Peluarakoa 28

Sangkado sando mpesomba

28:1-43

1 # Pel. 39:1-31 ”Wawao i Haruni akamu ka luwuno anano ndi omue inso i olodo to Isaraeli ka dompopekakaako gagi sando mpesomba ndi Ongkue, i Haruni saru i Nadabi, i Abihu, i Eleasa ka i Tamari, luwuno anano i Haruni. 2Omue asalakono poweweu sangka mempori tiano i Haruni, akamu ka imewanta ka maramba. 3Omue asalakono pauako ira luwuno mia anu hinao ponto'orino, anu umariomo Kupokobukeako ira penaa ponto'ori ka dompoweweu sangka tiano i Haruni anu mokomemporio, kai pompekakaako gagi sando mpesomba ndi Ongkue. 4Ndiomo sangka anu asalakono ira meweweuo: tutuwi rada, lemba epo, lemba meloe i bungkuno, lemba meloe i larono anu sinula, peboo ulu ka sulepe. Asalakono kanandiomo domeweweuo sangka mempori tiano i Haruni, akamu ka tiado luwuno anano, ka dompopekakaako gagi sando mpesomba ndi Ongkue. 5Gagi asalakono ira mempo'ala wulaa, bana wungo motu'a, wungo mongura, motaha motu'a ka lena alusu. 6Lemba epo atuu asalakono domeweweuo sinulaako bana wulaa, bana wungo motu'a, wungo mongura, motaha motu'a ka lena alusu anu kinoloro banano. 7Asalakono hinao tutuwi owea anu sinombu a lemba epo atuu ka lemba epo asalakono sinombu i orua tapuno. 8Koloro pontanggo anu kongko a lemba epo atuu asalakono wineweu tepe'asa saru onae ka inso a nsawu anu mengkena: bana wulaa, wungo motu'a, wungo mongura, motaha motu'a ka lena alusu anu kinoloro banano. 9Omue asalakono mo'ala orua paramata kerisopara ka nggorio needo luwuno anano i Isaraeli a mparamata atuu, 10onoo inso a needo a mparamata amba-ambano ka onoo mbo'u nee a mparamata ko'orua, montonda potudano hinaado. 11Mengkena kana puu mponggori paramata monggori sinsi pontondoni, asalakono kau nggorio needo luwuno anano i Isaraeli a orua paramata atuu. Asalakono paramata atuu tanggoakono simpi wulaa. 12Ka i'amba omue numaao orua paramata atuu a orua tutuwi oweano lemba epo gagi paramata pepopoto'ori a nto Isaraeli. I Haruni asalakono wawao needo i aro-Do i Ue a orua tutuwi oweano gagi pepopoto'ori. 13Omue asalakono moweweu simpi wulaa, 14ka orua rante inso a wulaa isa'a. Weweuo kana koloro anu linisu ka potakoo rante linisu atuu a simpi atuu.

