Peluarakoa 22

Songka mongkona pe'inia arataano pe'asa mia

22:1-17

1”Tewala asa mia monako sapi ke bimba ka isumbeleo ke i'asao, asalakono i'euo, olima sapi euno asa sapi, ka opaa bimba euno asa bimba.

2Tewala asa mia monako hinawe kontongaano morongka, ka domentunduhio mia ranta kai mate, mia atuu nahi pepasua rea; 3Sine tewala pompepatea atuu tegagi tempono sabaomo oleo, mia atuu mepasua rea.

Mia monako asalakono umomowahio luwuno. Tewala nahi poko'owahio, onae asalakono inasa euno pinonakono. 4Tewala anu pinonakono atuu sapi, kalide ke bimba, da hinawe ndi onae ka da tuwu, asalakono i'euo meluka orua.

5Tewala asa mia mompakambi pinotuwu i lere ke i lere anggoro ka pinotuwu atuu ipotolao ka dompoitu-itu, ranta pinopaho a leredo mia susua pingko domengkaano, asalakono onae mompowee wua mpinopahono anu moiko ntu'u inso a lereno onaeno ke wua anu moiko ntu'u inso a lere anggorono gagi po'euno.

6Tewala hinao api melanga ka ipesaki a laro rui, kai mo'ai gandu hinowu ke gandu anu napi sinowi, saru lereno, mia anu momposaki api atuu asalakono umeuo luwuno.

7Tewala asa mia mompepenaa doi ke sangka a walino, kai pinonako i rahano walino atuu, mia monako mo'owahi euno meluka orua, tewala hinawe. 8Tewala mia monako atuu nahi hinawe, umbu raha atuu asalakono lumako me'aro ndi Ondae Ue Ala ka mokomengkaao nine nahi leluo kaeno umalao arataano walino. 9Sompo ilarono teposisalaa, moiko mongkona sapi, kalide, bimba, sangka, ke sangka hapamokoa anu tetadi, tewala asa mia motae, ”Ndio anuku!”, kara-karado mia orua ira atuu asalakono winawa i aro-Do Ue Ala. Isema anu pinokonsala-Do Ue Ala, asalakono mo'owahi euno meluka orua a mpe'asa miano.

10Tewala asa mia mompepenaa kalide a walino ke sapi ke bimba ke pinotuwu hapamo koa ka pinotuwu atuu mate, ke binelai ke hinao wawao nahina mia kumitao, 11I olodo mia orua ira atuu asalakono inala sumpa i aro-Do i Ue nine nahi komba onae umalao pinotuwuno walino. Anu me'umbuo pinotuwu atuu asalakono tumarimao sumpa atuu, ka siimo ihina po'owahi euno. 12Sine tewala mentee ntu'u pinotuwu atuu ipo'ineeo ka ipinonako, asalakono onae mo'owahi euno ia mia anu me'umbuo. 13Tewala pinotuwu atuu mentee ntu'u iperangkamio kondehora lambaha, asalakono iwawao mopokitao. Siimo ipo'owahi euno.

14Tewala asa mia monsabo asa pinotuwuno inso a walino, ka pinotuwu atuu binelai ke mate, tempo atuu nahi kongko ueno i tu'ai, asalakono i'euo luwuno. 15Sine tewala anu me'umbuo kongko i tu'ai, siimo i'owahio euno. Tewala pinotuwu atuu sinewa, owahino euno tewinsoomo a nsewano.

16 # Win. 22:28-29 Tewala asa mia mompopandei asa da ana beine anu napi pesambora, ka ipe'asa mpoturiakono, asalakono ikombiao ka ipo'owahi kowei. 17Tewala amano beine atuu mentee ntu'u nahi behe meweengakono anano ndi onae, asalakono kongko i'owahiakono doi menunu langkaino kowei da ana beine.”

Atora mongkona hala anu mokoburu

22:18-20

18 # Win. 18:10-11 ”Asa mia beine pande sihiri si po'ineeo tuwu.

19 # Ima. 18:23; 20:15-16; Win. 27:21 Maupo isema anu mewowaliako pinotuwu, manasa onae ta hinuku mate.

20 # Win. 17:2-7 Isema anu mompesombaako pesomba a pinseombai susua sangkadio ndi Ondae i Ue, asalakono pinokotampula.”

Atora mongkona mia anu nahi pompoli

22:21-27

21 # Pel. 23:9; Ima. 19:33-34; Win. 24:17-18; 27:19 ”Mia hawe si pokonsiio ke komiu me'akalao, hangano maupo i ndi'ipua mia komiu mehawe i wita Masiri.

22Asa mia tuwua beine ke nana'ote nahina amano, si pokonsiio. 23Tewala mansa impokonsii ira, ka mepetulungi ira ndi Ongkue, manasa Aku rumongeo pepetulungido. 24Tekuda-Ku ta tensila ka Aku mepateakomiu ponai, gagi beinemiu ira megagi tuwua beine ka luwudo anamiu gagi nahina amado.

25 # Ima. 25:35-38; Win. 15:7-11; 23:19-20 Tewala omue mompesaboako doi a asa mia inso a bawaa-Ku, mia mongkokolaro i olomiu, si poweweu kana mia mpopebungaako doi ndi onae, si mpo'ema bungano ndi onae.

26 # Win. 24:10-13 Tewala mansako mo'ala lemba meloeno pe'asa miamu gagi pe'inia, asalakono pokuleo ndi onae napi sumoo oleo, 27hangano butu koa onae hawuno, sangka anu metako a ngkoroino. Hapa mbo'u pakeano moturi? Tewala mepetulungi ndi Ongkue, Aku rumongeo hangano Ongkue andio puu pompehohawa.”

Mperupa-rupa pepopoto'ori mongkona memporia

22:28-31

28 # Tin. 23:5 ”Si totonaa Ira Ue Ala kasi tutundali ira petewawa tongkumiu.

29Si tekolupe mompesombaako wua gandumu ka uwoi anggoromu. Anamu tama anu amba-ambano asalakono pesombaakono ndi Ongkue. 30Kanatuu koa mbo'u weweuo a mpinotuwu: sapi ka asa bawaa bembe bimbamu. Opitu oleo tehineno anano amba-ambano moiko ipo'ia a ineno, sine a oleo ko'oalu asalakono pesombaakonomo ndi Ongkue.

31 # Ima. 17:15 Omiu megagi mia pinokomempori ndi Ongkue. Si mpokaa bauno pinotuwu pinerangkamino kondehora lambaha a ntonga mpada, sine imentendeako ira dahu.”

Currently Selected:

Peluarakoa 22: XMZ

Highlight

Compare

Copy