Peluarakoa 20

Hopulu Songka

20:1-17

1 # Win. 5:1-21 Umarino atuu, Ondae Ue Ala mepau, 2”Ongkuemo Ue, Ue Alamu, anu wawakomiu mpeluarako inso i wita Masiri, inso a ntepe'ataa. 3Si hina ndi omiu ue ala anu susua i aro-Ku.

4 # Pel. 34:17; Ima. 26:1; Win. 4:15-18 Si mpoweweu lahumoa anu mengkena hapamo koa anu i langi i wawono, ke anu i tolino i totono, ke anu mpo'ia a laro uwoi itotono tolino. 5#Pel. 34:6-7; Pod. 14:18; Win. 7:9-10 Si mpelangkaio ke mpesomba ndi onae nde Ongkue Ue, Ue Alamu, onaemo Ue Ala anu mosiri, anu mombaloakono halano amano a anano, hawe a inuleno anu ko'otolu ka ko'opaa inso a luwuno mia anu umewai Aku. 6Sine Aku mopokitao pompehohawa-Ku a nsowu-sowuno mia, ndi ondae anu mpehohawa Aku ka anu mpe'ini a luwuno songka-Ku.

7 # Ima. 19:12 Si mempauo nee-Do i Ue, Ue Alamu, mondeenomo koa, nde Ondae i Ue mokonsalao mia anu pauo nee-Do mondeenomokoa.

8 # Teg. 2:1-3; Pel. 16:23-30; 31:12-17; 35:2; Ima. 23:3 Impewowoloo ka impokomemporio oleo Saba. 9Onoo oleo tempomiu mpo'angga ka umanggao luwuakoano anggaamu. 10Sine oleo ko'opitu onaemo oleo Saba-Do i Ue, Ue Alamu. Si mpo'angga hapamo koa anggaamu, moiko omiuke anamu tama, ke anamu beine ke atamu tama, ke atamu beine, ke pinotuwumu, ke mia mehawe a laro kotamu. 11Nde onoo oleo Ondae i Ue mokogagio langi ka wawontolino, tahi ka luwuno ihino, ka menaa-naa Ira a oleo ko'opitu. Onaemo pu'uno Ondae i Ue rumonsoo oleo Saba ka mokomemporio.

12 # Mat. 19:18-19; Mrk. 10:19; Luk. 18:20 # Mat. 15:4; Mrk. 7:10; Eps. 6:2-3 Pelangkai ira amamu ka inemu, kai melai tinuwumu a wita anu Doweeakomu i Ue, Ue Alamu ndi omue.

13 # Rom. 13:9; Yak. 2:11 # Teg. 9:6; Mat. 5:21 Si pompepate.

14 # Mat. 5:27 Si ponsosabo.

15 # Ima. 19:11; Rom. 13:9 Si ponako.

16 # Pel. 23:1-3 Si gagi sakosii megaupi a mpe'asa miamu.

17 # Rom. 7:7; 13:9 Si mosisiriakono rahano pe'asa miamu, si mosisiriakono kombiano, atano tama, ke beine, sapino ke kalideno, ke hapamokoa anu hinao a mpe'asa miamu.”

To Isaraeli medoito a pepopokita-Do i Ue

20:18-21

18 # Ibr. 12:18-19 # Win. 5:22-31 Luwuno tongku atuu mensakosiio rundu bote, koliki pesosangki, tawuwua me'uni ka torukuno me'ahu. Medoito iramo tongku atuu mpondidi-ndidi ka mpentade ola-olai. 19Dompotaeakono i Musa, ”Omuemo koa mepau ndi omami kami mperorongeakono. Siimo Ondae i Ue Ala anu mepau ndi omami, kasi kimemate.” 20Sine ipotaeako ira i Musa tongku atuu, ”Si medoito, nde hawe-Do Ue Ala aiwa umarahako komiu ka dumoitoako Ira kongko mpiha a laro matamu ka simpoweweu hala.”

21Tongku atuu mpetade ola-olai, sine i Musa lumako umpeda a nseru mo'ito po'ianga-Do Ue Ala.

Atora mongkona lahumoa ka pontunua pesomba

20:22-26

22Mepau Iramo i Ue ndi Musa, ”Kanandiomo pauako ira to Isaraeli: Imensakosiiomo, nine Ongkue mepau ndi omiu inso i langi. 23Si mpoweweu lahumoa pesombaamiu mpongkenao saru Ongkue; inso a nsalaka ke inso a wulaa, si mpoweweu.

24Asalakono impoweweu pontunua mpesomba ndi Ongkue inso a wita ka impesombaakonomo i wawono, pesombamiu anu tinunu ka pesomba tekaduduiamiu, bembe bimba ka sapi. Sompo po'ianga anu Kutisoakomu, gagi po'ianga impelangkaio nee-Ku, Aku hawe ndi omiu rumonso komiu. 25#Win. 27:5-6; Yos. 8:31Sine tewala mpoweweu komiu pontunua pesomba ndi Ongkue inso a watu, si mpowangu inso a watu anu pina'o, nde tewala ime'anggaakono pa'o, pontunua pesomba atuu nahi mempori. 26Kasi pewuatako a ensa, lumako i wawono pontunua pesomba ndi Ongkue, kasi tekita anu i olo ngkaramu.”

Currently Selected:

Peluarakoa 20: XMZ

Highlight

Compare

Copy