15Tutuwi rada po'alaa pompakosi omue asalakono weweuo mengkena kana lemba epo. Omue asalakono weweuo sinula inso a bana wulaa, wungoo motu'a, wungoo mongura, motaha motu'a ka lena alusu anu kinoloro banano. 16Tadeno, asalakono ondauno ka maluano mengkena asa otuwe linupi orua. 17Omue asalakono umatoraakono paramata opaa dede hadiono: yasapisi motaha, kirisoli ka malakiti a mpodedeno amba-ambano. 18A dede ko'orua, watu rea, lasuaradi, yasapisi molowulu. 19A dede ko'otolu, ambara, aki ka kecubu. 20A dede ko'opaa, pirusu, kerisopara ka nepiriti. Kanatuumo luwuno paramata atuu asalakono sinimpiako wulaa a laro mpodedeno. 21Menunu saru needo luwuno anano i Isaraeli, paramata atuu asalakono hopulu ka orua hadiono, sompo paramata, asa nee. Luwuno paramata atuu asalakono ngginori kana sinsi pontondoni, sompo paramata asa nee inso a hopulu ka orua suku atuu. 22Tiano tutuwi rada atuu, asalakono kau poweweu rante inso a wulaa mpena kana koloro anu linisu. 23Asalakono poweweu mbo'u orua mala-mala wulaa tiano tutuwi rada atuu ka orua mala-mala asalakono kau potakoo a orua tompano tutuwi rada. 24Asalakono kau potakoo orua rante wulaa linisu atuu, a orua mala-mala i tompano tutuwi rada. 25Orua tapuno susua inso a rante linisu atuu asalakono kau potakoo a orua simpi atuu. Kanandiomo upotakoakono a ntutuwi oweano lemba epo, i arono. 26Omue asalakono moweweu orua mala-mala wulaa ka potakoakono a orua tompano tutuwi rada atuu, a wiwi larono, anu me'aro a lemba epo. 27Asalakono kau poweweu mbo'u orua mala-mala wulaa ka omue potakoo a orua tutuwi owea lemba epo, a ntotono i arono umpeda sombuno lemba epo saru koloro onggono i wawono. 28Ka i'amba tutuwi rada atuu saru mala-malano asalakono inonggoako bana wungo motu'a a mala-mala lemba epo kai tutuwi rada atuu kongko mpiha i wawono koloro po'onggo lemba epo ka si tepahe inso a lemba epo. 29Kanatuumo i Haruni wawao a radano needo luwuno anano i Isaraeli anu kongko a tutuwi rada po'alaa pomputusi, tempono i pewinsokio po'ianga mempori kai kongko mpiha gagi tondoni pepopoto'ori i aro-Do i Ue. 30#Pod. 27:21; 1Sam. 14:41; Esr. 2:63; Neh. 7:65 Asalakono naao Urimi ka Tumimi i larono tutuwi rada po'alaa pomputusi, kai kongko oruano a radano i Haruni tempono ipewinso me'aro ndi Ondae i Ue. Asalakono iwawao mpiha i Haruni a radano parewa po'alaa pomputusi atuu a nto Isaraeli, i aro-Do i Ue.

31Omue asalakono moweweu lemba meloe i bungkuno i totono lemba epo, luwuno inso a bana wungo motu'a. 32I tongano, asalakono hinao bolono pewinsoano ulu, anu wiwino sinula limbu. Bolono atuu kana we'uno lemba sira kasiteberi. 33A lupino itotono lemba atuu, asalakono kau poweweu wua delima inso a bana wungo motu'a, wungo mongura ka motaha motu'a, lumimbuo lupiano ka mpe'olo-olo saru nggiri-nggiri wulaa. 34Gagi hinao asa nggiri-nggiri wula ka asa wua delima, mpe'olo-olo lumimbuo pelupiano lemba i bungkuno atuu. 35I Haruni asalakono pakeo lemba meloe i bungkuno atuu tempono ipoweweu pesomba, ka unino nggiri-nggiri asalakono teronge tempono ipewinso a mpo'ianga mempori i aro-Do i Ue ka tempono ipeluarako. Tewala kanandio, onae nahi ta mate. 36Omue asalakono moweweu lempe inso a wulaa mpena ka unggorio i wawono kana monggori sinsi pontondoni, ”Mempori ndi Ondae i Ue.” 37Omue asalakono onggoakono koloro wungo motu'a lempe atuu a mpeboo ulu. Lempe atuu asalakono mo'ia i arono peboo ulu. 38Lempe atuu asalakono kongko a ra'ino i Haruni ka onae sumusuruo pokotompaano anu sala a luwuakoano pinesombaakodo to Isaraeli gagi pesombado anu mempori. Lempe atuu asalakono kongko mpiha a ra'ino, ka Dopekono ira i Ue.

39Omue asalakono mohoru lemba meloe i larono anu mepandiri inso a lena alusu, ka inso a lena alusu mbo'u weweuo peboo ulu ka asalakono kau weweo sulepe mengkena anu sinula. 40Kanatuu koa mbo'u luwuno anano i Haruni asalakono poweweu lemba meloe i larono, sulepe ka peboo ulu ka dontekita luwu mewanta ka maramba. 41Luwuno atuu poposangkaakono i Haruni, akamu, saru luwuno anano. Ka u'amba umurapi ira, rumonso ira ka mokomempori ira ka domegagi sando mpesomba ndi Ongkue. 42Poweweuako ira saluara lena anu tutuwio olongkarano. Saluara atuu asalakono inso a lompe hawe a mpa'a. 43I Haruni saru luwuno anano asalakono mempakeo tempono dompewinsokio Kema Tepotowoa ke i tempono domerangku a pontunua pesomba mpoweweu pesomba a mpo'ianga mempori, kasi domensusuruo gagi sala, ka domemate. Onaemo atuu pompakosi ranta nahina tampulaano ndi Haruni ka inuleno.”

Currently Selected:

Peluarakoa 28: XMZ

Highlight

Compare

Copy