Nde ta mehasilike atuu?

Nde nahi ta binutake luwuno hakano

ka sintaki wuano, ranta ka imokari?

Luwuno lewe mongurano gagi mokari:

Nahi pongkere kae moroso ka hadio mia

ba ibinuta hawe a luwuno hakano.

10Kitao, one lano pinaho,

sine nde ta koa mompowee hasili?

Nde onae nahi ta moleu mokari tewala i'aluo angi sabaano oleo?

Onae ta moleu mokari a bede po'iangano tuwu atuu.”

11Haweomo pau-Do i Ue ndi ongkue, 12#2Mok. 24:15-20; 2Taw. 36:10-13”Pauako iramo suku me'ewa: Nahi imento'orioke hapa pengkonaano andio? Pauo: Kitao, mokole i Babeli hawe i Yerusale. I'alao mokole ka luwuno mia pinemota'uno ka i'amba wawa ira i Babeli meronga onae. 13Ka i'amba umalao asa mia anu inso a inuleno mokole, moweweu pedandia saru onae, ka weweuo ka ipesumpa. Onae umala ira mbo'u mia mempabawa i wita atuu, 14ka igagi molema poparentaa atuu ka nahi pe'ewa mbo'u, saru mbo'u uminio moroso pedandia atuu ranta ka ipekorahako mpiha. 15Sine, mia atuu umewa ndi onae saru montena mia lumako i Masiri ka ipinoweeako ngara ka sorodadu anu langkai. Nde ta mehasilike onae? Nde ta mokotolake mia moweweu kanatuu? Nde ta mokotolake mia anu mohapu pedandia? 16A nee-Ku anu tuwu, kanandiomo pau-Do Ue Ala, onae manasa mate i Babeli, a mpo'iangano mokole anu motoroo gagi mokole. Hangano, onae me'uru-uruo sumpa anu inemano mokole inso ndi onae ka humapuo pedandiano mokole atuu saru onae. 17I Pirao nahi ta mokowalio a laro mpeteaa saru sorodadu anu langkai ka tepumpuano mia hadio, tempono iwineweu rere watu pongkadua ka bente pongkadua pinontade ka irinopu hadio mia. 18Onae me'uru-uruo sumpa ka humapuo pedandia. Mentee ntu'u, maupo ipemoikoo mongkona atuu saru mesangkalima, sine luwuno atuu ilimpaio, ka onae nahi ta tola. 19Onaemo pu'uno, kanandiomo pau-Do Ue Ala: A nee-Ku anu tuwu, manasa Aku motiiakono a uluno sumpano ndi Ongkue anu pine'uru-uruno ka pedandia-Ku anu hinapuno. 20Aku tuma'oo buani-Ku rumakoo ka a laro dampa-Ku onae ta tepongko'ala. Aku wawao i Babeli ka i ra'ai Aku mekara-kara saru onae, hangano onae nahi petenunu ndi Ongkue. 21Luwuno sorodadu bininiki ira memateako ponai ka anu tola ta siniarawo a luwuno mata angi. Ka komiu mento'orio nine Ongkuemo Ue, anu pauo.

22Kanandiomo pau-Do Ue Ala: Ongkue isa'a umalao sampa inso a untuno keu arasi anu ondau ka pahoo. Aku puduo inso a untuno anu i wawono ntu'u ka da mongura ka i'amba Ongkue isa'a pahoo a wawo ntorukuno anu tedoa ondau. 23A wawo ntorukuno Isaraeli anu ondau onae Aku pahoo, ka imesampa hadio ka mewua gagi keu arasi anu moiko. Luwuno rupano manu-manu ka luwuno anu mepani mpo'ia i totono; ondae mpe'engo-engo i totono luwuno sampano. 24Luwuno keu a lere ira mento'orio nine Ongkue, Ue, moko'owowao keu anu ondau ka moko'ondauo keu anu owowa, weweuo keu anu tuwu gagi moleu mokari ka weweuo keu anu moleu mokari wali mentumba. Ongkue, Ue, anu pauo ka Aku weweuo.”

Currently Selected:

Yehesikieli 17: XMZ

Highlight

Compare

Copy