Peluarakoa 23

Atora mongkona tiano mia ka oleo Saba

23:1-13

1 # Pel. 20:16; Ima. 19:11-12; Win. 5:20 ”Si pompalele lele anu nahi mentee; si tulungio mia anu sala gagi sakosii anu molengku. 2Omue si tonda-tonda ira mia hadio mpoweweu mosa'o, ka tewala gagi sakosii mongkona asa kara-kara, si tonda-tonda ira mia hadio mpopelengkuako songka. 3#Ima. 19:15 Maupo a mia mongkokolaro, si po'alaako a laro kara-karano.

4 # Win. 22:1-4 Tewala mohaweko sapino iwalimu ke kalideno anu tetadi, pompari-pari pokuleo pinotuwu atuu ndi onae. 5Tewala ukitao kalideno mia mosa'oakomu tebangku idunsio patekeno, si nanta-nanta tulungio. Meronga saru onae potiio patekeno.

6 # Ima. 19:15; Win. 16:19 Si melinggeio tiado mia mongkokolaro i olomiu a laro kara-karano. 7Olaiakono koroimu inso a mpegaupia. Mia anu nahina salano ka mia anu mentee si pepateo, nde mia anu moweweu mosa'o kanatuu, nahi Aku mo'ineeo. 8Si pontarima pompowee nahi moleo, hangano pompowee nahi moleo mompokomorawu ka maupo molino pongkitano, iposuleo kara-karano mia anu mentee. 9#Pel. 22:21; Ima. 19:33-34; Win. 24:17-18; 27:19 Si pokonsii ira mia mehawe, i mento'oriomo aroano mia hawe, nde maupo omiu ndi'ipua mia koa mbo'u mehawe i wita Masiri.

10 # Ima. 25:1-7 I larono onoo nta'u moiko uporawo inii a witamu ka sumowio wuano, 11sine ko'opitu nta'uno asalakono komo'ineeo ka bintao, mia mongkokolaro i olodo tongkumiu ka dompohawe koa kaanga. Hapa anu binintado po'ineeomo domengkaano kondehora a ntobu. Kanatuu koa mbo'u weweuo a lere anggoromu ka lere saitumu. 12#Pel. 20:9-11; 31:15; 34:21; 35:2; Ima. 23:3; Win. 5:13-14 I larono onoo oleo moiko upo'anggao anggaamu, sine oleo ko'opitu asalakono kau penaa-naa, ka dompenaa-naa sapi ka kalidemu ka anado atamu beine ka mia mehawe mpenaa-naa luwu.

13Asalakono impekokoongakono luwuakoano anu pinau-Ku ndi omiu. Si mpopoboi neeno lahumoa, siimo iteronge nee atuu inso a wiwimu.”

Atora mongkona pesombaa ka oleo langkai

23:14-19

14 # Pel. 34:18-26; Win. 16:1-17 ”Pentolu i larono asa nta'u impoweweu popelangkai ndi Ongkue. 15#Pel. 12:14-20; Ima. 23:6-8; Pod. 28:17-25 Oleo Langkai Roti Nahi Peragi asalakono impelangkaio. Kana anu umariomo Kutenaa komiu, i larono opitu oleo omiu asalakono impokaa roti nahi peragi ia tempo anu pinakosi a wula Abi, hangano a wula atuumo omiu mpeluarako inso i wita Masiri. Sine, mia anu mesomba ndi Ongkue, si aiwa moa ngkae. 16#Ima. 23:15-21, 39-43; Pod. 28:26-31 Impelangkaio mbo'u rame-rame umari sumowi, wua amba-ambano inso a mpo'anggamu morawo inii i lere, ka rame-rame pompumpua wua pinopaho, i tempono upopumpu wua pinopaho a mpo'anggamu i lere ia pokotampulaano ta'u. 17Pentolu i larono asa nta'u luwuno tama i olomiu asalakono aiwa mpesomba ndi Ondae Ue Ala.

18Si pompesombaako rea mpesomba sinumbele ndi Ongkue saru hapamokoa anu meragi, ka tabano pesomba i oleo langkai-Ku, si torea hawe mo'oru. 19#Pel. 34:26; Win. 14:21; 26:2 Anu moiko ntu'u inso a wua amba-ambano witamu asalakono wawao a raha mpesombaa ndi Ondae i Ue, Ue Alamu. Si menahuo bauno ana bembe a uwoi uono ineno.”

Mesomba a lahumoa gagi masolaa

23:20-33

20 # Pel. 33:1-3 ”Aku montena mala'eka melempa i aromiu, kumongkomi komiu a nsala ka wawakomiu a mpo'ianga anu Kupatindaomo. 21Impepenteeo, imerongeo pinauno. Si me'ewaio, nde nahi ta umoninio halamiu, hangano nee-Ku kongko ndi onae. 22Sine tewala mentee ntu'u imerongeo pinauno, ka imeweweuo luwuno anu pinau-Ku, Aku me'iwaliako ira iwalimiu, ka umewai ira anu umewai komiu. 23Hangano mala'eka-Ku ta melempa i aromiu ka wawa komiu a witado to Amori, to Heti, to Perisi, to Kana'a, to Hewi ka to Yebusi, ka Aku mokotampula ira.

24Si mpenggolontu mpelangkaio pinesombai susua ke mpesomba ndi onae, ka si mentondao wineweudo luwuno tongku atuu, sine imempokotampulao lahumoado, ka imerawo-rawoo luwuno tugu pelahumoaado. 25Sine omiu asalakono mpesomba ndi Ondae i Ue, Ue Alamiu, asalakono Ondae i Ue Ira rumonsoo kaangamiu ka inuamiu. Aku moko'olaio haki inso ndi omiu. 26I witamiu nahi ta hina beine anu te'onini ke nahi po'ule. Aku mokomelaio tinuwumiu.

27Doitoa ndi Ongkue Aku tumenao mese'elungi komiu. Aku sumiarawo ira luwuno tongku anu hinawemiu, ka Aku weweu ira luwuno iwalimiu mpewolili mempolai inso ndi omiu. 28Aku mompotola mbo'u hoani anu masii mese'elungi komiu, ka dosaari ira to Hewi, to Kana'a ka to Heti atuu inso i aromiu. 29Sine nahi Aku sumaari ira luwu ilarono asa nta'u, kasi tepo'ia wita atuu, ka kondehora nahi tetiangi hadio sumosanggoli komiu. 30Aku sumaari ira ntededei inso ndi omiu, ranta ka impe'ana ue, ka impokompetorokio wita atuu. 31Aku patotoo tida wita miu inso a ntahi Teberau hawe a ntahi Pelisiti ka inso i pada one hawe i koro Eparata, nde Aku meweengako ira palili i wita atuu a ngkaemiu, ka imensaari ira inso ndi omiu. 32Si mpoweweu pedandia saru ondae ke maupo saru lahumoado. 33Ondae nahi ira mpo'ia mpiha i wita miu, kasi dompokontehala komiu ndi Ongkue, hangano mpesomba a lahumoado, nde anu kanarau gagi winggaro ndi omiu.”

Currently Selected:

Peluarakoa 23: XMZ

Highlight

Compare

Copy