Peluarakoa 21

Atora mongkona tiado ata to Ibarani

21:1-11

1 # Win. 15:12-18 ”Ndiomo luwuno atora anu asalakono kopauako ira.

2 # Ima. 25:39-46 Tewala omue mo'oli asa mia atado to Ibarani, asalakono ka ipo'angga ndi omue onoo nta'u tehineno, sine a nta'u ko'opitu moikoomo ipeluarako gagi mia maradeka, ka nahi po'owahi hapa-hapa. 3Tewala onae hawe asa-asano, ipeluarako asa-asano koa mbo'u. Tewala hinao kombiano, po'ineeomo ipeluarako saru onae. 4Tewala anu me'atao moweeakono kombiano, ka beine atuu me'anako ana ntama ke beine, beine atuu saru anano ipe'ue ira mpiha anu me'atao, ka ata tama atuu asalakono meluarako asa-asano. 5Sine tewala ata atuu motae: ’Kupehohawa komiu anu me'ata aku, beineku ka luwuno anaku, nahi kubehe meluarako gagi mia maradeka,’ 6asalakono mia me'atao wawao ndi Ondae Ue Ala, kai wawao a mpewowa ke a ngkaruno pewowa, ka anu me'atao atuu dumuhuakono a lewe birino, ka ata atuu asalakono mo'angga ndi onae asa ntinuwuno.

7Tewala asa mia mo'asa anano beine gagi ata, beine atuu si peluarako kana peluarakono ata tama. 8Tewala beine atuu ibinikio gagi kombia pinekaria, nami behe mbo'u anu me'atao, asalakono anu me'atao umeheakono itinolosi. Anu me'atao nahina pabawano ta umasao a tongku susua, hangano ilinggeio dandino a beine atuu. 9Tewala anu me'atao tumantuio beine atuu tiano anano anu tama, asalakono anu me'atao weweuo kana ana beine. 10Tewala anu me'atao mo'ala mbo'u asa beine, gagi samburueno, si kurangio kaanga tiano, sangka ka ipewowaliakono beine amba-ambano. 11Tewala anu me'ueo nahi weweuo anu otolu rupa atuu ndi onae, beine atuu moiko ipeluarako, nahi po'owahiako doi maupo tedei.”

Atora mongkona pe'inia tinuwuno pe'asa mia

21:12-36

12 # Ima. 24:17 ”Isema anu montunduhi mia ranta mate, manasa onae hinuku mate. 13#Pod. 35:10-34; Win. 19:1-13; Yos. 20:1-9Sine tewala pompepatea atuu nahi tinanga, tendeano Dopo'ineeo Ue Ala kaeno kai weweuo, Aku montisoakomu asa po'ianga ta polaiano. 14Tewala asa mia tensila aroano tekuda a mpe'asa miano, ranta kai pepateakono tinoo mosa'o, omue asalakono umalao mia atuu maupo inso a pontunua pesomba-Ku, kai hinuku mate.

15Isema anu montunduhi amano ke ineno, manasa onae hinuku mate.

16 # Win. 24:7 Isema anu mompolaisako pe'asa miano, ke i'asaomo, ke hinawe da kongko ndi onae, manasa onae hinuku mate.

17 # Ima. 20:9; Mat. 15:4; Mrk. 7:10 Isema anu montutundali amano ke ineno, manasa onae hinuku mate.

18Tewala mia me'u'ua ka anu asa montunduhiako watu pe'asa miano ke tidu, maupo nahi mate, pe'asa miano mompemahaki ka ipepombole a mpoturia, 19tewala da mokompewangu mbo'u ka mokompelempa-lempa metuko a maluaano, mia anu montunduhi atuu nahi gagi hinuku. Butu onae asalakono kai owahio mia anu pinokomasolano tempono nahi po'angga, ranta kai tompa.

20Tewala asa mia montunduhiako tuko atano tama ke beine, ranta kai mate a ngkaeno, manasaomo pinombaloako ata atuu. 21Sine tewala ata atuu da tuwu asa ke orua oleo, siimo ipinombaloako, nde ata atuu lano anudo.

22Tewala mia mpe'u'ua ka ihina asa mia mentia anu kona ntunduhi ka ite'onini sine nahina mobelano, mia atuu manasa ta dinenda menunu po'emano tamano beine atuu. Asalakono i'owahio montonda pomputusido puu mpobitara. 23Sine tewala beine atuu mohawe mobela anu susua, omue asalakono motuntu penaa ineuako penaa, 24#Ima. 24:19-20; Win. 19:21; Mat. 5:38mata ineuako mata, ngisi ineuako ngisi, kae ineuako kae, karu ineuako karu, 25moloba ineuako moloba, mobela ineuako mobela, kamba ineuako kamba.

26Tewala asa mia montunduhi matano atano tama ke beine ka imasola, mia atuu asalakono motolao atano gagi mia maradeka, euno matano. 27Tewala irontahio ngisino atano tama ke ngisino atano beine, onae asalakono motolao ata atuu gagi mia maradeka, euno ngisino.

28Tewala asa sapi lakino morumpai mia, tama ke beine ranta kai mate, sapi atuu asalakono winunoako watu ranta kai mate ka bauno si kinaa, sine ueno sapi atuu nahi gagi hinuku. 29Sine tewala sapi atuu mararuomo iperumpai, ka ueno umariomo pinopoto'oriako, sine nahi behe umukoo, tewala sapi atuu morumpai tama ke beine ranta kai mate, sapi atuu asalakono winunoako watu ranta kai mate ka ueno asalakono hinuku mate. 30Sine tewala doi pontolosi pinopotembiako anu me'umbuo sapi, asalakono i'owahio luwu anu i pinopotembiako ndi onae gagi tolosino penaano. 31Tewala anu rinumpaino asa ana ntama ke beine, anu me'umbuo asalakono hinuku montonda atora anu mengkena. 32Sine tewala sapi atuu morumpai asa ata tama ke beine, anu me'umbuo asalakono mo'owahi tolu pulu sikala salaka a anu me'atao ata atuu, ka sapi atuu asalakono winunoako watu ranta kai mate.

33Tewala asa mia mo'ungkahi tutuwino sumuru, ke mongkeke sumuru, ka nahi tutuwio, kai hina sapi ke kalide tedonta ilarono, 34anu me'umbuo sumuru atuu asalakono ta umowahio euno ka ipoweakono doi a mia anu me'umbuo pinotuwu, sine pinotuwu anu mate atuu gagi tiano. 35Tewala sapino asa mia morumpai sapino mia susua ranta kai mate, sapi anu tuwu atuu asalakono inasa, doino pinetia ka pinotuwu anu mate atuu pinetia mbo'u. 36Sine tewala sapi atuu teto'ori mararuomo iporumpai, sine anu me'umbuo nahi behe umukoo, asalakono anu me'umbuo umeuo luwu, sapi ineuako sapi, sine sapi anu mate atuu gagi tiano.”

Currently Selected:

Peluarakoa 21: XMZ

Highlight

Compare

Copy