Yehesikieli 1

LUWUNO PINAU ANU TA GAGI UMEWAIO ISARAELI

LAMORO 1–24

Nabi kumitao maramba-Do i Ue

1:1-28

1 # Meng. 19:11 A nta'u kotolu pulu, a wula ko'opaa tanggala olima wula atuu, tempono kuperongaako ira mia mentinadi kongko i wiwi Ngkoro Kebari, te'ungkahiomo langi ka kukita ira pongkita mongkona Ondae Ue Ala. 2#2Mok. 24:10-16; 2Taw. 36:9-10A ntanggala olima wula atuu, a nta'u ko'olima umarino tinadi mokole Yoyakimi, 3haweomo pau-Do i Ue ndi sando mpesomba Yehesikieli, anano i Busi, i witado to Kasidimi i wiwi Ngkoro Kebari, ka i ra'aimo pabawa-Do i Ue lumimbuo.

4Ka ku'amba kumitao, mentee ntu'u, angi mokora mepuuri inso i utara saru asa boto seru langkai me'ihi api anu tesosangkilo anu ilimbuo wanta. I tonga-tongano api atuu tengkita asa kana suasa mangkilo. 5#Meng. 4:6Inso i tonga-tongano mbo'u me'umbaako hapa kana anu tuwu merupa opaa. Kanandiomo tadedo: ondae kana mia, 6sine singge hinao opaa rupano ka singge hinao mbo'u opaa panino. 7Karudo moleo ka pelengkarudo kana kukuno ana nsapi. Luwuno karu andio mangkilo kana mala anu da sarai ihinahi. 8A opaa horido, i totono luwuno panino, tengkita kaeno mia. Rupa ka panido opaa ira kanandio: 9panido ntepodanggi. Nahi dompewolili tempono dompelempa, singge melempa moleo i arono. 10#Yeh. 10:14; Meng. 4:7Rupado tengkita kanandio: Opaa ira merupa mia i arono, rupano singa i koana, rupano sapi i manggali, ka rupano rajawali i bungkuno. 11Kanandiomo rupado. Luwuno panido domewileo kontahane i wawono. Singge anu tuwu hinao asa pasa panino anu pada tepodanggi ka asa pasa pani anu susua tumutuwio koroido. 12Singge melempa moleo i arono. Ba isua te'aroano penaa atuu ta lumako, i ra'aimo domelako; nahi dompewolili tempono dompelempa. 13#Meng. 4:5I tongado anu mentuwu atuu tengkita asa kana waro api anu melanga, kana pansona, anu melelu ngkoraane ngkoramai i olodo anu tuwu atuudo. Api atuu mewanta ka inso a api atuu koliki mpesosawu. 14Anu tuwu atuudo mpenee ngkoraane ngkoramai kana koliki.

15 # Yeh. 10:9-13 Kukitao, mentee ntu'u, hinao asa roda a wawo wita i horino nte'osa anu tuwu saru opaa rupa atuu. 16Rupano luwuno roda atuu ka tadeno tengkita kana mangkilono paramata pirusu ka opaa ira mpe'asa rupa. Rupa ka tadeno kana roda i tonga-tongano roda. 17Tempono melempa luwuno roda atuu polio te'aro a opaa nsala; nahi dompewolili tempono dompelempa. 18#Meng. 4:8Ondae hinao gorino anu mantande ka mompokodoito; lumimbuo gorino anu opaa atuu bukeako mata. 19Tempono dompelempa anu tuwu atuu, luwuno roda atuu mbo'u melempa i horido; ka luwuno anu tuwu atuu tetande inso a wita, luwuno roda atuu metonda tetande. 20Te'aro isua penaa atuu ta lumako, i ra'aimo domelako, ka luwuno rodano meronga tetande, hangano penaado anu tuwu atuu kongko i larono luwuno rodano. 21Tempono dompelempa anu tuwu atuu, luwuno roda atuu melempa; tempono dompenaa-naa, luwuno roda atuu menaa-naa; ka tempono dontetande inso a wita, luwuno roda atuu meronga tetande saru ondae; hangano penaado anu tuwu atuu kongko i larono luwuno rodano.

22A wawo uludo anu tuwu atuu hinao anu kana longkuno langi, anu tengkita kana mangkilono seru baku anu mompokodoito, tepadindi a wawo uludo. 23I totono longkuno langi atuu panido tewile moleo, anu asa tepodanggi saru anu susua. Singge hinao asa pasa pani anu tumutuwio koroido. 24#Meng. 1:14-15; 19:6Tempono dompelempa, kurongeo unino panino kana unino uwoi mentoa anu u'uru, kana suara-Do Anu Tedoa Pabawa, kana suara magagado sorodadu. Tempono dompenaa-naa, ipo'inee panino telupe. 25Ka i'amba terongeomo suara i wawono longkuno langi anu kongko a wawo uludo. Tempono dompena-naa, panino telupe. 26#Yeh. 10:1; Meng. 4:2-3Iwawono longkuno langi anu iwawono uludo, hinao asa anu kana tadeno kadera poparentaa, tengkita kana paramata lasuaradi. I wawono anu kana tadeno kadera poparentaa atuu hinao asa anu tengkita kana rupano mia. 27#Yeh. 8:2Inso a hapa anu kana tadeno tongano hawe i wawono kukitao kana asa suasa mangkilo ka kana api anu binorungi limbu-limbu; ka inso anu kana tadeno tongano hawe i totono kukitao kana api ilimbuo wanta. 28Kana longkuno toro'ue, anu tengkita a nseru tempono usa, kanatuumo tengkita wanta anu lumimbuo. Kanatuumo tengkita rupano maramba-Do i Ue. Tempono kukitao ongkue menggolontu mesomba, ka ku'amba rumongeo suara-Do anu mepau.

Currently Selected:

Yehesikieli 1: XMZ

Highlight

Copy

Compare