Yehesikieli 2

Ondae i Ue moboio ka tumenao i Yehesikieli

2:1–3:15

1Ondae i Ue mepau ndi ongkue, ”Hei anano mia, pentademo. Aku mepau saru omue.” 2Kontongaa-Do mepauakune, Penaa-Do i Ue lumimbu aku ka montade aku. Ka ku'amba rumonge Ira anu mepauakune.

3Pau-Do ndi ongkue, ”Hei anano mia, Kutenako a nto Isaraeli, a tongku mpe'ewa anu me'ewa iramo ndi Ongkue. Ondae ka uempu'udo mpe'ewa iramo ndi Ongkue, hawe mbo'u oleo andio. 4A inule anu me'ulu watu ka moteaomo aroa andio Kutenako. Omue asalakono pauo ndi ondae: Kanandiomo pau-Do Ue Ala. 5Moiko domperorongeakono ke naahi, hangano ondae atuu suku anu mpe'ewa, ira mento'orio nine asa nabi kongko i tonga-tongado. 6Sine omue, anano mia, siimo doitoako ira ke maupo luwuno paudo, maupo omue saru ewo rui ka omue mo'ia umpeda kasi-kasi molea. Siimo doito rumongeo luwuno paudo ka siimo lingkauakono rupado, hangano ondae atuu suku anu mpe'ewa. 7Pohaweomo pau-Ku ndi ondae, moiko domperorongeakono ke naahi, hangano ondae atuu mpe'ewa.

8Sine omue, anano mia, rongeomo hapa anu pinau-Ku ndi omue; siimo pe'ewa kana suku anu mpe'ewa andio. Pengangamo ka kaanomo hapa anu Kuweeakomu.” 9#Meng. 5:1Kukitao, menteeano hinao kae anu tetasiako ndi ongkue, ka i larono hinao paluluno wunta. 10Ka do'amba wireio i aroku. Paluluno atuu binuri patimbali ka i ra'ai teburi penani ponsabangi, pompemasusa ka pompe'anaiki.

Currently Selected:

Yehesikieli 2: XMZ

Highlight

Copy

Compare