Peluarakoa 27

Meda pontunua pesomba

27:1-8

1 # Pel. 38:1-7 ”Omue asalakono moweweu pontunua pesomba inso a ngkeu akasia, olima hiku ondauno ka olima hiku maluano, gagi mensiu opaa mengkena ondauno ka maluano, sine mantandeno otolu hiku. 2Omue asalakono moweweu tandu-tanduno ko'opaano siuno. Tandu-tanduno atuu tepe'asa saru meda pontunua pesomba ka apiiakono mala. 3Omue poweweu mbo'u ba te'opia kawali ponaapa awuno, sikopa, loea kodei ponsiwuino, sarampano ka polu pontunua halo. Luwuno parewa atuu asalakono weweuo inso a mala. 4A meda pontunua pesomba atuu asalakono poweweu tarali kana mala inena, ka a mala inena atuu asalakono poweweu te'opaa mala-mala inso a mala a opaa tompano. 5Omue asalakono numaao mala inena atuu i larono meda pontunoa pesomba itotono wiwino ngkoloane ranta tia oruano mantandeno meda pontunua pesomba. 6Omue asalakono moweweu keu ponsela tiano meda pontunua pesomba atuu, keu ponsela inso a ngkeu akasia ka apiiakono mala. 7Keu ponsela atuu asalakono wininso a laro mala-mala atuudo ka asalakono kongko i apano meda pontunua pesomba atuu i tempono meda pontunua pesomba atuu tinande. 8Meda pontunua pesomba inso a dopi atuu asalakono weweuo mooa. Kana anu utinisoako ndi omue i wawo ntorukuno atuu, kanandiomo i wineweu pontunua pesomba atuu.”

Kintalano Kema Mempori

27:9-19

9 # Pel. 38:9-20 ”Omue asalakono moweweu kintalano Kema Mempori. I selatano kintala atuu asalakono wineweu sawu pelingo po'oloti inso a lena alusu anu kinoloro banano, asa etu hiku ondauno i apano anu asa atuu. 10Luwuno karuno rua pulu ka empehino karuno atuu rua pulu koa mbo'u, luwuno asalakono inso a mala. Luwuno kai a ngkaruno atuu ka luwuno ponsombuno inso a nsalaka. 11Kanatuu koa mbo'u i utarano, a ondauno, asalakono hinao sawu po'oloti, ondauno asa etu hiku, luwuno karuno rua pulu ka empehino karuno atuu rua pulu koa mbo'u, luwuno inso a mala, ka luwuno kai a ngkaruno atuu ka luwuno ponsombuno asalakono inso a salaka. 12A maluano, i sumooano oleo kintala atuu, asalakono hinao sawu po'oloti, maluano lima pulu hiku, karuno hopulu ka empehino hopulu. 13Maluano kintala atuu, i arono anu i sabaano oleo lima pulu hiku. 14Hopulu ka olima hiku sawu po'oloti tiano i apano anu asa, saru otolu karuno ka otolu empehino, 15ka hopulu ka olima hiku sawu po'oloti tiano i apano anu susua, saru otolu karuno ka otolu empehino. 16Sine tiano pewowa langkai kintala atuu, opaa karuno ka opaa empehino, sawu po'oloti rua pulu hiku, anu sinula inso a bana wungo motu'a, wungo mongura, motaha motu'a ka inso a lena alusu anu kinoloro banano. 17Luwuno karuno anu lumimbuo kintala atuu asalakono pinosombuako luwuno ponsombu inso a nsalaka, luwuno kaino inso mbo'u a nsalaka, sine empehino inso a mala. 18Ondauno kintala atuu asalakono asa etu hiku, maluano lima pulu hiku ka mantandeno olima hiku. Sawu po'olotino asalakono inso a lena mopute anu kinoloro banano, ka luwuno empehino inso a mala.

19Luwuakoano parewa tiano mperupa-rupa anggaa i Kema Mempori ka luwuno pandorano kintala, luwuno inso a mala.”

Lanano hulu

27:20-21

20 # Ima. 24:2-3 ”Omue asalakono tumena ira to Isaraeli mpowawa ndi omue lana saitu inisa anu nahina salono pakea a hulu kai melanga mpiha hulu. 21I larono Kema Tepotowoa i arono pelingo anu lumingoo burua songka, i Haruni ka luwuno anano patindao hulu atuu mompu'u ngkiniwia ranta hawe mo'oru i aro-Do i Ue. Onaemo atuu pompakosi anu tinonda ranta nahina tampulaano a nto Isaraeli hawe a inuledo.”

Currently Selected:

Peluarakoa 27: XMZ

Highlight

Compare

Copy